Julyu

Dhotedhene dhakosa Yezu vina dhaloga iyene, otaganyiha na matikiniho erileye iyene ohitagiha mowakwana-mwene dhubuwelo vina dhokosa dha Babe. (Jo. 14:9) Ninsunzavo eni na matikiniho akosile Yezu? Yezu na Babe anonikwela vaddiddi. Bali velaboni ya vati, Yezu ohakwela attu modhela olabihedha ewodhelo yaye ya okosa matikiniho wi àkamihedhe attu atabuwa. Nsaka dhahi alobwana eli ohona, ankuwa wi Yezu akamihedhe. (Mt. 20:​30-34) Yezu “ohaweddela thagaraga” vina ohavulumutxa. Mazu aba “ohaweddela thagaraga,” na elogelo ya Egregu entonya wi iyene wahikana supaje. Supaje eji enowoniha wi Yezu wannakwela attuya afiyedhaga wajiha attu ana dala vina wavulumutxa aliba maranya. (Mt. 15:32; Mk. 1:41) Nikane ebaribari wi Yehova, Mulugu “wanthebwa,” na Mwanaye anonikwela vaddiddi vina anokubanya aganonaga nitabuwaga. (Lk. 1:78; 1 Ped. 5:7) Nona awene anofuna vaddiddi ogomiha makattamiho annipatta! w23.04 3 ddima 4-5

Ninofwanyela vina okosa muli mwetemwene wi nirabele mubuwelo vina monelo wabure wa elabo eji ya Satana. Iyo nigamwengesaga vina nigamusunzaga Bibilia ninodhaliha muyubuweloni mwehu dhilobo dhapama vina dhofwanyelela. Odhowa mmatugumanoni vina odhowa mmabasani a olaleya enele onikamihedha ovibarela mwa dhubuwelo dhabure. Dhahene Yehova onele wakwanihedha dhipikireliye, kanarumele wi iyo nifwanyiwe manyengetto ahinwodhihu opemberha. (1 Kor. 10:​12, 13) Ninofwanyela olobela wi nidhowegevi nikalaga attu ororomeleya vamentoni va Yehova ttabwa-ttabwa masaka aba omariha. Yehova onfuna wi iyo ninfumburhele segedho dha mmurimani mwehu modhela nlobelo. (Masal. 62:8) Omutamalele vina omuttittimihe Yehova mudhidhi wotene sabwa ya dhilobo dhotedhene dhinkosiye. Omukumbirhe wi awukamihedhe oliba murima ogalaleyaga. Olobele okumbirhaga nikamihedho wi owodhe owanana makattamiho vina owodhe orabela yoweha-yowehavi. Kumuttiye muttu obe elobo-txilobo wuzuzumiha omulobelela Yehova. w23.05 7 ddima 17-18

Iyo nindowela nni omatugumanoni? Vamaromo, ninodhowa mmatugumanoni wila nimuttittimihe Yehova. (Masal. 26:12; 111:1) Mwaha mwina bwa olibihana muttu na mukwaye makamaka malabo aba ankalihu. (1 Tes. 5:11) Nigavenyiha nlada vina nivaha yowakula, ninokosa dhilobo esi. Mbwenyi nigafunaga ovaha dhowakula, txino ninodhaga okana makattamiho. Ninodhaga wova ovaha dhowakula. Obe nigaziveliwa ovaha dhowakula dhinjidhene mbwenyi kanintonyiwa. Ninawodhe dhavi owanana makattamiho aba? Murumiwi Paulo ohiloga wila awene ela ozuzumela “olibihana muttu na mukwaye.” Nona niganonelamo wi abali ena anodhaga olibiheya na yowakula eng’onovi envaha iyo, kaninove ovaha dhowakula dhehu. Vina masiki akala kaninatonyiwe dila dhotene dhinfunihu wi nakule, ninela wagalala sabwa ya oziwa wila abali ehu avaha dhowakula dhawa.—1 Ped. 3:8. w23.04 20 ddima 1-3

Mwene ohigwiha nlamulo naloga wi Ayuda atxedheliwe elabo yo Babilónia mwa vyaka 70 eyelele elabo yawa o Izrayel. (Ezd. 1:​2-4) Enowoneya-wene wi Yehova wali na awene. Sabwani akadda Babilónia kafurula attu atxedhani. (Iza. 14:​4, 17) Mwene wawa muswa wahirumela wi Ayuda eyelele owaniwawa nona Ayuda otene muttu-muttu wanfwanyela okosa yogana makamaka mwazambo wa ntakulu, akala agahikalavi mBabilónia obe agahimwala. Yogana eji kayali elobo yovevuwa. Ayuda enjene ahimala wuluvala nona oleddo oku ogaharutxa. Ayuda enjene abaliwe mBabilónia, elabo ejile awene ona ninga kuwaniwawa, yali elabo ya amambali awa. Ayuda ena ahirela elabo ejile yaweddela, egaharutxa awene ottiya numba dhawa dhorela dhawa wi adhowe arome wita wili wego wahaziwani. w23.05 14 ddima 1-2

