Anomukich Fän Än Jiowa Nemenem
“Wewen ach echeni Kot pwe sia aleasochisi an kewe allük. Nge an kewe allük resap weires ngenikich.”—1 JON 5:3.
1, 2. (a) Pwata chommong aramas ra oput ar repwe nom fän nemenien emön ikenäi? (b) Iir kewe mi ü ngeni nemenem ra wesewesen ngaselo? Aweweei mwo.
ARAMAS ikenäi rese sani ewe fos “nemenem.” Chommong rese efich ar repwe nom fän nemenien emön. Aramas mi mochen pwisin nemenemeniir ra eäni ei sokkun ekiek, “Esor emön epwe ereniei met upwe föri.” Iwe nge, ena sokkun aramas ra wesewesen pwisin nemenemeniir? Aapwi! Chommong ra chök äkkäppirü napanapen aramas mi pwomweni “pwomen fanüfan.” (Rom 12:2) Ra ekieki pwe ra ngaselo, nge me ren alon ewe aposel Paul, “püsin iir ra nom fän nemenien ekkewe föför epwe afeiengauer.” (2 Pit. 2:19) Ra feffetäl “lon pungun ei fonufan, lon pungun i mi samoluni manamanen asapwal,” Setan ewe Tefil.—Ef. 2:2.
2 Emön sou makkei puk a sikäsini: “Usap fang ngeni semei kewe me inei are emön patere are emön sounpetäk are emön nouwisen lamalamen Hindu are ewe Paipel an epwe wisen äiti ngeniei minne mi enlet.” Pwüngün, ekkoch ra äeämwäälli ar nemenem woon aramas me ese fich ach sipwe älleäsochisiir. Nge itä epwe ataweei ach osukosuk ika sisap fokkun etiwa kapasen emmwen? Ika sipwe nengeni ekkewe itelapen pworaus lon simpung, a pölü ena kapas eis nge a fokkun alolilen. A fokkun solap pwe lon ei fansoun aramas ra fokkun osupwang ren emmwen, nge lape ngeni aramas rese mochen etiwa kapasen emmwen.
Ach Ekiek Ussun Nemenem
3. Ifa ussun ekkewe popun Chon Kraist ra pwäralo pwe rese chök älleäsochisi ekkewe sou nemenem, ese pwal lifilifil met ra ereniir?
3 Kich chon Kraist, sia sokkolo seni lape ngeni chon fönüfan. Nge sap minne sia chök älleäsochisi ese pwal lifilifil met emön a erenikich. Aapwi, fän ekkoch, sisap fokkun föri letipen ekkoch inaamwo ika ra wis tekia. A pwal ina ussun ekkewe Chon Kraist lon fansoun ekkewe aposel. Awewe chök, lupwen ewe samol-fel mi lapalap me pwal ekkewe sou kapwüng ra allükü ngeni ekkewe aposel pwe repwe ükütiü le afalafal, rese föri, rese pwal niuokkus. Rese likitalo minne mi pwüng fän iten ar repwe älleäsochisi ekkewe sou nemenem.—Älleäni Fofor 5:27-29.
4. Ikkefa ekkoch pworaus seni ewe Tesin Ipru ra pwäralo pwe chommong nöün Kot kewe aramas rese föri minne aramas ra mochen repwe föri?
4 Chommong nöün Kot kewe chon angang mi manau mwen Jises ra pwal tipeppos. Awewe chök, Moses “esap mochen an epwe iteni nöün nöün ewe king föpwül lupwen an mwän. A filätä an epwe eti nöün Kot kewe aramas le riaföü” inaamwo ika epwe efisi “än ewe king song.” (Ipru 11:24, 25, 27) Josef ese etiwa än pwülüwen Potifar mochen lisou ngeni, nge neminewe a wor an manaman le liwini ngeni me efeiengaüa. (Ken. 39:7-9) Taniel “a amolätä letipan pwe esap alimengaua ren enen ewe king mongö mi anö me ünüman wain,” inaamwo ika ewe meilapen chon tümünü imwen ewe king esap tipeeü ngeni. (Tan. 1:8-14) Ekkena pworaus ra pwäratä pwe lon uruwoon nöün Kot kewe aramas, ra tipeppos fän iten minne mi pwüng, ese lifilifil met pwününgaüen. Rese fangetä fän iten ar repwe chök küna chen seni aramas; iwe, sisap pwal fangetä.
