“Hi Pa Bantuk Hin Ahohmanh Nih Bia An Chim Bal Lo”

“An lung a hmuh ngaingai hna i bia dawhdawh a chimmi nih khan an khuaruah a harter dih hna.”​—⁠LUKA 4:⁠22.

1, 2. (a) Zeiruang ahdah Jesuh va tlaih ah an thlahmi palik pawl cu an lawngin an rak kir? (b) Zeinihdah palik pawl lawnglawng hi Jesuh cawnpiaknak nih a lung a rak sukmi an si lo ti kha a langhter?

PALIK hna nih an rian kha an rak tlolh. Jesuh Khrih kha va tlaih awkah thlah an rak si, sihmanhsehlaw an lawngin an rak kir. Tlangbawi upa hna le Farasimi hna nih a konglam kha an rak hal hna: “Zeicahdah nan ratpi lo?” Pumpak kilvennak a tuah lomi pakhat kha zeiruang ahdah an rak tlaih hrim lo? Palik pawl nih hitin an rak chim: “Hi pa bantuk hin ahohmanh nih bia an chim bal lo.” Jesuh a cawnpiaknak nih khan an lung a rak suk tuk hna i hi mi daite asimi pa kha anmah theng nih thong chung thlak lai kha an ngamh lo.a​—⁠John 7:​32, 45, 46

² Mah palik hna lawnglawng kha Jesuh cawnpiaknak nih an lung a rak sukmi hna an si lo. Mi tampi cu a cawnpiaknak kha theih awkah an ra tiah Baibal nih a kan chimh. A chuahkehnak khuami hna cu “bia dawhdawh a chimmi nih khan an khuaruah a harter dih hna.” (Luka 4:22) Tilawng cungin Galili tivakam ah aa pummi mibu nganpi kha voikhat nak tamdeuh phung a rak chimh hna. (Marka 3:9; 4:1; Luka 5:​1-3) Voikhat ah, “mi tampi” cu ei awk hmanh an ngeih ti lo tiang, ni tlawmpal chung a sinah an rak um.​—⁠Marka 8:​1, 2. 

3. Jesuh kha a min a thangmi cawnpiaktu pakhat a sitermi a hrampi a kong cu zeidah a si?

³ Zeinihdah Jesuh kha a min a thangmi cawnpiaktu ah a si ter? A hrampi a kong cu dawtnak a si.b Jesuh nih a rak thanhmi biatak kha a rak duh i, a rak cawnpiakmi minung kha a rak dawt hna. Sihmanhsehlaw Jesuh nih hmual a ngeimi cawnpiakning lam ah hawi hlei a simi thiamnak zong kha a rak ngei. Hi cauk chung i cawnmi capar hna ah hin, Jesuh nih a rak hmanmi hmual a ngei ngaimi lam hna le mah a cawnpiakning hna cu zeitindah kan i zohchunh khawh ti kha kan i ruah hna lai.

A Fiangmi Bia Hmannak

4, 5. (a) Zeiruang ahdah Jesuh nih a cawnpiaknak ah khan hngalh a fawimi holh kha a rak hman i, cutin a rak tuahmi thil kong ah zeidah i chingchiah awktlak a si? (b) Jesuh nih a rak cawnpiakmi hna lakah Tlang cung Cawnpiaknak cu a fiangmi bia hmannak ah zeitindah tahchunhnak pakhat a si?