Nzu na Mulugu ninonilibiha odhowavi nikanaga ovilela, ttagaraga na okwela. Luka 21:19 onologa: Muvilele munele ovuneya. Kolosi 3:12 onologa: “Nona thukulaní meddelo a thagaraga.” Vina 1 Tesalónika 4:​9, 10 onologa: “Vowi Mulugu mwinyene ousunzihani makalelo okwelana. . . . Mukwelani-mpu, amudhihu, ninowulobani: muthabwihe wirawá.” Versu esi dhotedhene dhilebeliwe anamafwara atonyihedha ovilela, ttagaraga vina okwela. Mbwenyi awene anfwanyela odhowavi atonyihedhaga mikalelo esi. Iyo ninofwanyela okosa yakene. Wi owodhe okosa ejuwene onofwanyela osunza mukalelo olagihile Akristu oroma mikalelo esi. Ogakosa dhawene onele wona mukalelo onatagihe weyo anamafwara aba vina onele woniha wi ovisasanyedhela goyi enddimuwa. Dhahene goyi enddimuwa egaroma, enele wufwanya bumalile osunza ovilela, ottiya ejo onele okala womala-nawale wi odhowegevi ovilelaga. w23.07 3 ddima 4, 8

Kintanala akala nili attikitteliwi obe mabila mena, iyo notene ninofuniwana weddaga Dila eji Yokoddela, okosa eji enele onikamihedha odhowagavi nimwebedhaga Yehova ovanene vina musogorho mpo nigakela mareliho anadhena Omwene wa Mulugu. (Jo. 10:16) Oromana yaka ya 1919 N.K attu matxikwi-na-matxikwi, alobwana, ayana na aima anobudduwa mBabilónia Munddimuwa, kuloga makapela onyengetta vina anowedda mudila ya nladdaniho. Yehova wahivuhulela wi agahiburutxamo mudila elobo-txilobo egadhile wakwakwattutxa Ayuda afuna wiyelela elabo yawa. (Iza. 57:14) Koddi masaka abano enopadduwa elobo yakene na Dila Yokoddela? Ndde, vyaka dhinjene mundduni ehinatti ofiya yaka ya 1919, Yehova wahalabihedha alobwana ororomeleya wi akamihedhe attu ena obudduwa mBabilónia Munddimuwa. (Kaladdaniha na Izaiya 40:3.) Alobwana abo ahakamihedha attu wi awodhe obudduwa mmakapela onyengetta vina wi amwebedhe Yehova vamodha na nlogo naye. w23.05 15-16 ddima 8-9

Yehova kanfuna wi nikose dhilobo sabwa ya odideliwa, iyene onfuna wi nikose na wagalala. (2 Kor. 9:7) Akala weyo kuna efunelo yowakwaniha yogana, onofwanyela ovilibihedha? Koona yotagiha ya murumiwi Paulo. Iyene ohiloga: “Ddinowanana mwili waga, ddinokurumutxa okala mudhari waga.” (1 Kor. 9:​25-27) Paulo wannivilibihedha okosa dhapama masiki ahikanaga efunelo. Yehova wonamo dhavi mabasa a Paulo? Yehova wahagalala na ovilibihedha wa Paulo vina ohimuttuva. (2 Tim. 4:​7, 8) Na mukalelo wakakene, Yehova onowagalala aganonaga nivilibihedhaga wakwaniha yogana yehu masiki akala kanina efunelo yokosa ejuwene. Enimuttukulela Yehova wagalala jawi iyo ninivilibihedha okosa yoganaya kahiyo sabwa ya oziveliwa na enkosihu, mbwenyi sabwa yomukwela. Dhahene ninga mmuttuveliye Paulo sabwa ya ovilibihedha waye, Yehova onele onittuva sabwa ya ovilibihedha wehu. (Masal. 126:5) Nigona wi Yehova ononiruriha, iyo ninowenjedhedha efunelo yehu. w23.05 29 ddima 9-10

Murumiwi Paulo ohaladdaniha abale otene ahinaviluwe labo na Yehova na anamagona. Awene kanziwa dhimpadduwa vina ovira wa mudhidhi. Nona, egapadduwa elobo yamakamaka awene kanziwa vina kantanala esuwene. Masaka abano attu enjene anogona mpaddi womuyani. (Rom. 11:8) Awene kannonelamo wi iyo ninkalawo “masiku omariha” vina wi goyi enddimuwa enele ofiya momaguva. (2 Ped. 3:​3, 4) Mottiyana na awene, iyo ninoziwa wi ninofwanyela ovyag’anela siku na siku wi ninavitaganyihe na politika vina owanawana wa mwilaboni. (1 Tes. 5:6) Venevo vanaddamela labo na Yehova, okukuseliwa okosa mpaddi wa elabo onodhaga wunuwa. Masiki dhawene, iyo kaninfwanyela ozuzuma na ejile enakosihu ejoya egapadduwa. Muya wa Mulugu onowodha onikamihedha okala wofwaseya vina okosa dhosakula dha malago.—Lk. 12:​11, 12. w23.06 10 ddima 6-7

