Tabangi Silang Molihok Maylabot sa Mensahe
1 Ang atong pagwaling buluhaton nagahatag sa katawhan sa kahigayonan sa ‘pagpaminaw sa mga pulong sa propesiya sa Pinadayag.’ (Pin. 1:3) Apan kon sila molabang-buhi man sa “dakong kasakitan,” kinahanglan silang molihok maylabot niana. (Pin. 7:14) Ang mga kinabuhi nalangkit! Busa paneguroang mobalikduaw kanilang nagapakitag interes.
2 Kon nabilin nimo ang librong “Pinadayag,” makaingon ka:
◼ “Maayo nga nakita ka pag-usab. Sa miagi natong panagsulti, atong nahisgotan ang bahin sa mga tagna sa Pinadayag, ug akong gikabilin kanimo ang usa ka basahon nga nagapatin-aw niana. Tingali namatikdan nimo nga bisan pag ang basahon sa Pinadayag malisod sabton, kini masabtan man sa kahayag sa karong-adlaw nga mga panghitabo. Buot nakong mogugol ug pipila ka minuto sa pagpatin-aw kon unsay giingon sa Bibliya mahitungod sa atong mga panahon.” Unya pakliang usa ka basahon nga imong magamit sa pagsugod ug usa ka pagtuon sa Bibliya.
3 Kon imong nabilin ang tract nga “Kini Bang Kalibotana Molungtad?” sa unang duaw, makaingon ka niini:
◼ “Nalipay ko nga nakaplagan ka nga ania sa balay karon. Sa akong pagduaw kanimo di pa dugay, atong naestoryahan ang bahin sa usa ka ilhanan nga mahitabo una pa ang kataposan sa kalibotan. [Repasoha ang tukmang mga bahin sa ilhanan sa Mateo 24:3-14.] Nakamatikod ka ba ug bisan unsang hitabo sa kalibotan di pa dugay nga mahimong usa ka katumanan sa bahin nianang maong ilhanan?” Ginamit ang mga ilustrasyon sa kapitulo 16 sa librong Pinadayag, komentohi ang katumanan sa pipila niining mga tagnaa sa Bibliya.
4 Kon gidapit nimo ang tagbalay sa Memoryal, makaingon ka:
◼ “Sa akong miaging pagduaw kanimo, atong naestoryahan kon unsa ka hinungdanon ang kamatayon ni Jesus sa katawhan. Gidapit ko usab ikaw sa pagtambong sa Memoryal sa iyang kamatayon, nga saulogon sa mga Kristohanon libot sa kalibotan sa Marso 26. Ako mianhi karon sa pagpahinumdom kanimo nga ikaw gidapit nianang hinungdanong hitabo. [Isulti ang panahon ug dapit sa selebrasyon.] Hayan kini makabulig kanimo sa pagpabili sa kahulogan sa okasyon kon atong repasohon ang pipila sa mga panalangin nga atong gipahimuslan karon ingong resulta sa nahimo ni Jesus alang sa katawhan, ingon man sa mga panalangin nga umaabot pa.” Unya hisgoti ang tukmang mga puntos gikan sa kapitulo 41 sa librong Pinadayag. Mahimong ipatugbaw usab nimo ang mga ilustrasyon sa mga panid 294, 299, ug 308. Kon posible, hikayang mabuligan ang interesadong tawo sa pagtambong sa Memoryal.
5 Kon ang tawo maoy yano lamang nga mauyonong tigpaminaw, mahimong epektibo kini:
◼ “Nalipay gayod ako sa atong panaghisgot bahin sa Bibliya di pa dugay. Ako mibalik tungod kay buot nakong mapahimuslan nimo ang gisaad sa Diyos alang niadtong buot nga mokat-on pag dugang mahitungod kaniya.” Basaha ang Juan 17:3, unya ilangkit ngadto sa tract nga Kinabuhi sa Malinawong Bag-ong Kalibotan.
6 Hinaot nga ang imong pagpabili sa lukat makapalihok nimo sa pagbalikduaw sa mga interesado. Tabangi silang molihok maylabot sa kulba-hinam nga mensahe sa Pinadayag. Hinumdomi, “ang tinudlong panahon haduol na”!—Pin. 1:3.