5. A ifa ussun ach ekiek ussun nemenem a sokko seni än chon fönüfan ekiek?
5 Ach üppos ese löllö ngeni lükümach; sise pwal ussun chök ekkoch ra ü ngeni nemenem pwe repwe pwäralo pwe rese tipeeü ngeni ekkewe sou nemenem. Iwe nge, sia tipeppos le anomukich fän än Jiowa nemenem lap seni än aramas nemenem. Lupwen än aramas allük a ü ngeni än Kot allük, esap weires ach sipwe filatä met sipwe föri. Ussun chök ekkewe aposel, sipwe älleäsochisi Kot lap seni aramas.
6. Pwata a mürinnö ach sipwe älleäsochisi än Jiowa kewe allük fansoun meinisin?
6 Met a älisikich le etiwa än Kot nemenem wooch? Sia tipeeü ngeni minne a mak lon Än Salomon Fos 3:5, 6: “Kopwe lükü ewe Samol mi Lapalap ren unusen lelukom, nge kosap lükülükü püsin om sile. Kopwe chechemeni i won meinisin mine ka föri, nge i epwe aiti ngonuk ewe al mi pwüng.” Sia lükü pwe ese lifilifil met Kot a awisa ngenikich, nge epwe chök sopwöch. (Älleäni Tuteronomi 10:12, 13.) Enlet, a iei ussun än Jiowa awewe ngeni chon Israel: “Ua aiti ngonuk mine kopwe feioch ren, ua pwal emweni ngonuk ewe al kopwe fetal won.” A pwal apasa: “Amwo kopwe auselinga ai kewe alluk! Murin om kinamwe epwe wewe ngeni eu chanpupu, nge om pwung epwe wewe ngeni nomongun lematau.” (Ais. 48:17, 18) Sia lükülük woon an kapas. Sia lükü pwe sipwe sopwöch fansoun meinisin ika sipwe älleäsochisi än Kot kewe allük.
7. Met sipwe föri ika sise unusen weweiti eü allük mi mak lon Kapasen Kot?
7 Sipwe etiwa än Jiowa nemenem wooch me älleäsochisi i inaamwo ika sise unusen weweiti popun an a mak eü allük lon an we Kapas. Sap minne sia lükülüküolo, nge sia chök lükülük woon Jiowa. Sia nükünüköch lon letipach pwe Jiowa a silei minne mi mürinnö ngenikich. Ach älleäsochis a pwal pwäralo ach tong, pun ewe aposel Jon a makkei: “Iei weween ewe tongen Kot, pwe sipwe alleasochisi an kewe alluk.” (1 Jon 5:3) Nge mei pwal wor eü kinikinin ach älleäsochis sipwe pwal äfänni.
Eörenalo ach Tufichin Esilla
8. A ifa ussun ach eörenalo ach tufichin “esinna lefilen minne mi pwüng me minne mi mwääl” a pacheri ach etiwa än Jiowa nemenikich?
8 Ewe Paipel a erenikich pwe sipwe käeö pwe sipwe “tufichin alefila lefilen mine a öch me mine a ngau.” (Ipru 5:14) Ina popun, sisap chök teriterilo nge sipwe akkom ekiekifichi ussun än Kot kewe allük. Sia mochen sipwe tufichin “esinna lefilen minne mi pwung me minne mi mwääl” pokiten sia silei än Kot kewe allük. Sia mochen küna tipatchemen än Jiowa kewe al, pwe sipwe tongeni apasa ussun chök ewe sou makkei kölfel: “Om we alluk a nonnom lon letipei.”—Kölf. 40:8.