⁴ Cathiammi hna nih an bia a ngaimi hna an theihthiam khawh lomi holh an hman tawn lengmangmi cu khuaruahhar a si lo. Sihmanhsehlaw midang nih an theihthiam lomi in kan chim a si ahcun, kan thiamnak in zeitindah ṭhathnemnak an i lak khawh lai? Cawnpiaktu pakhat in, Jesuh nih midang cung cuan in zeitikhmanh ah a rak chim bal lo. A rak hman khawhmi holhfang a kauhning kha ruat hmanh. Hngalhthiamnak nganpi a rak ngei ko nain, amah zawn kha rak i ruah loin, a bia a ngaimi hna zawn kha a rak ruah. An lak i mitampi cu “fimthiamnak zeihmanh a ngei lomi, mi sawhsawh menmen” an si kha a rak hngalh. (Lamkaltu 4:13) An lung a pem khawh nakhnga, “mi sawhsawh” asimi hna nih an theihthiam khawhmi holh kha a rak hman. A chimmi biafang hna cu a fawimi tete an rak si, sihmanhsehlaw a rak thanhmi biatak nih a thuk ngaingaimi hngalhthiamnak kha piang tein a langhter.

⁵ Tahchunhnak ah, Matthai 5:3–7:27 ah aa ṭialmi, Tlang cung Cawnpiaknak kha ruat hmanh. Mah phungchimnak ah khan minit 20 hrawng lawng a rak rau ko lai. Asinain, mah cawnpiaknak hna cu zuanzamnak, i maknak, le thilri chawhlawn ti bantuk kong hna i a hrampi hna kha lung a pemtermi an si caah, a thukmi an si. (Matthai 5:​27-32; 6:​19-34) Asinain, aa cawhhnukmi asiloah rumra a tuah ngaimi ruahnak a um lo. Ngakchia pakhat nih fawi tein a hngalh khawh lomi biafang pakhat hmanh a um lo! A phungchimmi a hun dih tikah, lothlo, tuukhal, le ngatlai hna i tel dawh a simi​—⁠mi bupi hna cu​—⁠“a cawnpiak hna ning ah khan an khuaruah a har ko”!​—⁠Matthai 7:⁠28.

6. A fiangtuk ko nain sullam a ngeimi bia Jesuh nih a chimmi tahchuhnak pakhat kha pe.

⁶ A piangmi, a tawimi bia kha a hman tawn i, Jesuh nih a rak chimmi hna cu an fiangtuk nain, sullam a ngei tukmi an si. Cauk pawl chuah an rak si hlan in, Jesuh nih a bia a ngaimi hna lungthin le ruahnak ah a chimmi thawngṭha kha zeitikhmanh ah philh khawh ti lo dingin a rak nam cang. Tahchunhnak cheukhat hna hi zoh hna hmanh: “Ahohmanh bawi pahnih sal nan si kho lai lo; . . . Pathian le tangka cu an rian nan ṭuan kep kho lai lo.” “Pathian nih an soi ve hna nakhnga lo, midang kha va soi ve hlah u.” “Nal profet hna cu an theitlai khan nan hngalh ko hna lai.” “Adammi nih cun sibawi an herh lo, a zawmi lawng nih khan an herh.” “Hriamnam a lami cu hriamnam in an thi lai.” “Siangpahrang ta a simi cu siangpahrang cu va pe ko u, Pathian ta a simi cu Pathian kha va pe ko u.” “Pek lei ah hin hmuh lei nakin lunglawmhnak a um deuh.”c (Matthai 6:24; 7:​1, 20; 9:12; 26:52; Marka 12:17; Lamkaltu 20:35) Jesuh nih a chimnak in kum 2,000 dengmang a rauh cang hnu, atu chan tiang zongah hin, cu bantuk hmual a ngeimi bia cu fawite in i cinken khawh an si rih ko.

