Pagmarka nga Nagaluwas
1 Sa adlaw ni Ezequiel, si Jehova nagmarka niadtong nagapanghupaw ug nagaagulo mahitungod sa ginabuhat nga dulumtanang mga butang, nga nagagarantiya sa ilang kaluwasan. (Ezeq. 9:4-6) Ang atong buluhatong pagsangyaw karon nagapalampos sa samang katuyoan. Kita magadula ug hinungdanong papel niining maong pagmarkang buluhaton.
2 Ang pagkaplag sa sinserong katawhan mao lamang ang unang tikang. Kita magahikay ug usa ka balikduaw. Ang atong kalamposan nagadepende kon unsa ang atong gipangandamang isulti sa dihang kita mobalik.
3 Sa pagpaloap sa napahimutang nga “Ang Bantayanang Torre,” ikaw makapunting sa pangunang tema niini:
◼ “Matikdi nga sa atubangang hapin sa Ang Bantayanang Torre makita ang pamulong nga ‘Nagapahayag sa Gingharian ni Jehova.’ Kini maoy talagsaon tungod kay kini nagapaluyo sa Gingharian sa Diyos ingong ang bugtong sulbad sa mga suliran sa kalibotan. Kini mao ang maayong balita nga giingon ni Jesus nga imantala sa tibuok yuta.” Basaha ang Mateo 24:14, ug ipatin-aw kon sa unsang paagi Ang Bantayanang Torre mabatonan nga makanunayon ug magamit alang sa personal nga pagtuon sa Bibliya.
4 Hayan palabihon nimo ang yanong pagpunting sa Bibliya mismo ug ipasiugda ang panginahanglan sa pagbasa niana nga makanunayon. Makaingon ka:
◼ “Maorag halos ang tanan buot nga makabaton ug pipila ka mapuslanong tambag kon sa unsang paagi makabuntog sa mga suliran sa matag adlaw nga pagkinabuhi. Asa man sa imong hunahuna kita makakaplag ug tambag nga atong masaligan? [Tugoting motubag.] Daghan nga misalig sa tambag sa mga higala o kinsa mibayad alang sa propesyonal nga tambag ang nangapakyas. Sa laing bahin, minilyon sa mga tawo ang nakakaplag nga ang Bibliya nagahatag ug tambag nga masaligan gayod nila. Kini nagapakita kanato kon unsaon pagbuntog sa bisan unsang suliran nga atong maatubang. [Basahang 2 Timoteo 3:16, 17.] Tugoti ako sa pagpakita kanimo kon unsaon paggamit kini aron pagbukas sa balay-bahandian sa maalamong tambag.” Padayona pinaagig pagpakli ngadto sa “Gugma” diha sa seksiyon sa “Giindise nga mga Pulong sa Bibliya” sa luyo sa New World Translation (bi2-CV), ug ipunting ang pipila sa mga tekstong nagapakita kon sa unsang paagi ang gugma makatabang kanato sa pagsulbad sa mga kasungian uban sa uban.
5 Uban ang tumong sa pagsugod ug usa ka pagtuon sa Bibliya sa librong “Ikaw Mabuhing Walay Kataposan sa Paraiso sa Yuta,” nganong dili sulayan kining maong pasiuna?:
◼ “Sa unsang paagi ang imong pamilya makabenepisyo sa pagkinabuhi sa usa ka kalibotan nga sama niini?” Ipakita ang mga ilustrasyon sa mga panid 156-7, unya basaha ang usa o duha ka kasulatan nga gikutlo sa maong mga panid, ug ipatin-aw nga kini maoy mga saad ni Jehova nga Diyos, kinsa dili magbakak. Itumong ngadto sa listahan sa mga kapitulo sa mga panid 5-6, ug suknaang tagbalay kon asang ulohana ang ilabinang nakapainteres kaniya; paklia ngadto sa kapitulo nga iyang gipili, ug hisgoti ang usa o duha ka parapo.
6 Buot ba nimong matabangan ang laing tawo nga mamarkahan alang sa kaluwasan? Kon mao, ‘buhata sa bug-os ang imong ministeryo’ pinaagig maayong pagpangandam ug pagpaloap dayon sa tanang interes nga imong makaplagan.—2 Tim. 4:5.