Gamitag Maayo ang mga Magasin
1 Kon moanha ka sa usa ka baligyaanag basahon, imong makita ang daghang magasin nga nagpaila sa tanang butang gikan sa komiks ngadto sa siyentipikanhong teknolohiya. Dili gayod nimo mabasa kanang tanan. Samtang ang pipila ka magasin adunay mapuslanong impormasyon, ang kadaghanan kaduhaduhaan ang kabililhon.
2 Pagkalahi kon itandi sa Pagmata! Kining magasina napahinungod sa pagpangita ug pagmantala sa kamatuoran nga magamit alang sa kaluwasan sa tanang mosanong sa gugma sa Diyos.
3 Ang Pagmata! epektibong makaabot sa tanang matang sa tawo tungod sa pagkasangkad niini ug pagkadaiya sa mga artikulo. Ingon sa gipatin-aw sa panid 4 sa matag gula, kini “maoy alang sa paglamdag sa tibuok pamilya.” Kini nagapaila sa mga artikulo diha sa nagkadaiyang mga ulohan, nga nagalakip sa katawhan, relihiyon, ug siyensiya. Kini motugkad sa kahiladman ug mopunting sa tinuod nga kahulogan sa bag-ong mga hitabo. Labaw sa tanan, kini “mougmad sa pagsalig sa saad sa Maglalalang sa makigdaiton ug may-kasegurohang bag-ong kalibotan.”
4 Sa Oktubre atong itumong ang pagtagad sa magasing Pagmata! diha sa atong pagsangyaw. Ang atong tumong mao ang pagkuhag mga suskrisyon niining magasina aron nga kadtong interesado makadawat niana sa regular nga paagi nga diretso gikan sa koreyo.
5 Ang Oktubre 8 nga gula sa Pagmata! nagapaila sa ulohang “Panalipdi ang Imong mga Anak!” Daghang pamilya karon may mga suliran nga naglangkit sa ilang mga anak ug magmadinawaton sa tukma panahong tambag nga anaa sa magasin. Bahin sa Oktubre 22 nga gula, kinahanglang mabatonan nato ang mapaminawong tawo pinaagig pagdala sa pagtagad sa artikulong “Haduol Na ba ang Bag-ong Kalibotan?”
Mga Presentasyon nga Makapukaw sa Interes
6 Human nga ikapaila ang kaugalingon, makaingon ka:
◼ “Daghang ginikanan karon nabalaka sa mga suliran nga giatubang sa ilang kabatan-onan. Gibati ba nimong tinuod kini karong adlawa? [Tugoting motubag.] Unsa may imong gihunahunang labing maayong giya sa mga ginikanan karon? Dinhi sa Oktubre 8 nga gula sa Pagmata! ania ang pipila ka mapuslanong sugyot kon sa unsang paagi kining mga sulirana pagadumalahon.” Unya paklia ang magasin ug ipakita ang mga artikulo sa “Panalipdi ang Imong mga Anak!”
7 O makaingon ka:
◼ “Sa unsang paagi ang palaaboton sa usa ka bag-ong sistema diin ang tanang gubat ug kasamok pagahanawon na makapadani kanimo? [Tugoting motubag.] Aron pagpakita kanimo nga dili lamang kini usa ka damgo niay akong magasin (Oktubre 22 nga gula) nga nagahisgot niining kahibulongang palaaboton gikan sa panglantaw sa Bibliya.” Dayon mapakli mo ngadto sa artikulo nga nag-ulohag: “Haduol Na ba ang Bag-ong Kalibotan?”
8 Buot natong magmapositibo sa atong pagduol sa dihang nagatanyag sa Pagmata! ngadto sa katawhan. Nakombinser kita sa kabililhon niana. Aduna kitay usa ka butang maayo, ug buot natong ipaambit kana sa uban.—Prov. 3:27.