Biahalnak Hmannak

7. Zeiruang ahdah Jesuh nih biahalnak hna kha a rak tuah hna?

⁷ Jesuh nih biahalnak hna kha i chingchiah awktlak in a rak hman. A bia a ngaimi hna kha a biapimi a kong chim cawlhnak thawngin a caan a dih hnga dingmi kha a tlawmter deuh ko lai nain biahalnak atu le atu a rak tuah. Cu asi ah, zeiruang ahdah biahalnak hna cu a rak tuah? Amah le a caante ah, amah a ralchanhmi hna i tuahsernak kha langhter awkah mi lungthin a chunmi biahalnak hna kha a rak hman, cuticun a rak daihter hna. (Matthai 12:​24-30; 21:​23-27; 22:​41-46) Asinain, biatak kha langhter awkah, amah a bia a ngaimi hna an thinlung chungah zeidah a um tikha langhter awkah le, a zultu hna i an ruahnak kha forh in cawnpiak awkah timi a kong tampi hna ruangah, Jesuh nih biahalnak kha a caan lak in a rak hman. Lamkaltu Piter he aa pehtlaimi, tahchunhnak pahnih hi i ruah hna hmanh u sih.

8, 9. Biakinn ngunkhuai peknak kong he aa tlai in a hmaanmi a phi kha Piter nih a hmuh nakhnga biahalnak kha Jesuh nih zeitindah a rak hman?

⁸ A pakhatnak ah, Piter kha Jesuh nih biakinn ngunkhuai a pe maw pe lo tiin ngunkhuai khawltu hna nih an rak hal lio kha vun ruat ṭhan hmanh.d A caancaan ah duakdak in thilti a hmangmi, Piter nih khan, “A pek ko” tiah a rak leh hna. Asinain, tlawmpal hnu ah khan, Jesuh nih hitin a rak ruahceih pi: “ ‘Simon, zeitindah na ruah? Aho nihdah vawlei cung siangpahrang hna hi ramdang thil luh man le ngunkhuai an pek tawn hna? Cuka rammi hna [“an fale,” NW] nih cun maw ramdang mi nihdah?’ Piter nih cun, ‘Ramdang mi nih ta,’ tiah a leh. Cun Jesuh nih, ‘A ṭha ko, cuti a si ahcun, ramchung mi [“fale,” NW]nih cun pek a herh lo.’ ” (Matthai 17:​24-27) Jesuh a biahalnak nih Piter cu a lung a rak fianter ko lai. Zeiruang ahdah?

⁹ Jesuh chan ah, siangpahrang chungkhar cu ngunkhuai pek an luat tikha mikip hngalh a si. Cu a si caah, biakinn ah rak biak a simi vancung Siangpahrang i a fapa ngeihchunh pakhat in, Jesuh nih ngunkhuai pek a herh lo. Piter kha a phi hmaan lawng rak chimh menmen loin, Piter nih a hmaanmi a phi kha a hmuh khawh nakhnga Jesuh nih hmual ngei ngai in le nem tein biahalnak a rak tuah i​—⁠biachim hlan ah ralring tein ruah hmasa a herh ti kha hngalhthiam awkah a rak bawmh.

10, 11. C.E. 33 Lanhtak Puai zanah Piter nih mipa a hnakhaw kha pet lai in a rak tuk tikah Jesuh nih zeitindah a rak lehrulh i, hi nih hin biahalnak hna i man a ngeihning kha Jesuh nih a rak hngalhthiam ti kha zeitindah a langhter?

¹⁰ A pahnihnak tahchunhnak cu C.E. 33 Lanhtak puai zan ah, mibu cu Jesuh kha tlaih awkah an rak rat lio caan ah a cangmi kha a si. Zultu hna nih amah kilvennak caah kan do ve hna lai maw tiah Jesuh cu an rak hal. (Luka 22:49) A bialehnak kha hngak loin, Piter nih vainam in mipa pakhat a hnakhaw kha pet lakin a tuk (Piter nih fak deuh in ing seh timi timhnak a ngei ko lai). Piter nih a bawipa duhnak he aa ralchanhmi ziaza kha a rak tuah, zeitintiah Jesuh cu amah le amah kha a dihumnak in i pek awkah aa tim. Jesuh nih zeitindah a rak lehrulh? Lungsau zungzal in, Piter kha biahalnak pathum a rak tuah: “Ka Pa nih a ka pekmi hrai, nganfah innak hrai cu ding loin a um hnga ti ah maw na ka ruah?” “Ka Pa kha bawmhnak ka hal khawh ko i khulrang in vancungmi ralkap bu hleihnih a run ka thlah khawh ko ti kha na hngal lo maw?” “Sihmanhsehlaw cuti a si ahcun, zeitindah hi bantuk in a si lai, tiah a rak chimtu Cathiang bia cu a tlin khawh kun hnga?”​—⁠Johan 18:11; Matthai 26:​52-54.

