Pinadayag​—Usa ka Yawi sa Matuod nga Kalipay

¹ Sa Pinadayag 1:3, ang apostol nga si Juan nagatug-an kanato kon unsaon sa pagkaplag ug kalipay. Siya misulat: “Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini.” Ang librong Pinadayag​—Hingpit nga Sangkoanan Niini Haduol Na! nakatabang na sa daghan sa pagkaplag ug dakong kalipay. Kita adunay maayong katarongan nga itanyag kini sa uban.

² Hayan ikaw makasugod ug usa ka panaghisgot pinaagi niining pangutanaha:

◼ “Sa hunahuna mo ang basahon ba sa Bibliya nga Pinadayag mahimong masabtan, o kini ba kanunayng magpa­biling usa ka misteryo? [Tugoting motubag.] Daghang sama sa imong panghunahuna. Matikdi kon unsa ang giingon sa Bibliya sa Pinadayag 1:3. [Basaha.] Busa ang Pinadayag mahimong masabtan, ug ang kahibalo bahin niini makahatag ug kalipay kanato. Sa unsang paagi kini posible?” Repasoha ang mga puntos sa parapo 2 sa panid 6, ug unya moingon: “Kining publikasyona nagapresentar ug bersikulo-por-bersikulong panaghisgot sa basahong Pinadayag. Malipay ko nga ibilin kining kopyaha kanimo.”

³ Sanglit daghan ang nabalaka bahin sa pagtagana alang sa ilang materyal nga mga panginahanglan, kini hayan makamugnag pipila ka interes:

◼ “Unsa sa imong hunahuna ang atong labing dakong panginahanglan? [Tu­goting motubag.] Adunay daghan kinsa nagabati nga ang atong gikinahanglan mao ang dugang materyal nga mga butang.” Paklia ang panid 73 ug repasoha ang mga puntos diha sa kahon nga nag-ulohang “Materyalismo Kontra Kaalam.” Magpadayon sa pag-ingon: “Kini nagapakita nga sobra kaayo ang pagpasiugdang gibutang diha sa materyal nga mga butang; kita kinahanglang mas mabalaka bahin sa atong espirituwal nga mga panginahanglan.” Basaha ang Juan 17:3, ug ipatin-aw kon sa unsang paagi ang kahibalo bahin sa Diyos mahimong motultol sa kinabuhing walay kataposan. Itanyag ang libro ug hikaya ang usa ka balik­duaw.

⁴ Sanglit daghan ang nabalaka bahin sa kasamok sa kalibotan, hayan imong sulayan kini:

◼ “Bisan kinsa nga akong mahisgotan nabalaka bahin sa kaugmaon. Ang pipila ka lider sa kalibotan nagabati nga kita anaa na sa ngilit sa bag-ong yugto sa kalinaw. Unsay imong pagbati bahin niana? [Tugoting motubag.] Bisan pa sa tanang paningkamot sa tawo, ang kabangis ug kasakitan nagadugang sa tibuok kalibotan. Ang Bibliya nagapadayag sa bugtong dumalayong solusyon niining mga problemaha. [Basaha ang 2 Pedro 3:13. Paklia sa hulagway sa panid 302, ug ipatin-aw kon sa unsang paagi ang Gingharian sa Diyos maga­patunghag dumalayong pakigdait ug kasegurohan nganhi niining yutaa.] Kining publikasyona magatabang kanimong masabtan kon sa unsang paagi mahimo mong matagamtam ang kinabuhing walay kataposan ilalom sa pagmando sa Gingharian sa Diyos.”

⁵ Kon imong mahinagbo ang usa kinsa puliki ug kinahanglang dili ka magdugay, hayan imong masulti kini:

◼ “Sanglit ikaw aduna lamay tipik sa panahon, buot nakong ibilin kining usa ka tract nga nag-ulohag Kini Bang Kalibotana Molungtad? [Paklia sa panid 6 ug basaha ang Pinadayag 21:3, 4.] Ako nagadasig kanimong basaha kini. Sa sunod panahong makahapit ko, buot kong masayod kon unsa ang imong hunahuna bahin niana.”

⁶ Samtang atong itanyag ang Pinadayag​—Hingpit nga Sangkoanan Niini Haduol Na! sa Pebrero, sa walay duhaduha daghan ang makabaton ug kalipay pinaagi sa pagsabot sa kahulogan sa kahibulongang mga tagna sa Pinadayag.​—Prov. 3:13.