Pamati Aron Makakat-on
1. Nganong kinahanglan ang labawng paningkamot sa pagpamati aron makakat-on sa distritong kombensiyon?
1 Hapit nang magsugod ang 2013 nga mga distritong kombensiyon. Gihimo ang dakong paningkamot aron maandam ang programa nga maghisgot sa mga panginahanglan karon sa mga igsoon sa tibuok kalibotan. Andam ka na ba sa pagtambong sa tulo ka adlawng kombensiyon? Daghan ang makadisturbo sa atong pagpaminaw panahon sa dagkong kombensiyon, busa gikinahanglan ang labawng paningkamot aron makapamati sa programa. Kay ang mga sesyon mas taas kay sa mga tigom sa kongregasyon, gikinahanglan ang mas taas nga konsentrasyon. Gawas pa, ang usa tingali kapoyon tungod sa biyahe ug ubang hinungdan. Unsay makatabang nato sa pagpabiling atentibo aron kita makapamati ug makakat-on?—Deut. 31:12.
2. Sa unsang paagi nato maandam ang atong kasingkasing alang sa programa sa kombensiyon?
2 Una Pa sa Kombensiyon: Diha sa atong opisyal nga Web site nga www.pr418.com/ceb makita ang programa sa kombensiyon, nga naglakip sa mga ulohan sa tanang pakigpulong ug usa o duha ka pangunang teksto alang sa matag ulohan. Kon duna kitay access sa Internet, ang pagsusi niini makatabang sa pag-andam sa atong kasingkasing sa pagahisgotan sa kombensiyon. (Esd. 7:10) Panahon sa inyong Pamilyahanong Pagsimba, mahimo ba ninyong hisgotan ang programa sa kombensiyon aron kamo maghinamhinam sa pagtambong niini?
3. Unsay makatabang nato sa pagpamati pag-ayo?
3 Panahon sa Programa: Kon posible, adto na sa CR sa dili pa mosugod ang sesyon. Patya ang imong cellphone aron dili ka madisturbo sa mga tawag ug text o matental sa pag-text panahon sa sesyon. Kon kinahanglang i-on ang imong cellphone, i-set kini nga dili makadisturbo sa uban engkasog dunay motawag. Kon mogamit kag electronic tablet panahon sa sesyon, paneguroa nga dili kini makabalda sa uban. Likayi ang pagkaon o pag-inom panahon sa sesyon. (Eccl. 3:1) Ipokus ang imong panan-aw sa mamumulong. Kon may tekstong basahon, sundi kana sa imong Bibliya. Pagsulat ug mugbong nota.
4. Sa unsang paagi matabangan sa mga ginikanan ang ilang mga anak sa pagpamati aron makakat-on?
4 Gusto sab nato nga mamati ang atong mga anak aron sila makakat-on. Ang Proverbio 29:15 nag-ingon: “Ang usa ka bata nga pinasagdan maghatag ug kaulawan sa iyang inahan.” Busa maayo nga ang pamilya magtapad paglingkod aron mabantayan sa mga ginikanan ang ilang mga anak nga mamati pag-ayo sa programa ug dili mag-estoryahanay, mag-text, o maglakawlakaw. Bisag dili pa sila makasabot sa tanang gihisgotan, ang mga bata mabansay sa paglingkod sa hilom ug dili matulog.
5. Nganong mapuslanon ang pagrepaso sa programa, ug unsaon nato paghimo kini?
5 Pagkahuman sa Programa Kada Adlaw: Ayaw pagpulaw. Matulog ug sayo aron makapahulayg eksakto. Kon repasohon mo ang imong nadungog, mas mahinumdoman nimo kini. Busa mapuslanon nga maggahin ug pipila ka minutos kada gabii aron hisgotan sa pamilya ang programa. Kon moadto kag restawran uban sa mga higala, mahimo bang dad-on nimo ang imong nota ug ipaambit ang usa o duha ka punto nga nagustohan nimo? Dihang makapauli na mo sa inyong balay, mahimong hisgotan ninyo sa inyong Pamilyahanong Pagsimba kon sa unsang paagi inyong mapadapat ang inyong nakat-onan. Makagahin usab kamo ug panahon kada semana aron repasohon ang pipila ka bahin sa bag-ong publikasyon.
6. Igo na ba ang pagtambong lang sa kombensiyon? Ipatin-aw.
6 Makabenepisyo kita sa kombira kon kita mokaon ug ang atong gikaon mahilis. Susama usab niana ang espirituwal nga kombira nga idalit sa distritong kombensiyon. Hinaot pahimuslan nato ang matag sesyon pinaagi sa pagtambong, pagpamati pag-ayo, ug sa pagpadapat sa atong nakat-onan.