Pwata A Kon Mwoch Ach Fansoun?

FANSOUN. Eli epwe weires ach sipwe aweweiochu ena kapas, nge sia wesewesen silei pwe ese kan naf ach fansoun. Sia pwal silei pwe ach fansoun a muttir lulo. A enlet pwe fan chommong sia kan apasa pwe “A ussun ita ach fansoun a chok asilo.”

Iwe nge, a ffat pwe a enlet minne ewe poet seni England itan Austin Dobson a makkei lon 1877: “Ka era pwe fansoun a kan rosolo? Aapwi, esap ina! Nge, Fansoun a chok nomotiu, iwe, kich sia kan morolo.” Dobson a malo lon 1921, iwe, a fen lulo 80 ier, nge ewe mettoch fansoun a chok sopwosopwolo.

Fansoun mi Wenewenen Watte

Iei alon Paipel ussun ewe Chon Fforata aramas: “Mwen fansoun ekkewe chuuk a pwata, pwal mwen fansoun om forata fonufan me masouan meinisin, seni chok lom, fefeito, o pwal feilfeilo, en chok mi Kot.” (Kol Fel 90:2) Nge iei ititin me ren The New Jerusalem Bible: “Seni fansoun esemuch tori fansoun esemuch en Kot.” Iwe, ewe mettoch fansoun epwe sopwosopwolo ukuukun chok sopwosopwoloon manauen Kot​—tori feilfeilo chok!

A nom ren Kot fansoun esemuch, nge aramas ra sokko seni i pun a iei ussun aramas: “Pun ranin manauem meinisin ra chok nom lon om song, ierin manauem kewe ra sopelo usun chok eu ngasangas. Ekkewe ierin am manau mi fiik, are, pokiten chok am pochokkul, walik; nge am ier meinisin ra ur ren angang o riaffou; ra muttir feilo, o am aua asilo.”​—Kol Fel 90:9, 10.

Pwata manauen aramas a kon mwoch, nge Paipel a aiti ngenikich pwe Kot a akkota pwe aramas repwe manau tori feilfeilo chok? (Keneses 1:27, 28; Kol Fel 37:29) Ika Kot a akkota pwe manauen aramas esap much, pwata ranin manauer a kan kis seni 30,000 ran? Pwata a kon mwoch ewe fansoun mi nom ren aramas? Io are met a efisata ena mettoch mi aletipechou? Paipel a poluenochu ekkena kapas eis.a

Kisikisiloon Fansoun

Ir mi chinnap repwe anneta pwe lon ekkewe ier ra lo, nonnomun aramas a fen muttirita. Emon soumak, Dr. Sybille Fritsch, a makkei pwe lon ekkewe 200 ier ra lo, awaan angang lon eu wiik a kisitiu seni 80 ngeni 38, “iwe nge, ese aukatiu ach ngunungun.” Neminnewe a affata pwe “Esor fansoun; fansoun a auchea ussun moni; watteen osupwangen fansoun a ussun ach weiresin ngasangas; manauach a kon ur ren osukosuk.”

Ekkewe minefoon pisek aramas ra fforata a fen suuki ekkewe sokkun aal me tufich ese nom ren chon ekkewe tappin aramas lom. Inaamwo ika a fen lapalo an aramas tufichin ffori chommong mettoch, nge a pwal lapalo ar mangau pun a kon kisikis ar fansoun fan iten ar repwe ffori ekkena mettoch. Iei lon chommong fonu, ewe kulok a kan nemeni aramas, pwe ra kan osukosuk ren chommong mettoch. Papa epwe lo angang kulok fisu lesossor, Mama epwe alisi ekkewe kukkun pwe repwe tori ar sukul kulok walu esopw lesossor, Papa Chinnap epwe lo safei minich ruwe mwen kulok engol lesossor, me oukich meinisin sipwe mmolneta fan iten eu mwich mi lamot, nge epwe poputa kulok fisu esopw lekuniol. Pokiten a wor chommong mettoch aramas repwe ffori, ese lien wor fansoun fan iten kunou are asoso. Iwe, sia kan ngunungun ussun chommongun ach kkewe osukosuk me weiresin nonnomuch iteiten ran.

