Epektibong Unang mga Duaw
1 Ang pagsugod ug mga panaghisgot sa ministeryo mahimong mahagiton sanglit ang katawhan puliki kaayo sa ilang kaugalingong kalihokan o may mga tinong opinyon bahin sa relihiyon. Unsa man ang atong hunahunaon aron mabuligan ta nga mahimong epektibo ang atong unang duaw?
2 Sa dihang nagatanyag sa Mayo 1 nga gula sa artikulong “Ang Tuig nga Nakapakurat sa Kalibotan,” ikaw makaingon:
◼ “Daghang tawo ang nahibulong kon nganong ang mga kahimtang mas daotan karon kay sa adlaw sa ilang apohan. Ang Bibliya nagahatag sa tubag dinhi sa Pinadayag 12:12. [Basaha ug komentohi.] Ang ebidensiya nagapakita nga kita nagapuyo na sa kataposang mga adlaw sukad sa 1914. Buot ba nimong mobasa sa pipila niining mga ebidensiyaha niining gula sa Ang Bantayanang Torre?”
3 Ikapaila mo ang Mayo 15, 1992, “Bantayanang Torre” pinaagig pagpatugbaw sa tagna sa Bibliya, nga makaingon:
◼ “Kasagaran buot ang mga tawong masayod kon unsay mahitabo sa umaabot, dili ba? Apan nahibalo ka ba nga ang Bibliya lamang ang nagahatag ug tukmang mga tagna nga kanunayng natuman? Tagda pananglitan kining usa ka tagna nga atong nakitang natuman sa Lucas 21:10, 11. [Basaha ug komentohi.] Niining magasina aniay usa ka listahan sa mga tagna sa Bibliya nga natuman na.” Ipakita ang tsart sa “Mga Tagna sa Bibliya nga Natuman.”
4 Ang pipila ka magmamantala naggamit ug mga tracts sa pagsugod ug mga pagtuon sa Bibliya sa unang duaw.
Sa dihang nagatanyag sa ‘tract’ nga “Kinabuhi sa Usa ka Malinawong Bag-ong Kalibotan,” ikaw makaingon:
◼ “Kami mga bulontaryo sa inyong kasilinganan. Tugoti ako sa paghatag nimo niining tract, nga nagapaila sa kinaiya sa among buluhaton. Gihunahuna ba nimong ang kalibotan mahisamang tan-awon niana?” Human makakuhag tubag, mahisgotan mo ang unang pipila ka parapo uban sa tawo, nga nagapatugbaw sa Mateo 6:9, 10 ug Salmo 37:29.
5 Hatagig maampingong paghunahuna kon unsaon mo pagpaila ang kaugalingon. Ang ekselenteng mga sugyot gipresentar sa librong Nangatarongan sa mga panid 9-15. Ang mahanasong paggamit niining mga pasiunaha makatabang nimo sa paghimo sa imong unang mga duaw nga epektibo.