9. Ifa ussun sipwe etipeeüfengenni mwelien letipach ngeni än Jiowa kewe allük, iwe, pwata a lamot ach sipwe föri?
9 Ika sipwe aücheaani än Kot kewe allük ussun chök ewe sou makkei kölfel a föri, sipwe ekilonei minne sia älleäni lon Paipel. Awewe chök, lupwen sia käeö ussun eü allükün Jiowa, sipwe eis: ‘Pwata ei allük a pwäralo tipatchem? Pwata upwe sopwöch ika upwe älleäsochisi? Ifa ussun chokkewe mi tunalo ei kapasen fön seni Kot ra sopwongaü?’ Ewin mwelien letipach a tipeeü ngeni alen Jiowa kewe, ewin ach kewe kefil repwe tipeeü ngeni letipan. Sipwe “achocho le kütta met letipen [Jiowa],” mwirin, sipwe tongeni älleäsochisi. (Ef. 5:17) Nge fän ekkoch, esap mecheres.
Setan A Mochen Atai än Aramas Nonnom Fän Än Kot Nemenem
10. Ifa ussun Setan a sotun atai än aramas lükülük woon än Kot nemenem?
10 Seni chök me loom, Setan a mochen atai än aramas lükülük woon än Kot nemenem. An mochen pwisin ütä lon an nemenem a pwäpwälo lon chommong mettoch. Awewe chök, ekieki ussun än aramas süfölüngaüeiti än Kot we kokkotun pwüpwülü. Ekkoch ra chök nonnomfengen nge rese wesewesen pwüpwülü, nge ekkoch ra kütta ifa ussun repwe tongeni pöütalo pwülüwer. Eli ekkena esin aramas repwe tipeeü ngeni alon emön fefin sou pwomweni lon kachito, a apasa: “Ese fokkun tufich ach sipwe pwülüweni emön chök.” A pwal erä: “Use silei emön mi tuppwöl ngeni pwülüwan we are mochen an epwe tuppwöl.” Pwal emön mwän sou pwomweni lon kachito a ekieki ussun an ese likiitü le pwüpwülü, iwe, a apasa: “Use silei ika mei tufich ngeni aramas ar repwe nonnom ren chök emön pwülüwer tori mälo.” Epwe öch ach sipwe pwisin eisinikich, ‘Ngang üa etiwa än Jiowa emmwen ussun pwüpwülü, are ekiekin chon fönüfan a fen aingaüa ai ekiek pwe rüüemön repwe pwüpwülü tori mälo?’
11, 12. (a) Pwata epwe weires än ekkewe säräfö etiwa än Jiowa nemenem? (b) Apworausa pworausen emön a küna pwününgaüen an tunalo än Jiowa kewe allük me kapasen emmwen.
11 En emön säräfö lon än Jiowa mwicheich? Ika ina, Setan epwe achocho le aingaüa om ekiek ussun än Jiowa nemenem woom. “Ekkewe mochenia-ingauen aluwol” fengen me etipetipaen piloom kewe repwe tongeni ammeef ngonuk pwe än Kot kewe allük ra kon weires. (2 Tim. 2:22) Kosap mwut ngeni an epwe fis. Achocho le mirititi tipatchemen än Kot kewe allük. Awewe chök, ewe Paipel a erenuk pwe kopwe “su seni lisou.” (1 Kor. 6:18) Kopwe pwal eisinuk ekkeei kapas eis: ‘Pwata ei allük a pwäralo tipatchem? Ifa ussun upwe küna feiöch seni ai älleäsochisi?’ Eli ka fen silei ekkoch ra tunalo än Kot kapasen fön, iwe mwirin, ra küna liwiningaüan. Ra wesewesen pwapwa iei? Kapas eis, manauer iei a mürinnö seni manauer atun ra fiti än Jiowa we mwicheich? Ra itä wesewesen küna ewe kiien pwapwa, nge ekkewe ekkoch nöün Kot chon angang rese küna?—Älleäni Aisea 65:14.