Txini enubuwela weyo ogewa nzina ntti Sansau? Txino weyo onowubuwela wi wali muttu wa guru vaddiddi. Ejo ebaribari. Mbwenyi iyene ohikosa dhosakula dhabure vina ohitabuwa sabwa ya ejuwene. Masiki dhawene, Yehova wazuzumeli dhilobo dhapama dhakosiliye, vina Yehova ohilebiha nipadduwo ntti na Sansau mBibiliani wi iyo nipurelemo. Yehova ohimulabihedha Sansau wi akose dhilobo dhinjene dhotikiniha vina akamihedhe ana Izrayel. Muvirile vyaka dhinjidhene Sansau bamalile okwa, Yehova wahinvudhelela murumiwi Paulo wika nzina na Sansau mu listani na attu alagihile nroromelo ninddimuwa. (Aheb. 11:​32-34) Yotagiha ya Sansau enowodha onipangarhaza. Iyene ohimukuluvela Yehova, masiki vagumaniyena makattamiho orutxa vaddiddi. Enowodheya iyo opangarhazeya na nipadduwo na Sansau vina dhilobo dhinasunze iyo na iyene. w23.09 2 ddima 1-2

Enowodheya wunuwiha ovilela wehu modhela omulobelela Yehova nimwaddelaga dhotene dhinnisosa. (1 Tes. 5:17) Masiki akala kunapattiwa makattamiho orutxa ovanene, weyo onomulobelela Yehova ogakubanya, ogadhugudheya obe ogahiziwe yokosa? Ogakana elemelelo yomulobelela Mulugu okumbiraga nikamihedho ogafwanyiwa makattamiho mang’ono ovanene, kinawurutxe okosa yakene ogafanyiwa makattamiho manddimuwa musogorho. Weyo onele okana ebaribari wi Yehova onoziwa mudhidhi vina mukalelo wa owukamihedha. (Masal. 27:​1, 3) Ninele owodha oviluwa mwari mwa goyi enddimuwa nigakala ororomeleya vamentoni va Yehova nigafwanyiwa makattamiho masaka abano. (Rom. 5:3) Ninlogela nni dhahene? Abali enjene na arogora ahiloga wi ovilela makattamiho agumananina ehakamihedha ovilela makattamiho a musogorho. Awene agawodha ovilela makattamiho na nikamihedho na Yehova, anokana nikuluvelo wi Yehova onofuna wakamihedha. Vowi anomuroromela Yehova enowodheya awene ovilela yoweha enapatte.—Tia. 1:​2-4. w23.07 3 ddima 7-8

Ovyeviha wa Yehova na ttagaraga dhaye dhinomuttukulela okala muttu wofewa murima. Motagiha, Yehova ohoniha ovyeviha waye nsaka natolotxiliye attu abure akala sidadi y’o Sodoma. Modhela anju waye, Yehova wahinvaha malago Loti a ottawela omwangoni. Mbwenyi Loti wahova ottawelawo. Wahimukumbirha Yehova wi iyene vamodha na amudhaye attawele muttette wo Sowar, waganile Yehova otolotxa. Yehova agahimukalela ntidi Loti wi afware malagoya ninga mwamwaddeliye. Ottiya ejo, iyene wahirumela yokumbirha ya Loti vina katolotxile muttetteya. (Wita 19:​18-22) Vyaka dhinjene musogorhomwa, Yehova wahaweddela ttagaraga akadda Nínive. Yehova wahimuruma namavuhulela waye Jona wi avuwihe otolotxiwa wa sidadi ejile na attuyamo. Mbwenyi akadda Nínive mutxinuwilani, Yehova wahalevelela vina sidadiya kiyatolotxiwe.—Jon. 3:​1, 10; 4:​10, 11. w23.07 21 ddima 5

Txini ensunza iyo na yotagiha ya Jowás? Mukweli Joyadá muttu wamukamihedha Jowás, nomala Jowás baroma wavuruwana asadduweli, iyene wahidha okala muttu wohiroromeleya vamentoni va Yehova. Nipadduwo ntti ninnisunziha wi omova wehu Mulugu kunfwanyelela ottiddeleya bahi na dhotagiha dhapama dha Akristu akwehu, obe anamudhi ehu. Wi mandano ehu na Yehova akalevi olibene ninofwanyela wunuwiha omukwela vina omuriha, ninawodhe okosa ejuwene nigasunzaga mudhidhi wotene Nzu na Mulugu, otanalela vina olobela. (Jer. 17:​7, 8; Kol. 2:​6, 7) Yehova kannikumbira dhilobo dhinjidhene. Ennikumbirhiye jiji enfwanyeya va Kohelét 12:13 enloga: Ogwaddela wa makani otene alogiwe, mungwelani pumpu; omova Mulugu, ofwara malamulo aye. Iyo nigamova Yehova ninele owodha owanana dhoweha dhinagumanihuna musogorho vina ninele okala owimelene pwi. Kinakalewo elobo enanonge mandano ehu na Yehova. w23.06 19 ddima 17-19