Sap Minne Kich Chok Sia Eani Ekis Fansoun

Pokiten ewe rau mi ngau seni ewe Chon Appolua Kot, Setan ewe Tefil, a mwochomwocholo manauen aramas, nge pwal i a kuna pwunungauen an ffofforingau. (Alollo ngeni Kalesia 6:7, 8.) Pwarata 12:12 a kapas ussun poputaan ewe Muun Messaia lon lang, iwe, a awora apilukoch ngenikich pwe iei alon: “Iei minne, oupwe pwapwa, ami kena lang, o pwal ami kena mi nonnom lon ir! Nge riaffou ngenikemi, fonufan o matau, pun ewe Tefil a fen feitiu remi lon an song mi lap, pun a silei pwe an we fansoun a chok mochomoch.”

Me ren tettelin fansoun mi lukuchar lon Paipel me pwonutaan an Paipel kkewe oesini, sia manau iei le sopwoloon ena “fansoun mochomoch.” Sia pwapwa pokiten ach silei pwe an Setan fansoun epwele unusen muchulo! Lupwen Setan esap chuen nom, aramas mi alleasochis repwe unusochulo, me repwe tufichin kuna ewe manau esemuch Jiowa a akkota fan asengesir me le poputaan. (Pwarata 21:1-4) Esap chuen wor nafangauen fansoun.

Kopwe tongeni ekieki ika met weween an aramas kuna manau esemuch​—manau tori feilfeilo chok? Kosap chuen letipechou ren ekkewe mettoch kese tongeni awesi me lom. Ika epwe lamot an epwe wor pwal och om fansoun, kopwe tongeni awesi om angang lesor, lon enan wiik, are lon enan ier​—enlet, epwe nom reom fansoun esemuch!

Aea Fan Mirit ewe Fansoun mi Nom Rech Iei

Pokiten an weweiti pwe a kauk an fansoun le nemeni aramas, Setan a kan sotuni le aosukosuka aramas pwe esap wor ar fansoun le auseling ngeni ewe poraus allimen an Kot we Muu, ewe mi fen uta. Ina minne, a lamot ach sipwe alleasochisi ei fon seni lang: “Oupwe fakkun nengenifichi usun ami fefetal, esap usun ekkewe aramas mi tiparoch, pwe usun ekkewe mi tipatchem. Oupwe achocho ngeni lon ei fansoun, pun ekkeei ran mi chok ingau. Ina minne, ousap puchulo, nge oupwe wewe ren meeta letipen ewe Samol.”​—Efisus 5:15-​17.

A ifa me watteen lamoten ach sipwe aea fan mirit ach fansoun ren ekkewe mettoch mi kon lamot nge sisap asolapa fan iten ekkewe mettoch resap tufichin atoto feioch mi nomottam! Sipwe ita amaarata ewe sokkun ekiek Moses a eani lupwen a tingorei Jiowa lon ekkeei kapas: “Kopwe aiti ngenikem minne am aupwe fori lon am keei ran, pwe am aupwe tongeni ani letip mi tipatchem.”​—Kol Fel 90:12.

A enlet pwe ikenai aramas meinisin ra kan osukosuk. Iwe nge, Chon Pwarata Jiowa ra peppeseiok pwe kopwe aea och om fansoun auchea ren om kopwe kaeo ussun an Kot kkewe alluk fan iten an aramas tufichin kuna manau esemuch fan nemenien an we Muu. Eli om kakkaeo Paipel eu awa iteiten wiik pwe kopwe “wewe ren meeta letipen ewe Samol,” epwe atufichi om kopwe kuna pwonutaan ekkeei kapas: “Su seni minne mi ingau, o forata minne mi murinno; iwe, kopwe nonnom feilfeilo chok. Ekkewe aramas mi pung repwe fonueni ewe fonu, o repwe nonnom lon, feilfeilo chok.”​—Kol Fel 37:27, 29.

[Pworous fan]