¹¹ Mah kong kha chikkhat in vun ruat ṭhan hmanh. A thin a hung ngaimi mubu nih an rak kulhmi, Jesuh nih khan a thihnak cu a phan dengmang cang ti le a Pa min thianternak le minung innchungkhar pi khamhnak cu amah a liang cungah khinh a si tikha a rak hngalh. Asinain, a caan kha a rak lak i Piter a lungchung ah a biapimi biatak kha a luh khawh nakhnga biahalnak a rak tuah. Hi nih hin biahalnak hna i man an ngeihning kha Jesuh nih a rak hngalh ti a fiang ko lo maw?

A Fiangmi Biaperhnak

12, 13. (a) Biaperhnak cu zeidah a si? (b) Jesuh nih kan unau hna an palhnak hmete va sawinak i hruh a sining kha langhter awkah biaperhnak kha zeitindah a rak hman?

¹² A phungchim rianṭuannak ah, Jesuh nih hmual a ngei ngaimi cawnpiakning lam pakhat a simi​—⁠biaperhnak kha atu le atu a rak hman. Hi cu a hmual a fah nakhnga caah perh hramhrammi a si. Jesuh nih biaperhnak kha hmangin, philh khawh ti lo dingin mi lungchung ah hmantlak a suai. Tahchuhnak tlawmpal kha kan zoh hna hmanh lai.

¹³ Tlang cung Cawnpiaknak ah, “midang va soi” lo awkah a rak forh hna lio ah khan, Jesuh nih hitin a ti: “Na mit chung i a ummi thingtan kha ruat ṭung loin zeicahdah na unau mit chung i a ummmi mithnawmte kha na zoh?” (Matthai 7:​1-3) Mah kha na mitthlam ah na cuanter kho maw? Mi soi a hmangmi pakhat nih a unau pa “mit” chung i mithnawmte cu lak piak a duh. Mi soitu nih cun a unau pa nih cohlan awk tlakmi biaceihnak cu a tuah khawh nakhnga thil fiangte in a hmu kho lo tiah a ti ko lai. Sihmanhsehlaw amah mi soitu theng nih bia a ceih khawhnak cu “thing tan” nih a rawhter​—⁠inncung dohtu ah hmanmi thingtan asiloah kaan a si kho men. Kanmah sualnak nganpi kan ngeih ko lio ah kan unaupa a palhnak hmete kha sawi cu zeitluk hruh dah a si ti kha hmual ngei ngaiin a langhtermi philh khawh lomi lam pakhat a si!

