Unsay Imong Isulti Ngadto sa Usa ka Tawong Hudiyo?
1 Sa unang siglo, daghan sa “mga anak sa Israel” misanong nga mapabilhon sa pagsangyaw ni Jesus ug sa iyang mga apostol. (Buh. 10:36) Sama kaniadto, ubay-ubay sa mga Hudiyo karon ang kinasingkasing nga midawat sa kamatuoran—dili lamang sa Israel kondili sa Rusya usab, sa Tinipong Bansa, ug sa ubang kanasoran. Buot ba nimong magmalamposon nga mas pa sa pagsangyaw sa mga Hudiyong katawhan? Ang mosunod nga mga sugyot motabang kanimo sa paghatag ug mataktikanhong pamatuod ngadto sa relihiyoso ug di-relihiyosong mga Hudiyo.
2 Pagsangyaw Ngadto sa Relihiyosong mga Hudiyo: Angayng maamgohan nga ang relihiyosong mga Hudiyo sagad nga mas mabalak-on sa pagtuman sa mga tradisyon sa mga rabbi kay sa pagbatbat sa espesipikong mga doktrina. Sa pagkamatuod, sila sa katibuk-an naglantaw sa tradisyon ingong adunay awtoridad nga tumbas sa Kasulatan. Busa, sila dili gayod interesado sa pagpakighisgot sa halalom nga mga ulohan sa Bibliya. Sila usab makiling sa paghunahuna sa Bibliya ingong usa ka libro sa mga Kristohanon. Tungod niana nga katarongan, kasagarang labing maayo sa dihang magtumong sa Bibliya nga gamiton ang mga terminong “ang Hebreohanong Kasulatan,” “ang Torah,” o “ang Kasulatan.” Ang ekselenteng publikasyon nga giandam ilabina alang sa Hudiyong populasyon mao ang brosyur nga Will There Ever Be a World Without War? Mabatonan lamang kini sa Ingles.
3 Unsang mga topiko ang hayan magpainteres sa relihiyosong mga Hudiyo? Aw, sila nagtuo nga adunay usa ka Diyos, nga interesado kaayo sa tawo. Nagtuo usab sila nga ang Diyos manginlabot sa tawhanong mga kalihokan. Tingali gamiton nimo kini nga mga puntos aron ipahiluna ang puntong giuyonan. Dugang pa, kadaghanang mga Hudiyo nahibalo kaayo sa pag-antos sa ilang katawhan panahon sa Gubat Kalibotan II. Nahibulong sila kon nganong ang Diyos nagtugot sa maong inhustisya ug kon kanus-a taposon ang pagkadaotan. Kita nasangkapan pag-ayo sa pagtubag sa maong mga pangutana, nga nagtumong, pananglitan, kon unsay naagoman sa atong mga igsoon panahon sa Holocaust.
4 Siyempre, aron malikayan ang pagpahilayo sa tagbalay, labing maayo nga dili hisgotan ang kailhanan sa Mesiyas nga sayo ra kaayo diha sa panaghisgot. Hinunoa, tingali imong hisgotan ang papel nga gidula ni Moises sa kasaysayan sa Israel ug pangutan-on ang tagbalay kon nagtuo ba siya nga ang mga pagtulon-an ni Moises hinungdanon karon. Kon maorag haom nga hisgotan ang kailhanan sa Mesiyas, mahimo nimong unang basahon ang Deuteronomio 18:15, nga nag-ingon: “Usa ka propeta gikan sa imong taliwala, gikan sa imong mga igsoon, sama kanako, mao ang patindogon ni Jehova nga imong Diyos alang kanimo—ngadto kaniya kamo magpatalinghog.” Suknaa ang tagbalay kon kinsa kadtong anaa sa hunahuna ni Moises sa dihang siya naghisgot sa usa ka propeta nga sama sa iyang kaugalingon. Dayon kobrehe ang pipila ka puntos diha sa World Without War nga brosyur, panid 14, mga parapo 17 ug 18.
5 Lahig Panglantaw sa mga Butang ang Di-Relihiyosong mga Hudiyo: Dili ang tanang nagpaila sa iyang kaugalingon ingong Hudiyo ang nagdawat sa mga pagtulon-an sa Judaismo. Daghang Hudiyo ang di-relihiyoso sa ilang panglantaw. Sila mas interesado sa pagpalambo sa usa ka bulag nga Hudiyohanong kailhanan, uban sa kultura niini, tradisyon, ug edukasyon, kay sa pagtuman sa Hudiyohanong relihiyon. Ang ubang di-relihiyosong mga Hudiyo maoy agnostiko—ang pipila mga ateyista pa gani. Sa pagsugod, gamay lang ang mapalampos pinaagig pagkutlo nga subsob gikan sa Hebreohanong Kasulatan. Mas mapuslanon nga dumalahon ang panaghisgot sama sa imong buhaton sa bisan unsang panaghisgot sa usa ka tawo nga dili relihiyoso. Pananglitan, mahimong imong ipatin-aw kon sa unsang paagi ang Bibliya praktikal sa atong adlaw. Kon ang tagbalay dili motuo nga ang Bibliya dinasig, ang pipila ka puntos diha sa World Without War nga brosyur makatabang, ilabina niadtong makaplagan sa seksiyon sa panid 3 nga nag-ulohan ug “The Bible—Inspired by God?”
6 Sa dihang magsangyaw ngadto sa usa ka tawong Hudiyo, hayan ikaw moingon:
◼ “Kadaghanan kanato dihay masulub-ong kasinatian sa pagkamatay sa usang minahal. Unsa sa imong hunahuna ang mahitabo kanato sa dihang kita mamatay?” Tugoting motubag. Dayon dalha ang pagtagad sa tagbalay ngadto sa kahon nga nag-ulohag “Death and the Soul—What Are They?” sa panid 22 sa World Without War nga brosyur. Ang kahon nagtandi kon unsay gisulti sa Kasulatan bahin sa kinabuhi human sa kamatayon sa kon unsay gitudlo sa mga rabbi. Dayon paklia ang parapo 17 sa panid 23, ug ipakita nga sumala sa Kasulatan, ang mga patay banhawon ngadto sa kinabuhi diha sa usa ka paraisong yuta. Itanyag ang brosyur. Sa pagpangandam alang sa pagbalikduaw, imo tingaling hisgotan nga ang patriarkang si Job nagbaton sa paglaom sa pagkabanhaw. Puntinga ang mga kasulatan nga gisitar sa kataposan sa parapo 17, ug isulti nga mobalik ug hisgotan kana.
7 Ang mga basahon ni Mateo, Marcos, Lucas, Juan, ug Buhat nagtala ug mga kasinatian sa mga Hudiyo nga nagpatalinghog ug milihok diha sa kamatuoran. Gihuptan pa ni Jehova nga bukas ang dalan ngadto sa kinabuhing walay kataposan. Daghang sinserong mga Hudiyo ang hayan makakat-on pa bahin kang Jehova, ang matuod nga Diyos, aron nga sila usab makapuyo sa walay kataposan sa bag-ong kalibotan sa Diyos.—Miq. 4:1-4.