Ang Tanan Napahinam sa Pagluwat sa Bag-ong Libro sa Distritong Kombensiyon
Bag-ong Libro Nagapasiugda sa Kahibalo sa Diyos
1 Didto sa atong distritong kombensiyon sa Disyembre, pagkamalipayon ta uban sa entirong programa! Sa palis sa Sabado ang atong kalipay nag-awas sa dihang atong nadungog ang pahibalo bahin sa bag-ong libro, Kahibalo nga Motultol sa Kinabuhing Walay Kataposan, ug ang may kalabotang impormasyon nga misunod. Ang binilyong mga tawo sa yuta nanginahanglag kahibalo nga ang Diyos lamang ang makahatag—kahibalo sa Diyos ug sa iyang Anak, si Jesu-Kristo.—Prov. 2:1-6; Juan 17:3.
2 Pagkatin-aw ang paghubit sa mamumulong sa mga bahin sa maong libro! Ang makapadaning mga ulohan sa kapitulo, praktikal nga mga ilustrasyon, positibong presentasyon sa kamatuoran, sayon nga mga pangutana, ug, sa kataposan sa matag kapitulo, usa ka kahon nga nag-ulohag “Taksa ang Imong Kahibalo” mao ang apil sa mga bahin nga magpadani sa tanang magabasa niana.
3 Sa paniklop nga mga pakigpulong sa Sabado ug Dominggo, kita gidasig nga magbatog pagtuon sa pamilya nga maggamit niining bag-ong libro. Sa pagkakaron, kita lagmit nasinati na sa mga kaundan niana. Sa walay duhaduha inyo nang nahisgotan usab ang mga puntos nga huptan sa hunahuna sa dihang magatanyag niining bag-ong libro diha sa kanataran.
4 Mga Puntos nga Repasohon: Hayan imong mahinumdoman nga sa dihang gipahayag ang ulohang “Kon Nganong Gikinahanglan sa Katawhan ang Kahibalo sa Diyos,” ang mamumulong nagpasiugdag pipila ka puntos, lakip na sa mosunod: (1) Sa dihang gamiton mo kining libroha sa pagdumalag mga pagtuon, dili maalamon nga ipasulod ang dugang materyal, nga magpatabon sa pangunang mga puntos; ipunting lamang ang pagpasabot kon unsay gipamatud-an sa matag kapitulo. (2) Ang mga kapitulo maoy kasarangan ang gitas-on aron sagad maarangan mo ang pagkobre sa usa niana sa matag panahon sa imong pagtuon. (3) Sa kataposan sa matag kapitulo, ang mga pangutana sa kahon nga nag-ulohag “Taksa ang Imong Kahibalo” magtaganag usa ka mubong pagrepaso.
5 Paggamit sa mga Pagtuon sa Bibliya: Adunay pipila ka magmamantala ang nangutana kon angay bang usbon ang ilang mga pagtuon sa Bibliya ngadto niining bag-ong libro. Kon ikaw taastaas na sa librong ginatun-an sa presente, maoy praktikal nga kompletohon ang pagtuon sa maong publikasyon. Kon dili man, girekomendar nga ibalhin kini ngadto sa Kahibalo nga libro. Kon imong gigamit ang usa ka brosyur o tract sa pagsugod ug usa ka pagtuon sa Bibliya, sa nahiangay nga panahon, ipailaila ang bag-ong libro ug gamita kana sa imong pagtuon sa Bibliya sa balay. Ang dugang impormasyon bahin sa paggamit sa Kahibalo nga libro mogula diha sa Atong Ministeryo sa Gingharian sa umaabot nga mga bulan.
6 Si Jehova nagtagana niining bag-ong libro sa pagtabang kanato sa pagtudlo sa uban bahin sa kahibalo nga motultol sa kinabuhing walay kataposan. Karon gikinahanglan natong mangandam pag-ayo ug batonan ang bug-os nga pakig-ambit sa buluhatong pagahumanon pa.