14. Zeiruang ahdah fikfa kha an zawt i kalauk kha an lemh timi Jesuh a bia cu a hlei in hmual a ngeimi biaperhnak a si?

¹⁴ Voidang tan ah, Jesuh nih Farasimi hna kha “lamhruaitu mitcaw hna, fikfa kha kan i din chih sual lai tiah, heh tiah nan zet, asinain kalauk kha nan lemh ṭung,” tiah a rak mawhthuk hna. (Matthai 23:24) Hi cu a hlei in a hmual a ṭhawng ngaimi biaperhnak a si. Zeiruang ahdah? Fikfa hmete le Jesuh a bia a ngaimi hna nih an theih balmi saram hna lakah a nganbikmi pakhat a si vemi kalauk tahchunh cu a fiang tukmi a si. An tuahnak ah fikfa nuai 70 cu buaktlak a simi kalauk pakhat i a khing he aa tlukmi a si! Farasi mi hna nih an mitsur zu kha puanchia in an zawt tikha Jesuh nih a rak hngalh. Kha terleng chai in phung aa tlaihmi nih fikfa an i dolh sual caah a phung ningin a thiang lomi an hun si nakhnga lo cuti cun an rak tuah. Asinain, a thiang ve ṭhiamṭhiam lomi, kalauk kha langhternak in an dolh. (Levitikas 11:​4, 21-24) Jesuh nih a rak chimmi cu a fiang tuk. Farasi mi hna nih Nawlbia lak i a hmebikmi kha ther le phang in an rak zulh, sihmanhsehlaw “dinnak le mi zangfahnak le zumh awk tlakmi sinak”​—⁠timi a ngan deuhmi konglam hna tu kha zei ah an rel lo. (Matthai 23:23) An sining kha fiang tuk in Jesuh nih a rak phuan!

15. Biaperhnak a hmannak thawngin Jesuh nih a cawnpiakmi tahchunhnak hna cu zei hna dah an si?

¹⁵ A phungchim rian a ṭuan chung pumpi, Jesuh nih biaperhnak kha atu le atu a rak hman. Tahchunhnak cheukhat hi ruat hmanh. “Anṭam ci tluk in a nganmi zumhnak” nih tlang hmanh kha a ṭhial khawh​—⁠ti cu zumhnak hmete hmanh nih thil tampi a tlam a tlinter kho timi kha fianter awkah mah nakin hmual a ngei deuhmi kha a um ti lo. (Matthai 17:20) Ṭhim ka chung luh awkah aa zuammi kalauk nganpi​—⁠nih mirum mi hna pumsa thilri an i tlaih bu in Pathian a rianṭuan awkah an i zuamnak i a harnak kha a fiang tuk in a langhter! (Matthai 19:24) Jesuh i a fiang ngaimi a biachimnak hna le bia tlawmpal tein hmual nganpi a ngeihtermi a thil ti khawhnak hna hi na khuaruah a har lo maw?

Al Khawh Lomi Tuaktannak

16. Jesuh nih a lung a varnak kha zeitilam indah a rak hman zungzal?

¹⁶ A tlingmi a ruahnak kha hmangin, Jesuh cu khua tuaktannak lei ah minung vialte lakah a thiam bikmi a si. Asinain, a thil tikhawhnak kha ningcang lo in a hmang lo. A cawnpiaknak ah, biatak a ṭhancho nakhnga a lung a varnak kha zungzal in a rak hman. A caancaan ah, biaknak lei ralchantu hna nih a hmaan lo piin sual an puhnak hna kha al awkah hmual a ngei ngaimi khua tuaktannak kha a rak hman. A cangmi tampi ah, a zultu hna kha a biapimi cawnpiaknak pek awkah Jesuh nih khua tuaktannak kha a rak hman. Khua tauktannak kha Jesuh nih thiam ngaiin a rak hmanmi kha kan zoh hna hmanh lai.

17, 18. Farasi mi hna nih a hmaan lo in an puhnak kha al awkah Jesuh nih zeibantuk a hmual a fakmi khua tuaktannak dah a rak hman?

