Mga Magtatan-aw nga Nagapanguna—Mga Tagdumala sa Pagtuon sa Libro sa Kongregasyon
1 Maoy usa ka talagsaong pribilehiyo alang sa kuwalipikadong ansiyano o ministeryal nga alagad ang pag-alagad ingong tagdumala sa Pagtuon sa Libro sa Kongregasyon. Ang pagtagad sa espirituwal nga mga panginahanglan kanilang anaa sa iyang grupo maoy usa ka seryosong responsabilidad. Ang iyang mga katungdanan maglakip sa tulo ka kategoriya.
2 Takos nga Pagpanudlo: Nagakinahanglag bug-os nga pagpangandam alang sa tagdumala sa Pagtuon sa Libro sa Kongregasyon ang pagpaambit ug pagsabot ngadto sa grupo sa matag semana. Tinguhaon niya nga palamboon ang apresasyon sa materyal nga ginatun-an. Inay mokomentog sobra sa iyang kaugalingon sa panahon sa pagtuon, sa dihang kinahanglanon magpatungha siyag dugang takdo nga mga pangutana aron palutawon ang pangunang mga puntos sa leksiyon. Ang iyang hagit mao ang paghimo sa pagtuon nga makapaikag ug matulon-anon ug sa paglangkit sa matag usa diha sa panaghisgot. Ang iyang tumong mao ang pagpalig-on sa espirituwal nga paagi, sa pagpasiugda sa praktikal nga bili sa pagtuon, ug sa paghimo sa materyal nga makaabot sa hunahuna ug kasingkasing.—1 Tes. 2:13.
3 Makatabang nga Pagbantay: Ang tagdumala sa Pagtuon sa Libro sa Kongregasyon maoy “sama sa usa ka salipdanang dapit gikan sa hangin ug tagoanang dapit gikan sa bagyo.” (Isa. 32:2) Nagaatiman gayod siya sa tanan diha sa iyang grupo ug nagatino nga ang espirituwal nga tabang gitagana sa dihang usa sa iyang giatiman naluya.—Ezeq. 34:15, 16; 1 Tes. 2:7, 8.
4 Masibotong Pag-ebanghelyo: Ang tagdumala sa Pagtuon sa Libro sa Kongregasyon matanlagon bahin sa paghimog praktikal nga mga kahikayan alang sa tanan diha sa iyang grupo nga moambit sa bug-os diha sa ministeryo sa kanataran. Manguna siya sa buluhaton sa pag-ebanghelyo, sa pagkasayod nga ang pagkamakanunayon, kasibot, ug kainit nga iyang ipakita sa pag-alagad mabanaag diha sa mga sakop sa grupo. (Col. 4:17; 2 Tes. 3:9) Sa ngadtongadto, maningkamot siya nga makuyogan sa pagsangyaw ang matag membro sa iyang grupo. Kon buot natong mapahait ang atong mga katakos sa pagsangyaw ug pagpanudlo diha sa ministeryo, ang tagdumala sa Pagtuon sa Libro sa Kongregasyon makatabang kanato sa pagkab-ot sa atong tumong.—1 Tim. 4:16; 2 Tim. 4:5.
5 Kita tinuod nga napanalanginan uban niining mga gasa sa mga lalaki nga andam kanunay sa paghatag kanatog espirituwal nga tabang ug mahigugmaong pagpaluyo. (1 Tes. 5:14) Hinaot nga kita magpakita sa atong pagpabili alang niining kahibulongang tagana gikan kang Jehova pinaagi sa atong regular nga pagpakig-ambit diha sa pagtuon sa libro ug sa atong matinumanong pagpaluyo sa buluhatong pag-ebanghelyo.—Heb. 10:25.