Pagtabang Niadtong Dili Pa Andam sa Librong Gitudlo sa Bibliya
1. Mainteres ba sa sinugdan ang tanan sa librong Gitudlo sa Bibliya? Ipatin-aw.
1 Aron mahimong magsisimba ni Jehova, ang usa kinahanglang makakat-on sa gitudlo sa Bibliya. Apan, ang pipila dili Kristohanon ug relihiyon ug dili motuo nga ang Bibliya maoy Pulong sa Diyos. Ang uban usab dili motuog Diyos ug walay pagtahod sa Bibliya. Unsay maayong gamiton sa pagtudlo niadtong sa sinugdan dili interesado sa librong Gitudlo sa Bibliya? Ang mosunod nga mga sugyot gibase sa komento sa mga magmamantala sa 20 ka nasod.
2. Kon may moingon nga siya dili motuog Diyos, unsay atong himoon, ug ngano?
2 Sa Dili Motuog Diyos: Kon ang usa moingon nga siya dili motuog Diyos, maayong pangutan-on siya kon ngano. Nagtuo ba siya sa ebolusyon? Nawad-an ba siyag pagtuo sa Diyos tungod sa kaylap nga inhustisya sa kalibotan o pagkasalingkapaw sa relihiyon? Gikan ba siya sa usa ka nasod nga wala idasig ang pagtuo sa Diyos? Tingali dili niya ilimod nga dunay Diyos, apan siya dili motuo Kaniya. Daghang magmamantala miingon nga posibleng motubag ang tawo kon pangutan-og, “Kana bay imong pagbati sukad pa sa una?” Pamati ug ayaw pagsagbat. Dihang masabtan nato kon nganong ang maong tawo dili motuog Diyos, kini makatabang kanato kon unsaon siya pagtubag ug unsang publikasyon ang itanyag.—Prov. 18:13.
3. Sa unsang paagi nato ipakita ang pagtahod sa tawo ug sa iyang tinuohan?
3 Dihang motubag, pag-amping nga basin mobati siya nga imong gisupak ang iyang opinyon. Kini ang sugyot gikan sa United States: “Importante kaayong tahoron ang kagawasan sa matag usa kon unsay ilang tuohan. Imbes makigdebate, mas maayong mopatunghag mga pangutana nga makatabang kaniya sa pagkab-ot ug kaugalingong konklusyon.” Human mamati sa tubag sa tagbalay, usa ka nagapanawng magtatan-aw sagad moingon, “Nahunahunaan ba usab nimo kini?”
4. Unsaon nato pagtabang ang mga Budhista?
4 Ang mga Budhista dili motuog Diyos. Sa pagsangyaw kanila, gamiton sa pipila ka magmamantala sa Britain ang brosyur nga Lasting Peace and Happiness—How to Find Them. Human matagad ang introduksiyon, hisgotan nila ang seksiyong “Is There Really a Most High Creator?” ug dayon ang seksiyong “A Guidebook for the Blessing of All Mankind.” Human niini, mahimo nang ipakita ang librong Gitudlo sa Bibliya ug ingnon ang tagbalay, “Bisag dili ka motuog Diyos, ang pagtuon sa Bibliya makatabang kay daghan kinig praktikal nga tambag.” Usa ka payunir sa United States nga nag-alagad sa Chinese nga teritoryo miingon: “Sa among teritoryo, daghan ang ganahang mobasa. Gani, mabasa na nila ang tibuok basahon ayha pa mi makabalik. Pero lagmit wala silay ideya kon unsay Bible study. Busa tanyagan ko silag brosyur nga Maayong Balita sa unang pagduaw kay gidisenyo kini nga magdasig ug panaghisgot.” Sa Chinese nga sirkito sa United States, usa ka magtatan-aw sa sirkito miingon nga posibleng magamit ang Gitudlo sa Bibliya sa unang pagduaw. Pero, mas maayong sugdan ang pagtuon sa kapitulo 2, nga nagpatin-aw bahin sa Bibliya, imbes sa kapitulo 1, nga naghisgot bahin sa Diyos.
5. Nganong gikinahanglan ang pailob?
5 Nagkinahanglag panahon aron maugmad ang pagtuo sa Diyos, busa hinungdanon ang pailob. Sa una natong pakighisgot, tingali dili nato makombinsir ang tawo nga dunay Maglalalang. Pero ngadtongadto lagmit mouyon siya sa posibilidad nga dunay Maglalalang, o kaha mosulti nga nasabtan na niya kon nganong ang uban nakakab-ot sa maong konklusyon.