¹⁷ A mit a caw i bia zong a holh kho lomi, khuachia nih a tuahmi pa kha Jesuh nih a rak damter lio kong kha ruat hmanh. Mah kong kha Farasi mi nih an theih tikah, hitin an rak ti: “Hi pa nih khuachia a ṭhawl khawh hna cu an bawipa Belzabul nih a bawmh caah a si.” Farasi mi hna nih Satan i a khuachia hna kha ṭhawl awkah zapi zaraan nakin a ṭhawng deuhmi mi pakhat a herh ti kha an hna a tla. Asinain, mi zapi cu Jesuh an zumhnak in khan pial hna seh tiin, Jesuh a ṭhawnnak kha Satan sinin a rami a si tiah an puh. Ṭha tein tuaktan in an rak ruat lo ti kha langhternak ah, Jesuh nih hitin a rak leh hna: “Ram pakhat cu a chungah anmah le anmah aa domi bu an um ahcun, cu ram cu saupi a hmun kho lai lo. Cun khua pakhat khat siseh, innchungkhar pakhat khat siseh, a chungah anmah le anmah aa domi bu an um ahcun a dir kho lai lo. Cucaah Satan pennak chungah hin bukhat le bukhat an i doh ahcun cu pennak cu aa ṭhen dih cang a si ko caah tuante ah a rawk ko lai.” (Matthai 12:​22-26) A hmaan tein Jesuh nih hitin a chim duhmi a si: ‘Nan chim bantuk in, Satan a rianṭuantu ka si i, Satan nih a rak tuahmi kha ka hrawh a si ahcun, Satan nih amah a rian lila kha a rak ralchanh a si hnga i a rauh hlan ah mahcu cu a rawk ko lai.’ Hmual a ngei ngaimi khua tuaktannak a si ko lo maw?

¹⁸ Hi kongah Jesuh nih tam deuh in a ruahceih pi hna. Farasi mi zultu cheukhat nih khuachia an rak ṭhawl ti kha a hngalh. Cucaah, bia sawhsawh te a si ko nain a hmual a fak ngaimi biahalnak kha a rak hal hna: “Nannih nih nan i thawh i, khuachia a ṭhawl khawhnak cu Belzebul nih nawl a pek caah a si, nan ka ti. Asi ahcun, nannih nan zultu hna kha tah, aho nihdah khuachia ṭhawl khawhnak nawl kha a pek kun hna?” (Matthai 12:27) Jesuh nih a rak chimduhmi cu hitin a si: ‘Satan ṭhawnnak in khuachia kha ka ṭhawl hna a si ahcun, nanmah nan zultu hna zong mah ṭhawnnak in an tuah ve tinak a si.’ Farasi mi hna nih zeidah an chim khawh ti lai? An zultu hna nih Satan a ṭhawnnak in an tuah ti in zeitikhmanh ah an ti bal lai lo. Al khawh lomi khua tuaktannak kha hmangin, Jesuh nih an puhnak a si khawh lo ning kha a rak langhter i nihchuak ah a ser.

19, 20. (a) Zeibantuk a ṭhami lam indah Jesuh nih khua tuaktannak kha a hman? (b) Jesuh cu a zultu hna nih thlacamning an rak halmi a rak leh hna lioah, ‘zeitluk indah a si chinchin lai’ timi khuaruahning kha zeitindah a hman?

¹⁹ Amah a ralchanhtu hna kha daihter awkah khua tuaktannak a hman lengah, thazang pemi le, lunghmuih termi Jehovah kong biatak kha cawnpiak awkah khua tuaktan ternak, cohlan awk tlak bia alnak kha a rak hman. ‘Zeitluk indah a si chinchin lai’ timi khuaruahter ning kha caan tampi a rak hmannak thawngin, a bia a ngaimi hna kha biatak he an i naih khawh deuh nakhnga a bawmh hna. Tahchunhnak pahnih tein zoh hna hmanh u sih.