12 Ekieki ussun met emön Chon Kraist itan Sharon a apasa me loom: “Pokiten üa tunalo än Jiowa allük, a üriei ewe semmwen mi efisi mälo itan AIDS. Fän chommong, üa lesöküriiti ekkewe ierin pwapwa üa eäni lon ai angang ngeni Jiowa.” A esilla pwe a tiparoch an a atai än Jiowa kewe allük nge itä ürürün epwe fokkun menniniitiir. Än Jiowa kewe allük ra kawor pwe repwe tümünükich. Sharon a mälo fisu chök wiik mwirin an a makkei ekkena fos asan. A pwäpwälo ren watteen feiengaüan pwe esor och mettoch mi mürinnö Setan a tongeni fang ngeni iir kewe mi pacheri ei otot mi ngaü. Setan, i “semen kapas chofona,” iwe, a föri chommong pwon, nge ese apwönüretä, ussun chök ese apwönüetä an we pwon ngeni If. (Jon 8:44) Pwüngün, fansoun meinisin epwe chök mürinnö ach sipwe anomukich fän än Jiowa nemenem.
Tümünü seni Ekiekin Pwisin Nemenikich
13. Lon met sokkun napanap sipwe tümünükich seni ewe ekiekin pwisin nemenikich?
13 Ika sipwe etiwa än Jiowa nemenem wooch, a lamot sipwe tümünükich seni ach mochen pwisin nemenikich. Lamalam tekia epwe tongeni efisi ach meefi pwe esor lamoten emmwen ngenikich. Awewe chök, eli sisap etiwa kapasen fön seni ekkewe sou emmwen me lein nöün Kot kewe aramas. Kot a akkota pwe ewe chon angang mi tuppwöl me tipatchem epwe awora möngöön ngün lon fansoun mi fich. (Mt. 24:45-47) Fän tipetekison, sipwe esilla pwe a ina ussun än Jiowa tüttümünü nöün kewe aramas ikenäi. Kopwe äkkäppirü ekkewe aposel mi tuppwöl. Lupwen ekkoch me lein ekkewe chon käeö ra turukapelo, Jises a eisini ekkewe aposel: “Ifa usun, ami ouse mochen pwal feilo?” Piter a pölüweni: “Samol, io am aupwele feilo ren? Nge mi chok wor reom ekkewe kapasen manau esemuch.”—Jon 6:66-68.
14, 15. Pwata sipwe tipetekison le älleäsochisi än Paipel kapasen fön?
14 Ach anomukich fän än Jiowa nemenem a wewe ngeni ach älleäsochisi ekkewe kapasen fön lon Paipel. Awewe chök, ewe chon angang mi tuppwöl me tipatchem a pesekich ach sipwe “mamasa o forfichi.” (1 Tes. 5:6) A fokkun fich ena kapasen fön lon ekkeei ränin le sopwoloon, atun chommong ra “tongei pwisin ir, [me ra] tongei moni.” (2 Tim. 3:1, 2) Epwe pwal kküükich ena esin napanapen aramas ikenäi? Ewer. Ika sipwe chök achocho ngeni ekkewe mettochun fönüfan, awewe chök, moni me pisek, sipwe tongeni okkonnut lon pekin ngün, nge sisap tüttümünü ach chiechi ngeni Kot. (Luk 12:16-21) Ina minne, sipwe tipatchem ika sipwe etiwa än Paipel kapasen fön me tti senikich än aramas ekiekin apwapwai pwisin iir chök, ewe a chöüfetäl lon än Setan otot!—1 Jon 2:16.
