Ang Panginahanglan sa Katawhan sa Pagpangita sa Diyos
1 Sulod niining ika-20 nga siglo, dihay dinaghan nga mga pagbalhin sa populasyon ingong resulta sa mga gubat, pagdaogdaog, ug kalisod sa ekonomiya. Kini nagdala sa nagakadaiyang relihiyosong mga grupo nga mas suod pa. Busa maoy dili talagsaon nga diha sa atong pagsangyawng buluhaton nga ikahibalag ta ang katawhan gikan sa nagkalainlaing relihiyosong mga kagikan.
2 Aron matabangan ta sa pagsabot sa ubang mga relihiyon ug sa ilang kasaysayan, nabatonan ta karon ang librong Pagpangita sa Katawhan sa Diyos. Kini nagatubag sa daghang pangutana bahin sa mga pagtulon-an sa dagkong mga relihiyon sa kalibotan. Gamiton ta kini diha sa atong ministeryo sa Nobyembre. Unsa man ang atong ikapatugbaw aron pagdasig sa sinserong mga tawo nga makakat-on og dugang bahin sa Diyos?
3 Usa ka pasukaranang pangutana nga gitubag sa libro mao: Ang tawo ba adunay dili mamatay nga kalag nga magpabiling buhi human sa kamatayon? Halos ang tanang relihiyon nagatudlo niining ideyaha. Ang uban pang mga pangutana nga gisukna sa libro mao: Aduna bay usa ka impiyerno nga didto ginasakit ang mga kalag? Unsa man ang paglaom sa mga patay? Aduna bay usa ka Diyos o daghang diyos? Imong madala ang pagtagad ngadto sa mga pangutana diha sa mga panid 17-18 sa maong libro.
4 Ang tanang katawhan nanginahanglang mangita sa Diyos karon kay duol na kaayo ang Armageddon. Pagkadakong pribilehiyo nga atong nabatonan sa pagdasig sa uban sa pagpangita kang Jehova karon samtang siya makaplagan pa! (Isa. 55:6, 7) Ang librong Pagpangita sa Katawhan sa Diyos nagataganag impormasyon alang sa mga tawo sa nagakadaiyang mga kagikan. Pananglitan, ang parapo 26 sa panid 297 nagapatin-aw ngadto sa mga Muslim nga ang matuod nga Kristiyanidad wala magatudlo sa Trinidad nga doktrina.
5 Anaa gayod kanato ang tanang katarongan nga magmasiboton sa pagtanyag niining libroha. Kon sinati kaayo ta sa iyang mga kaundan, kita mangitag mga kahigayonan sa pagpukaw sa interes sa sinserong katawhan sa tanang relihiyon. Hinaot ipakita ta ang kasibot alang niini nga pag-alagad.
6 Si Jehova maoy usa ka mahinatagon ug maluluy-ong Diyos. Pagkamabination sa iyang pagdapit nga mokat-on bahin kaniya! Mahimong daghan pa ang mahimong mga magdadayeg ni Jehova. Sa Nobyembre, sa tabang sa librong Pagpangita sa Katawhan sa Diyos, mabuligan pa gayod nato ang daghan sa Kakristiyanohan maingon man niadtong gikan sa di-Kristohanong mga kagikan sa pagsimba kang Jehova “uban sa espiritu ug kamatuoran.” (Juan 4:23, 24) Hinaot nga kita magapadayon sa pagkaplag sa mga nagapangita sa kamatuoran ug magapalig-on sa ilang relasyon sa Diyos sa kamatuoran. Siya mahimong makaplagan!