²⁰ A zultu hna nih thlacam kan chim tiah an rak timi kha a rak leh hna lio ah, ‘ningzak lo in a hal peng’ caah a donghnak ah a halmi a rak pe duh lomi a hawipa nih a rak pek ṭhanmi pa kong bianabia kha a rak chim. Jesuh nih an “fale kha thilṭha pek” a duhmi nu le pa hna kong zong kha a rak chim. Cun hitin a rak ti: “Hi tluk i nan ṭhalo ko na hin nan fale kha thilṭha pek cu nan hngalh ahcun, vancung i a ummi nan Pa nih cun amah kha Thiangthlarau a halmi cu zeitluk indah a pek chinchin hna lai.” (Luka 11:​1-13) Jesuh nih a rak chimmi a kong cu, aa lomi cungah a rak bunhmi kha si lo in, aa ralchanhmi cungtu ah khan a rak si. Pekduhnak a ngei lomi hawi pakhat cu a innpa a herhbaunak kha a hnu ah pe dingin lem khawh a si ahcun, cun a tling lomi nu le pa nih an fale an herhmi kha an pek hna a si ahcun, dawtnak a ngeimi vancung kan Pa nih amah sin ah toidawr tein thla a cammi, zumh awk tlakmi a salle hna kha zeitluk indah thiang thlarau a pek chinchin hna lai!

21, 22. (a) Lungretheihnak kong he aa tlai in a ṭhami ruahnak a rak cheuh hna lioah Jesuh nih zeibantuk khuaruahning hna khadah a rak hman? (b) Jesuh cawnpiaknak ningcang tlawmpal kan zoh hnu ah, zeidah bia kan chah khawh?

²¹ Lungre theihnak he aa pehtlai in a ṭhami ruahnak cheuhnak a pek hna lioah Jesuh nih cubantuk khuaruahning kha a rak hman. Hitin a rak ti: “Langak khi zoh hmanh hna ngat u, thlaici an tuh lo, rawl zong an ṭuan lo, rawl chiahnak buk zong an ngei lo, rawl khonnak ruk zong an ngei lo; asinain Pathian nih a cawm ko hna. Nannih cu va nakin a let tampi in pei nan sun deuh cu. . . . Ramlak pangpar khi zeitindah an ṭhan ti kha zoh hmanh hna ngat u; rian zong an ṭuan lo, hnipuan zong an i tah fawn lo. . . . A kho sawhsawhmi ram a thomhtu hi Pathian pei a si cu. Nihin ah a um i thaizing ah cun a dih i meiphu i an paih menmi ram hna cu. Cucaah nannih cu an thuam chinchin ṭheo hna hnga lo maw. Nan zumhnak a va hme hringhran dah.” (Luka 12:​24, 27, 28) Asi, Jehovah nih va le pangpar hna hmanh kha a zohkhenh hna a si ahcun, a salle hna cu a zohkhenh chinchin hna lai! Cubantuk nemte le a hmual a ngei ngaimi khua ruahternak nih a bia a ngaimi hna an lungthin kha a suk ngaingai lai ti cu a fiang tuk ko.

²² Jesuh a cawnpiakning lam cheukhat hna kan zoh hnu ah, amah tlaih a rak tlolhmi palik hna nih hitin an rak chim tikah bia an perhmi a si lo ti kha fawi teiin kan hna a tla kho: “Hi pa bantuk hin ahohmanh nih bia an chim bal lo.” Sihmanhsehlaw Jesuh nih a rak hmanmi cawnpiakning hna ah a min a thangbikmi cu bianabia, asiloah tahchunhnak hna hmannak ah khan a si kho. Hi ningcang kha zeiruang ahdah a rak hman? Zeinihdah a bianabia hna cu hmual a ngeihter khun? Hi biahalnak hna kha a hun changmi capar ah kan i ruah te hna lai.

[A Tanglei Fianternak Hna]

Na Cinken Maw?

• Jesuh nih a fiangmi le a piangmi in mi a rak cawnpiak hna tikha zeibantuk tahchunhnak hna nihdah a langhter?

• Jesuh nih a cawnpiaknak ah zeiruang ahdah biahalnak hna kha a rak hman hna?

• Biaperhnak timi cu zeidah a si i, Jesuh nih hi cawnpiakning hi zeitindah a rak hman?

• Jesuh nih a zultu hna cu duh a nungmi Jehovah kong biatak kha a cawnpiak tik hna ah khua tuaktanternak kha zeitindah a rak hman?

[Cahmai 6nak i Hmanthlak]