15 Ekkewe elter ra wisen ineti ngeni chon ekkewe mwichefel ewe möngöön ngün seni ewe chon angang mi tuppwöl me tipatchem. Ewe Paipel a pesekich: “Iwe, oupwe alleasochisi ekkewe chon emmwenikemi, o nonnom fan nemenier; pun ra mamasa ngunumi usun chok ir ekkewe repwe pwarata usun ar angang. Iwe, repwe fori ar angang ren pwapwa, sap ren letipechou, pun are ra letipechou ren ar angang, ami ousap feioch ren.” (Ipru 13:17) A itä wewe ngeni pwe ekkewe elter ra unusöch are resap tongeni mwäällilo? Aapwi! Kot a küna ar kewe apwangapwang lap seni minne aramas ra küna. Iwe nge, Kot a mochen sipwe älleäsochisiir. Inaamwo ika rese unusöch, nge ach tipemecheres le älleäsochisi ekkewe elter epwe pwäratä pwe sia etiwa än Jiowa nemenem wooch.
Lamoten Tipetekison
16. Ifa ussun sipwe pwäri ach süföliti Jises, pun i Möküren ewe mwichefelin Chon Kraist?
16 Fansoun meinisin sipwe chechchemeni pwe Jises, i wesewesen Möküren ewe mwichefel. (Kol. 1:18) Ina eü popun sipwe tipetekison me älleäsochisi ewe kapasen emmwen seni ekkewe elter mi kefilitä, me sipwe “asamoluur fän watteen süföl me chen.” (1 Tes. 5:12, 13) Pwüngün, ekkewe elter ra tongeni pwäratä pwe ra pwal älleäsochis ren ar esile ngeni chon ewe mwichefel än Kot kapas, nge esap pwisin ekiekiir. Paul a ereniir: “Oupwe chök apwönüetä mine a mak,” nge resap apöchökkülatä pwisin ar ekiek.—1 Kor. 4:6.
17. Pwata a efeiengaü tipetekia?
17 Chon ewe mwichefel meinisin repwe tümünü pwe resap kükkütta pwisin iter. (SalF. 25:27) Eli, ina eü ssär ngeni emön chon käeö ewe aposel Jon a chuuri. Jon a makkei: “Tiotrefes, ätewe mi mochen an epwe nemenem, esap aüseling ngeni met üa apasa. Iei mine lupwen üpwe war, üpwe pwäratä meinisin mine a föri: ekewe mettoch mi fokun ingau a apasa usuch me an kapas chofona.” (3 Jon 9, 10) Mei wor eü lesen sipwe käeö seni ena pworaus. Ika sipwe küna och tipetekia lon pwisin kich, mei wor popun ach sipwe arosalo. Ewe Paipel a erenikich: “Lamalamtekia a akom mwen feiengau, nge tunosikesik a akom mwen än eman tur.” Iir kewe mi etiwa än Kot nemenem woor repwe tti seniir tipetekia, pun ika rese föri, repwe sopwongaü.—SalF. 11:2; 16:18.
18. Met epwe älisikich le etiwa än Jiowa nemenem?
18 Ewer, achocho le tti sonuk än chon fönüfan mochen pwisin nemenemeniir, nge kopwe etiwa än Jiowa nemenem woom. Fän ekkoch, ekilonei om angang ngeni Jiowa fän kilisou, pun ina eü wis mi fokkun aüchea. Om nonnom lein nöün Kot kewe aramas a ännetatä pwe än Kot we ngün mi fel a emmwenuk. (Jon 6:44) Kesap aücheangaüa om üöch mwen mesen Kot. Lon kinikinin manauom meinisin, kopwe pwäratä pwe ka pöütalo ekiekin pwisin nemeni manauom me ka etiwa än Jiowa nemenem.
Ka Chechchemeni?
• Met epwe kapachelong lon ach etiwa än Jiowa nemenem wooch?
• Ifa ussun ach käeö le esilla lefilen minne mi pwüng me minne mi mwääl a riri ngeni ach etiwa än Jiowa nemenem?
• Ifa ussun Setan a sotun atai än aramas lükülük woon än Jiowa nemenem?
• Pwata tipetekison a lamot lon ach etiwa än Jiowa nemenem?
[Sasing lón pekin taropwe 21]
Epwe pwälo tipatchem ika sipwe älleäsochisi än Kot kewe kapasen emmwen
[Sasing lón pekin taropwe 23]
“Sipwe älleäsochisi Kot lap seni aramas”