Versu 5 enroma na mazu aba: “Ole wagilatile vampaddoni w’omwene, ologa.” (Ovuh. 21:5a) Mazu aba bamakamaka sabwani Yehova onologa dila ttaru mazu akakene munivuruni na Ovuhulela. Kahiye anju obe Yezu okosile nipikirhelo ntti, mbwenyi ddi mwinyene Yehova! Eji enowoniha wi ninofwanyela okuluvela enlogiye vasogorho. Sabwaya jani? Sabwani Mulugu “[kampela] malago.” (Tito 1:2) Nona ninofwanyela okuluvela mazu ali va Ovuhulela 21:​5, 6. Mazu anloga Yehova vasogorhova baba, Koona! Nzu ntti koona! na Egregu ninolabihedhiwa venjene munivuruni na Ovuhulela. Txini elogile Mulugu vasogorhova? Iyene ohiloga: “Dhetene, miyo ddinokaliha dhiswa.” Yehova onele okosa matxinjo aba musogorho, mbwenyi iyene ohikana nikuluvelo ninddimuwa nawi onele wakwanihedha nona aloga ninga matxinjoya anopadduwa ovanene.—Iza. 46:10. w23.11 3-4 ddima 7-8

Murumiwi Pedro voniliye vina vewiliye dhilobo dhinji dhapama valiye na Yezu, iyene wanwanana dhawobana dhaye. Koona dhotagiha dhing’onovi. Valogile Yezu wi iyene wanfwanyela otabuwa venjene vina opiwa wi akwanihe mavuhulo a mBibiliani, Pedro wahiloga wi ejo kigapadduwile. (Mk. 8:​31-33) Vina dila dhinjene, Pedro na anamafwara ena antamela oziwa wali munddimuwayavo. (Mk. 9:​33, 34) Omattiyu womariha Yezu ahinatti okwa, Pedro wahikosa elobo se otanalela, iyene wahigwadda niyaru na mulobwana dhahi. (Jo. 18:10) Omattiyu ene obule, Pedro wahittiddiwa wova nanda bamukodda mukwaye Yezu. (Mk. 14:​66-72) Eji yahimuttukulela Pedro wunla na okubanya onddimuwa. Pedro wanivipwatteliha muladdu sabwa ya dhipadduwile, masiki dhawene Yezu kamunyanyalile. Mmaleliye ovenyihiwa mukwani, Yezu wahinvaha Pedro gari ya olagiha omukwela waye. Yezu wahinvaha mabasa Pedro, okala mukumbuzi wovyeviha vina osapiha mabila aye. (Jo. 21:​15-17) Pedro ohikosa dhahene ninga mumukumbirile Yezu. Pedro wali o Jeruzalemi labo na Pentekoste vina wali mmodha wa attu oroma attikitteliwe na muya wokoddela. w23.09 22 ddima 6-7

Murumiwi Pedro ohawaddela anddimuwa a mmulogoni, “Sapihaganí nikuru na mabila, authiyedheni Mulugu.” (1 Ped. 5:​1-4) Akala weyo oli munddimuwa wa mmulogoni, iyo ninoziwa wi weyo onowakwela abali vina onofuna wazuzumela. Mbwenyi masaka mena onodhaga okana mabasa menjene obe okala wolemene nanda buhiwodha wakwaniha mabasa awo. Ejo egapadduwa, txini enfwanyeliwe okosa? Kamwaddele Yehova mukalelo oniviwamo weyo. Pedro ohileba: “Ole ovahiwe nibasa thi nibasa, alabe na guru ya Mulugu yakelileye.” (1 Ped. 4:11) Abaliya txino anogumanana makattamiho orutxa ahinagome mwilaboni ejino yabure. Mbwenyi kobuwela wi “mukumbuzi-mukumbuziyá,” Yezu Kristu, onowodha wakamihedha opitta mugakamihedhiliwe, iyene onowodha okosa ejuwene ovanene vina mwilaboni eswa. Enfuna Yehova wi anddimuwa a mmulogoni akose ja wakwela abalihu, wazuzumela vina akale “asogorheli anfwanyela otagihiwa na etene.” w23.09 29-30 ddima 13-14

Ninofwanyelela orabela okosa dhilobo na mukalelo onkosa attu a mwilaboni. Iyo nigonaga dhilobo na mukalelo wakene onona attu amwilaboni, ninodhaga omuttiya Yehova vina malamulo aye. (1 Kor. 3:19) “Onona oku wa mwilaboni” dila dhinjidhene onowakwekwettela attu okosa dhilobo dhomaningoni. Akristu ena akala o Pérgamo vina o Tiatira ahirava mweddelo wa attu akosa mararuwo vina ebedha dhilobo dhosemiwa. Yezu wahirumela malago ovadda vaddiddi milogo esile sabwa ya okosa mararuwo. (Ovuh. 2:​14, 20) Masaka abano, attu ankala vakuvi na iyo anodhaga onikwekwettela orumela dhubuwelo dhohifwanyelela. Anamudhi, attu anaziwihu anodhaga ologa wi iyo ninottabwiha weddana magano a Mulugu ninofwanyela ovugulela vang’onovi. Motagiha, awene anodhaga onaddela wi iyo ninofwanyela ofwara dhifunelo dhehu vina wi malago a Bibilia ahimala okwela. Dila dhina, ninodhaga wubuwela wi malago annivaha Yehova kannoneleyamo mowakwana-mwene. Eji egahidha okala yoweha eganittukuleli ofwara dhilobo dhihilebiwe mBibiliani.—1 Kor. 4:6. w23.07 16 ddima 10-11

