Gamitang Bag-ong Brosyur nga Epektibo
1 Sa atong di pa dugay nga distritong kombensiyon, kita nalipay sa pagdawat sa bag-ong brosyur nga Sa Dihang ang Imong Minahal Mamatay. Kini angayng makadani sa katawhan sa tanang kahimtang sa kinabuhi, sanglit kay daghan man kaayo ang nasubo tungod sa pagkawala sa usa nga minahal. Ang makapadaning mga ilustrasyon niini makapasayon gayod niining ipahimutang. Sa panid 29 ang dramatikong dibuho kang Lazaro nga gibangon gikan sa mga patay nagapakita sa kang Jesus nga “mainitong tinguha sa pagbadbad sa mga kadaot sa kamatayon.” Ang sunod nga bug-os-panid nga ilustrasyon nagahulagway sa usa ka malipayong esena sa pagkabanhaw sa bag-ong kalibotan. Pagkamakapadasig gayod kini sa mga kasingkasing niadtong anaa sa kasubo!
2 Kining maong brosyur gidesinyo nga magamit sa panaghisgot. Ang mga pangutana makita diha sa usa ka kahon sa kataposan sa matag seksiyon inay kay sa ubos sa matag panid. Imong magamit kining “Mga Pangutanang Hunahunaon” sa bisan unsang paagi nga imong gibating labing makabulig sa imong ginatun-an.
3 Sa dihang nagaduaw, basin buot nimong ipakita ang listahan sa mga kaundan sa panid 2 ug suknaang tagbalay kon unsa ang nakapainteres kaniya. Tugoti siya sa pagpahayag sa iyang mga pagbati, ug unya ipakita kon sa unsang paagi ang brosyur nagatanyag ug paghupay. Ang matag seksiyon nagagamit ug daghang teksto sa Bibliya nga nagapakita sa pasukaranan sa atong paglaom.
4 Ang sub-ulohan sa panid 5, “Adunay Tinuod nga Paglaom,” nagapatugbaw sa makahupayng paglaom sa Bibliya alang sa mga patay. Kini makaaghat gayod sa gana alang sa “Usa ka Seguradong Paglaom Alang sa mga Patay,” nga makaplagan sa mga panid 26-31. Ang kahon sa panid 27 nagatagana sa “Makapahupayng mga Teksto.” Ang nagabalatang tagbalay daling makakita nga si Jehova mao gayod ang “Diyos sa tanang paghupay.”—2 Cor. 1:3-7.
5 Sa sensitibong paagi, ang brosyur nagapakita kon unsaon pagsagubang sa kaguol diha sa kamatayon sa usa ka minahal ug kon sa unsang paagi ang uban makatabang nianang mapit-osong mga panahon. Adunay usa ka kahon sa panid 25 nga nag-ulohag “Pagtabang sa mga Bata sa Pag-atubang sa Kamatayon.” Kini magatabang gayod sa mga ginikanan kinsa kinahanglang mosagubang niining sulirana.
6 Batoni ang ekstrang kopya ug gamita kana sa impormal nga pagsangyaw. Hayan buot nimong moduaw sa lokal nga mga punerarya sa inyong teritoryo sa pagsusi kon buot nilang makabaton ug mga kopya aron paghupay sa nagabalatang mga pamilya.
7 Atong isipon kini nga usa ka pribilehiyo sa paggamit niining bag-ong brosyur sa “paghupay sa tanang nagabalata.”—Isa. 61:2.