6. Nganong ang pipila lagmit dili interesado sa Bibliya?
6 Sa Dili Interesado o Walay Pagsalig sa Bibliya: Ang usa nga motuo nga lagmit dunay Diyos sagad dili interesado sa gitudlo sa Bibliya kay siya dili motuo nga kini Pulong sa Diyos. Tingali nagpuyo siya sa dili-Kristohanong nasod ug nag-isip sa Bibliya nga para lang sa Kakristiyanohan. O kaha nagpuyo sa usa ka nasod nga nag-angkong Kristohanon apan dili interesado sa relihiyon, ug lagmit siya nagtuo nga ang Bibliya dili makahatag kaniyag kaayohan. Unsay atong himoon aron siya mainteres sa Bibliya ug ngadtongadto modawat ug pagtuon gamit ang librong Gitudlo sa Bibliya?
7. Unsay maayong paagi aron mapukaw ang interes sa tawo sa Bibliya?
7 Ang sangang buhatan sa Greece misulat: “Ang kinamaayohang paagi aron tabangan kadtong dili interesado sa Bibliya mao ang pagbukas sa Bibliya ug pagpakita sa unod niini. Namatikdan sa daghang magmamantala nga mas dakog epekto ang mensahe sa Bibliya diha sa kasingkasing sa tawo kay sa bisan unsang pulong nga ilang isulti. (Heb. 4:12) Tungod sa pagkakita sa ngalan sa Diyos diha sa Bibliya, daghan ang nainteres sa pagsusi niini.” Ang sangang buhatan sa India misulat: “Ang kamatuoran bahin sa kinabuhi ug kamatayon makapadani gayod sa daghang Hindu—ingon man usab ang saad sa Bibliya nga usa ka kalibotan diin wala nay caste discrimination (diskriminasyon sa kahimtang diha sa katilingban).” Ang paghisgot sa mga problema nga gikabalak-an sa mga tawo sagad magbukas ug kahigayonan nga ipakita diha sa Bibliya kon unsaon kana pagsulbad sa Gingharian sa Diyos.
8. Unsay atong isulti sa usa nga negatibog panglantaw sa Bibliya tungod sa Kakristiyanohan?
8 Kon ang usa negatibog panglantaw sa Bibliya tungod sa Kakristiyanohan, mahimong sultihan siya nga gidaot sa Kakristiyanohan ang Bibliya ug gituis ang mga pagtulon-an niini. Ang sangang buhatan sa India misulat: “Usahay, ipatin-aw namo sa mga tawo nga ang mga simbahan dili maoy sinaligan sa Bibliya.” Sila nag-ingon nga ang mga Hindu sagad ganahan sa bahin 4 sa brosyur nga Unsa ang Katuyoan sa Kinabuhi? Sa Unsang Paagi Makaplagan Nimo Kini?, nga nagpatin-aw kon sa unsang paagi gituis ug gidaot sa mga simbahan ang Pulong sa Diyos. Ang usa ka payunir sa Brazil moingon sa tagbalay: “Nganong dili susihog dugang ang mensahe sa Bibliya? Daghan ang naghimo niini uban ang bukas nga hunahuna, nga dili obligado nga magpasakop sa bisan unsang relihiyon. Mahibulong ka tingali sa imong makat-onan.”
9. Nganong dili mosurender kon sa sinugdan ang usa dili interesado sa gitudlo sa Bibliya?
9 Si Jehova motan-aw sa kasingkasing sa matag indibiduwal. (1 Sam. 16:7; Prov. 21:2) Iyang kabigon sa matuod nga pagsimba kadtong matarong ug kasingkasing. (Juan 6:44) Daghan kanila wala sukad matudloi bahin sa Diyos o wala gayod makakitag Bibliya. Pinaagi sa atong pagsangyaw, sila mahatagag higayon nga ‘maluwas ug makadangat sa tukmang kahibalo sa kamatuoran.’ (1 Tim. 2:4) Busa, kon ang pipila sa sinugdan dili interesado sa gitudlo sa Bibliya, ayawg surender! Gamita ang usa sa mga publikasyon nga makapukaw sa ilang interes. Ngadtongadto, ang panaghisgot mahimo na nimong ibalhin sa panguna natong gigamit sa pag-Bible study, ang librong Unsay Tinuod nga Gitudlo sa Bibliya?