Maria, maye wa Yezu, wafwanyela okala woliba murima. Iyene wali ahinatti oteliwa; mbwenyi agahikana yari. Wali ahinattigi walela aima mbwenyi wanfwanyela omulela mwana agadhile okala Mesiya. Vowi iyene wali ahinatti oteliwa, agawodhile dhavi omutapulelamo José mulobwana wamweddelela wi wahikana yari? (Lk. 1:​26-33) Maria owodhile dhavi okana guru? Iyene wahiveda nikamihedho na attu ena. Motagiha, iyene wahimukumbirha anju Gabriyel wi amwaddele dhilobo dhina dhewanana na mabasa amuttomeliye. (Lk. 1:34) Vasogorhova, wahikosa oleddo mpaka omwangoni murudda wo Judeya wi amone munammudhi waye Elizabeti. Elizabeti wahimutamalela Maria vina na nikamihedho na Yehova wahiloga nivuhulo sabwa ya mwanaya. (Lk. 1:​39-45) Maria ohiloga wi Yehova wahoniha guru dhaye dhotene. (Lk. 1:​46-51) Yehova ohimulabihedha anju Gabriyel vina Elizabeti wila amulibihe Maria. w23.10 14-15 ddima 10-12

Akristu ang’onovi banttikitteliwa na muya wokoddela, sabwa ya ejene ahikana mandano a vawoka na Yehova. Akristu aba 144.000 anele olaba wirimu ninga anamakutta vamodha na Yezu. (Ovuh. 14:1) Mburo Wokoddela wali mmusanani, ontapulela yimelelo yawa ya omuyani ninga ana a Mulugu oku bali velaboni ya vati. (Rom. 8:​15-17) Mburo Wokoddela-koddela wali mmusanani, ontapulela wirimu oli Yehova. “Guwo enddimuwa” yagawa Mburo Wokoddela na Mburo Wokoddela-koddela entapulela maningo a Yezu, bali velaboni ya vati iyene wahikana maningo dhahene ninga attu ena. Sabwa ya ejuwene kawodha ovolowa wirimu vina okala Namakutta Munddimuwa wa mparha womuyani. Muperhekeliye egumi yaye wi awobole attu, Yezu ohifugula dila wi Akristu ottikitteliwa akele egumi wirimu. Dhahene ninga Yezu, attikitteliwi anofwanyela ottiya vina maningo awa wi akele nlivo nawa wirimu.—Aheb. 10:​19, 20; 1 Kor. 15:50. w23.10 28 ddima 13

Jedeau wahakula nokurumuwa vapambihiwiye na akadda Efraim. (Anam. 8:​1-3) Iyene kawakulile nosilidheya. Wahoniha wi wali muttu woviyeviha modhela wavuruwana sabwaya yampabihelani vina wahawakula na mukalelo wapama, mukoseliye ejuwene awene ahifwasa. Anddimuwa a mmulogoni a zelu anofwanyela omutagiha Jedeau modhela ovuruwana na ofwasa vina wakula noriheya agapambihiwaga. (Tia 3:13) Eji enele okamihedha wi mmulogoni mukale murenddele. Attu ena vamutamalelani Jedeau sabwa ya iyene wapemberha akadda Midia, matamalo otene onvahile Yehova. (Anam. 8:​22, 23) Anddimuwa a mmulogoni anamutagihe dhavi Jedeau? Dhilobo dhotene dhinkosani, matamaloya anvahege Yehova. (1 Kor. 4:​6, 7) Motagiha, akala munddimuwa mmodha wa mmulogoni onotamaleliwa sabwa ya ttotto yaye ya osunziha, iyene onofwanyela ologa wi eji epadduwile sabwa ya masunziho akeliliye na Nzu na Mulugu, obe sabwa ya maswagiho anakeliye na nlogo na Yehova. Mudhidhi na mudhidhi, anddimuwa a mmulogoni anofwanyela opima akala masunziho awa anomuttittimiha Yehova obe anfuna attittimihiwe na attu. w23.06 4 ddima 7-8

Akala ejile enimukumbirhihu Yehova munlobeloni kimpadduwa nivikose mavuzo mararu. Noroma, ‘Enkumbirha miyo elobo yofwanyelela?’ Dila dhina ninodhaga wubuwela wi enkumbirha iyo elobo yamakamaka. Txino yoloba yehu enodhaga okala yamakamaka mwa mudhidhi mung’onovi. Akala ninolobelela ogoma wa makattamiho, enodhaga woneya wi ehikalawo elobo yamakamaka egadhile ogomiha makattamihoya opitta ejile enkumbirhehu. Txino dhilobo dhinji dhinimuloba iyo Yehova kadhiniwanana na efunelo yaye. (1 Jo. 5:14) Kobuwela yotagiha ya amambali ahimukumbirha Yehova wi amukamihedhe mwaniwa okalavi mwibaribarini. Enkala ninga kavali elobo yabure na yokumbirha eji. Mbwenyi Yehova txipo kanimmagelela muttu omulabela. Iyene onfuna wi iyo notene vamodha na anihu nisakule omulabela. (Olib. 10:​12, 13; 30:​19, 20) Nona ottiya omuloba Yehova wi amukamihedhe mwaniwa okalavi mwibaribarini, amambali anofwanyela omuloba Yehova wi addiginye mirima dhawa, attukuleleye omukwela Yehova vina okala amarho Aye.—Gano 22:6; Ef. 6:4. w23.11 21 ddima 5; 23 ddima 12

Ekaleli nni yamakamaka opangarhazana? Referensiya dhahi ya Bibilia, ehiloga wi nzu ntti “opangarhaza” nilogile Paulo, nintapulela “okala vakuvi na muttu ontabuwa na makattamiho orutxa wi nimpangarhaze.” Iyo nigapangarhaza abali na arogora, ninowakamihedha ovenya wi odhowegevi eddaga mudila ya egumi. Dila dhetene dhinapangarhaza iyo abalihu, ninowoniha wi ninokwelana. (2 Kor. 7:​6, 7, 13) Akala muttu onomweddela ttagaraga muttu mwina ontabuwa, ttagaraga enele omuttukulela ompangarhaza vina omukamihedha. Ttagaraga enomuttukulela muttu ovaha nipangarhazo. Koona mukalelo wiwananihile Paulo ttagaraga ya Mulugu na nipangarhazo ninnivahiye. Paulo ohiloga wi Yehova “Babi onneddela thagaraga, Babi onnipangarhaza mudhidhi wotene.”—2 Kor. 1:3. w23.11 9-10 ddima 8-10

Ebaribariya jawi, anamafwara otene a Yezu anele ogumanana makattamiho. Koona yotagiha ya Paulo. Iyene ohawaddela dhahi Akristu o Tesalónika: “Válihu na nyuwo, nawaddelani mutanene wi niner’ofwanyiwa masoso. Jijene epadduwile.” (1 Tes. 3:4) Alebelaga Akristu o Korinto, Paulo ohiloga dhahi: “Amudhaga, ninofuna muziwe masoso othabwa anipadduwele . . . Kanajedha-wene okalawo.” (2 Kor. 1:8; 11:​23-27) Masaka abano, iyo notene ninojedhela otabuwa na elobo-elobovi. (2 Tim. 3:12) Weyo ogamuroromela Yezu vina oganfwara, akwawo vina anamudhi awo anodhaga owubedda. Wahiromaga weddihiwa na mukalelo wohifwanyelela obe ohitabutxiwa omabasani sabwa ya okala muttu wororomeleya? (Aheb. 13:18) Txino ohitabuwa na ofwara-fwariwa na guverno sabwa ya odhowa mmabasani a olaleya? Kintanala matabuwo agumaniliwena, Paulo ohiloga wi enowodheya okana wagalala. w23.12 10-11 ddima 9-10

Jakobi ohivilela makattamiho menjene. Ana eli a Jakobi, Simion na Levi ahitotela manyazo murala wa Jakobi vina ahipigidha nzina na Yehova. Ottiya ejo Jakobi wahimuyelela mwadhiye Rakel, mudhidhi wambaliye mwanaye wanawili. Vina sabwa ya dala enddimuwa, Jakobi boluvalile wahimageleleya omwalela w’Ejipitu. (Wita 35:​16-19; 37:28; 45:​9-11, 28) Masiki na makattamiho aba otene, Jakobi txipo kattiyile omuroromela Yehova vina okuluvela mapikirhelo Aye. Sabwa ya ejuwene, Yehova ohoniha wi wannimurumela Jakobi. Motagiha, Yehova wahimururiha venjene Jakobi na dhilobo dhinjidhene dhomaningoni. Vina Jakobi wahimutamalela venjene—Yehova sabwa ya omoona wili mwanaye José, odduwene wobuweliye wi wahimala okwa mwa vyaka dhinjidhene mundduni. Mandano ofiyedheya a Jakobi na Yehova, ahimukamihedha ovilela makattamiho otene agumaniliyena. (Wita 30:43; 32:​9, 10; 46:​28-30) Iyo vina nigakana mandano ofiyedheya na Yehova, ninele owodha ovilela makattamiho ohijedheleya angumanihuna. w23.04 15 ddima 6-7