[Kahon sa panid 4]
Kon ang tagbalay dili motuo sa Bibliya, sulayi kini:
• Gamita ang kapitulo 17 ug 18 sa librong Life—How Did It Get Here? By Evolution or by Creation?
• Sa Hindu, gamita ang brosyur nga Why Should We Worship God in Love and Truth?
• Sa Hudiyo, gamita ang brosyur nga Will There Ever Be a World Without War?, panid 3-11.
• Hisgoti ang mga kaayohan sa pagsunod sa mga prinsipyo sa Bibliya. Aron ipakita ang praktikal nga mga tambag sa Bibliya, mahimong gamiton ang:
Serye sa Pagmata! nga “Tabang Alang sa Pamilya”
Video nga The Bible—Its Power in Your Life
Mga brosyur nga Maayong Balita Gikan sa Diyos!, leksiyon 9 ug 11; Usa ka Basahon Alang sa Tanang Tawo, panid 22-26; ug Makapatagbaw nga Kinabuhi—Kon Unsaon Pag-angkon Niini, bahin 2
Sa Budhista, gamita ang brosyur nga The Pathway to Peace and Happiness, panid 3-7.
Sa Muslim, gamita ang brosyur nga Tinuod nga Pagtuo—Imong Yawi sa Malipayong Kinabuhi, seksiyon 3.
Kon ang mga tawo sa teritoryo walay respeto sa Bibliya, mas maayong dili isulti kon diin gikutlo ang maalamong mga pulong nga imong gihisgotan. Mahimo nimong isulti kini human sa pipila ka beses nga pagduaw.
• Ipatin-aw kon sa unsang paagi natuman ang mga tagna sa Bibliya. Mga publikasyon nga magamit:
Video nga The Bible—Accurate History, Reliable Prophecy
Brosyur nga Usa ka Basahon Alang sa Tanang Tawo, panid 27-29
• Ibalhin sa Gitudlo sa Bibliya sa dihang ang tawo mangutana bahin sa gitudlo sa Bibliya.
[Kahon sa panid 5]
Kon ang tagbalay moingon: “Dili ko motuog Diyos,” mahimo kang moingon:
• “Mahimo ba nakong hisgotan kadiyot kon unsay nakapakombinsir nako nga adunay Maglalalang?” Dayon isulti ang pipila ka punto sa Nangatarongan, panid 309-313, o pakigsabot nga mobalik aron dalhan siyag publikasyon nga nagustohan nimo.
• “Apan kon dunay Diyos, unsang matanga siya nga pagka-Diyos ang imong gusto?” Kadaghanan motubag nga sila madani sa usa ka Diyos sa hustisya, mahigugmaon, maluluy-on, ug walay pinalabi. Ipakita sa Bibliya nga ang Diyos duna nianang mga hiyasa. (Mahimo ganing gamiton ang kapitulo 1 sa Gitudlo sa Bibliya, ug sugdan sa parapo 6.)
Kon ang tagbalay moingon: “Dili ko motuog Bibliya,” mahimo kang moingon:
• “Kana usab ang giingon sa uban. Sila nagtuo nga ang Bibliya supak sa siyensiya o ang mga prinsipyo niini dili praktikal. Ikaw, nakabasa ka na bag Bibliya? [Patubaga. Unya ipakita ang introduksiyon sa panid 3 sa brosyur nga Usa ka Basahon Alang sa Tanang Tawo, ug itanyag kini.] Daghan ang dili motuo sa Bibliya kay gidaot sa relihiyon ang mga pagtulon-an niini. Sa sunod, akong hisgotan ang usa ka pananglitan dinhi sa panid 4 ug 5.”
• “Daghan ang parehas nimog hunahuna. Mahimo bang hisgotan nako kon nganong nakadayeg ko sa Bibliya? [Basaha ang Job 26:7 o Isaias 40:22, nga nagpakitang ang Bibliya tukma kon bahin sa siyensiya.] Ang Bibliya may maalamong mga tambag usab nga makatabang sa pamilya. Hisgotan nako sa sunod ang usa ka pananglitan.”
• “Salamat sa imong pagsulti sa tinuod. Kon may gisulat ang Diyos nga basahon para sa katawhan, sa imong hunahuna, unsay unod niana?” Dayon ipakita ang usa ka teksto sa Bibliya nga uyon sa iyang komento.