Masalmo 23 jibo enoniha okuluvela okwela wa Yehova vina onizuzumela waye. Davidi namaleba wa nivuru ntti na Masalmo 23, ohiloga mandano ofiyedheya aniye na Yehova ofiyedha omukuwela Mukumbuzi waga. Davidi wali wobareleya amuttiyaga Yehova omweddiha, iyene wannimukuluvela kakamwe Yehova. Davidi wanziwa wi Yehova agahilagiha okwela waye masiku otene. Txini yamuttukulela Davidi okana nikuluvelo ntti? Mudhidhi wetene Davidi wankana esile dhamujombela, ottiya ejo Davidi wanziwa wi Yehova wali marho waye vina wannimurumela. Jijene yamuttukulela Davidi wona wi kiyatanala makattamiho agadhile ompatta musogorho, mudhidhi wetene Yehova agahimuzuzumela. Nikuluvelo nana Davidi na okwela wa Yehova nali noliba vaddiddi opitta makattamiho-makattamihovi akaniye, jijene yamuttukulela Davidi okana wagalala vina wagalala na esile dhana iyene.—Masal. 16:11. w24.01 29 ddima 12-13

Oromana Koddo Yanawili Erabiwe Elabo Yotene, nlogo na Yehova ninolaleya na ofuru mwari mwa dhilabo dhottiyana-ttiyana. Mwebaribari mabasa aba a olaleya anowunuwavi orugunuwa elabo yotene.Masaka abano, abali a Nikuru Nolamulela anodhowavi afwaraga malago a Yezu. Awene anokosa ejuwene modhela okosa dhogana dhiniwanana na efunelo ya Yezu. Ottiya ejo, anameddelela milogo vina anddimuwa a mmulogoni anolabihedhiwa wila àfiyedhena malago awa abali a mmilogoni. Anddimuwa a mmulogoni ali attikitteliwi ali mpaddi wa nlada noja na Yezu. (Ovuh. 2:1) Ebaribari wi anddimuwa otene a mmulogoni attu ohakwana vina anovonya. Mizé, Josuwé ahivonya dila dhinji, arumiwi vina ahivonya. (Oleb. 20:12; Jos. 9:​14, 15; Rom. 3:23) Masiki dhawene, iyo ninowodha wona kakamwene wi Yezu onodhowavi amulabihedhaga mudhari wororomeleya vina anddimuwa a mmulogoni, iyene onele odhowavi alabihedhaga alobwana aba. Nona iyo nihikana mwaha dhinjene dha okuluvela malago annivaha Yezu àlabihedhaga alobwana aba ororomeleya. w24.02 23-24 ddima 13-14

Enowodheya iyo omuttittimiha Yehova nigamuloga pama, nigamutamalela vina nigamukwela. Nigakala mmabasani a olaleya, ninowubuwela wi efunelo yehu yamakamaka ja wakamihedha attu onfiyedha Yehova vina omona ninga Babi wokwela. (Tia. 4:8) Mwa iyo gari enddimuwa vaddiddi walagiha attu mBibiliani wi Yehova, Mulugu wokwela, woligana, weziwelo, wa ewodhelo, vina ohikana mikalelo dhaderetu. Mukalelo mwina wa olagiha wi ninomuttittimiha Yehova vina ninomwagalaliha jokosa muli-mwetemwene wi nimutagihe. Nigakosa ejuwene ena anozinddiyela wi iyo ninottiyana na attu enjene a mwilaboni. (Mt. 5:​14-16) Nigatamela mudhidhi wi nikale na attu siku na siku ninodhaga okana gari ya watapulela sabwaya ekalilehu ottiyana. Yodhelavoya, ena anodhaga okana efunelo ya osunza mwaha wa Mulugu wehu. Nigamuttittimiha Yehova na mikalelo esi, iyene onowagalala vaddiddi.—1 Tim. 2:​3, 4. w24.02 10 ddima 7

Wi okale Mukristu wowarala onofwanyela osunza ttotto ya ottidda mabasa. Okosa eji enele owukamihedha ozuzumela mabasa anakeliwe mmulogoni, vina enele owukamihedha ofwanya ganyo enawuwodhihe wasapela amudhawo vina okana mandano a pama na attu ena. Motagiha kasunza wengesa vina oleba. Bibilia onologa wi wengesa Nzu na Mulugu malabo otene vina otanalela, enomukamihedha mulobwana okana wagalala, vina dhinkosiye dhinosogora. (Masal. 1:​1-3) Omwengesa Bibilia malabo otene enele owukamihedha oziwa mukalelo onubuwela Yehova, ottiya ejo onelege wubuwela mofwanyelela-mwene, otanalela pama vina ovirihamo malago a mBibiliani. (Gano 1:​3, 4) Mmulogoni munofuniwa abali anziwa osunziha pama vina anvaha malago andela mBibiliani. Weyo ogaziwa wengesa vina oleba pama onele owodha osasanyedha diskursu dhapama vina ovaha dhowakula dhinalibihe nroromelo na abali. Enowodheya vina weyo okosa manota amakamaka anawukamihedhe olibiha nroromelo nawo vina wapangarhaza enna. w23.12 26-27 ddima 9-11

Ogattiddiwa wova katanalela ejile enakose Yehova musogorho, Satana agamala otolotxiwa. Nlagiho nimodha nitonyihedhiwe va porogaramani ya Kongeresu ya 2014, nihoniha mwazambo alogaga na anamudhi aye mukalelo ogasadduliwe mazu anfwanyeya va 2 Timóteo 3:​1-5 mparaizu: “Ziwa wi mwilaboni eswa munele okalamo wagalala. Vowi attu anelege okwelana muttu na mukwaye, anele ojiwa murima na mafumo omuyani, anele okala ovipimelela, oviyeviha, anerege omuttittimiha Mulugu, anele wawiwelelaga amambali awa, anele okala attu otamalela, oweddeyana, anatanalege amudhawa, awiwananeyana, anloga pama mudhidhi wotene na attu ena, anwodha ovyang’anela, anele okana attu okurumuwa, ankwela dhilobo dhapama, òkuluveleya, ofewa murima, ofwasa, animukwela Mulugu ottiya dhifunelo dhabure, aneddihiwa n’ekalelo ya omulabela mulugu nororomeleya; weyo tamelá wandana na attu aba.” Weyo onologa na amudhawo obe na abali a mmulogoni sabwa ya egumi enakanihu mwilaboni eswa? w24.01 6 ddima 13-14

Enopangarhaza oziwa mazu a Masalmo 149:​4, “Nabuya [Yehova] onokwela nlogo naye.” Abali ena dila dhina anokukumuwa venjene, baroma ovivuza, ‘Koddi Yehova onoddonana ttima?’ Adhari enjene ororomeleya a Yehova otaganyiha na abale akalilewo nsaka na wale, mudhidhi mwina anwanana dhubuwelo ninga esi. (1 Sam. 1:​6-10; Job 29:​2, 4; Masal. 51:11) Bibilia onologa wi enowodheya attu ohiligana omwagalaliha Yehova vina orumeliwa na iyene. Enwodheya dhavi? Nigamuroromela Yezu Kristu vina nibatiziwa. (Jo. 3:16) Dhahene panwodhihu olagiha wi nihitxinuwa dhottega dhehu vina nihimpikirhela Yehova wi ninelege okosa efunelo yaye. (Mer. 2:38; 3:19) Nigattukula ttarho esi wi nimususele, ninomwagalaliha venjene Yehova. Mudhidhi ondowihu nivilibihedhaga wi nakwanihe ejile epikirhelihu, Yehova onele onirumela vina onakela ninga amarho aye ofiyedheya.—Masal. 25:14. w24.03 26 ddima 1-2

Enowodheya iyo watagiha arumiwi modhela odhowavi nilaleyaga masiki alamuleli anikoddihe. Enowodheya iyo vina olobela nikumbiraga oliba murima vina eziwelo, nikuluvelaga wi Yehova onele onikamihedha olaleya. Kakumbirha nikamihedho na Yehova wi owodhe owanana makattamiho. Enjene mwa iyo ninogumanana makattamiho a eredda vina a muyubuweloni, attu ena ahayelela mukwani amudhawa, enagu anogumanana makattamiho orutxa vamuralani, ofwara-fwariwa obe makattamiho mena. Yottabwaya, makattamiho ninga pandemia na koddo dhinottabwiha makattamihoya. Onfugulele Yehova murima wawo. Omwaddele dhotedhene dhinupadduwela, dhahene ninga munlogeliwe makani na marho wawo. Okuluvele wi Yehova onele wukaliha. (Masal. 37:​3, 5) Enanikamihedhe ovilela mmakattamihoni ohitxelela olobela. (Rom. 12:12) Yehova onoziwa dhinapadduwela adhari aye vina—“[onowiwa] dhinunlela abale animuriha.”—Masal. 145:​18, 19. w23.05 5-6 ddima 12-15

Akala ninofuna okosa yogana yamakamaka, nivilibihedhe oziwa efunelo ya Yehova vina nigaziwa, nikose dhilobo dhiniwanana na efuneloya. (Ef. 5:17) Nigafwanya magano a Bibilia aniwanana na makattamiho ehu, enkala ninga nifwanyile ejile enubuwela Yehova sabwa ya makaniya anipattile. Mwa venevo nigavirihamo magano a Yehova panwodhihu okosa dhogana dhaderetu. Mwiddani wehu “Satana,” onfuna wi iyo nizuzumelege venjene dhilobo dha elabo ejino ofiyedha ohikanaga mudhidhi wa omulabela Mulugu. (1 Jo. 5:19) Se ozinddiyela Mukristu agahidha oroma ozuzumela dhilobo ninga kobiri, ganyo vina masunzo ottiya opura gari eji wi amulabele venjene Yehova. Ejo kopadduwa egahilagiha wi Mukristu oddo oroma wubuwela ninga attu a mwilaboni. Enoziweya wi kobiri, ganyo vina okana dhilobo dhofuneya kahiyo yabure, mbwenyi dhilobo esi txipo kadhikale vamburoni voroma mwigumini mwehu. w24.03 24 ddima 16-17