“Mithi Thawhter An Si A Pakhatnak”—Atu Aa Thawk Cang!
“Khrih zum bu in a rak thimi kha nunnak ah thawhter an si hmasa lai.”—1 THESALON 4:16.
1, 2. (a) Mithi caah zei ruahchannak dah a um? (b) Thawhṭhannak kha zei cung hngat in dah na zumh?
“ANUNGMI nih cun kan thi lai ti kha an hngalh.” Adam nih sualnak a rak tuah hnu ah cu bia cu a rak hmaan. Minung tuanbia chungah hrinmi paoh nih a donghnak ah kan thi lai ti kha an hngalh i mi tampi nih ‘Cu hnu ah zeidah a cang lai?’ ti kha hngalh an duh. Mithi sining cu zeidah a si? Baibal nih hitin a chim: “A thimi nih cun zeihmanh an hngal lo.”—Phungchimtu 9:5.
2 Mithi caah ruahchannak a um maw? A um. Minung ca i Pathian tinhmi a tlin tikah a si lai. Kum zabu tampi chung Pathian cung zumhfekmi salle nih Satan le Satan ruangah a chuakmi ṭhatlonak a hrawktu ding Tefa he aa pehtlaimi Jehovah biakam an zumh kha an langhter. (Genesis 3:15) A tamdeuh cu an thi cang. Jehovah kamhmi mah biakam le a dang biakam hna a tlinmi kha an hmuh nakhnga thihnak in an thawh ṭhan a herh. (Hebru 11:13) Cucu a si kho hnga maw? A si kho ko. Lamkaltu Paul nih hitin a rak ti: “Minung hi mi ṭha he mi ṭhalo he thihnak in kan tho ṭhan dih lai.” (Lamkaltu 24:15) Cungdot khan in a tla i a “thimi” Zutikhas kha Paul nih a rak nunter ṭhan. Mah cu Baibal ah ṭialmi thawh-ṭhannak pakua lak ah pakhat a si.—Lamkaltu 20: 7- 12.a
3. Johan 5:28, 29 ah ṭialmi Jesuh bia in nangmah theng zei hnemhnak dah na hmuh?
3 Thawhṭhannak pakua cu Paul chimmi zumh awkah a hrampi an si. Mah nih Jesuh chimmi hi biakam cungah kan zumhnak a fehter: “Thlan chung i a ummi mithi vialte nih [Jesuh] aw an theih lai caan kha a ra lio.” (Johan 5:28, 29) Zei tluk duhnungmi bia dah an si! An dawtmi nih a thih takmi nuai tampi caah hnemtu a va si dah!
4, 5. Zei aa phun dangmi thawhṭhannak kong dah Baibal nih a chim i, hi capar ah zei kong dah kan i ruah lai?
4 A thoṭhanmi a tam deuh cu Pathian Pennak tang i a daimi hi vawlei cungah an tho lai. (Salm 37:10, 11, 29; Isaiah 11:6-9; 35:5, 6; 65:21-23) Asinain mah thawhṭhannak a um hlan ah thawh-ṭhannak dang a rak um cang. Hmasa bik ah, Jesuh cu kan caah Pathian sin i raithawinak man pek awkah a rak thoṭhan cang. A.D. 33 ah Jesuh cu a rak thi i a thoṭhan cang.
5 A hun changtu ah “Pathian mi” a simi chiti thuhmi hna cu ‘Pathian sinah zungzal um’ in vancung sunparnak hmuh awkah Bawi Jesuh Khrih he an i tong lai. (Galati 6:16; 1 Thesalon 4:17) Cucu “mithi thawhter an si a pakhatnak” tiah ti a si. ( Biathlam 20:6) Cu thawhṭhannak a dih tikah nuai tampi hna cu paradis ah zungzal nun ding ruahchannak he vawlei cungah an tho lai. Kan i ruahchanmi cu vancung a si ah siseh, vawlei a si ah siseh “mithi thawhter an si a pakhatnak” kong kha hngalh kan duh awk a si. Zei bantuk phun thawhṭhannak dah a si? Zeitik ah dah a tlin lai?
“Zei Bantuk Pum Dah A Ngeih Lai?”
6, 7. (a) Chiti thuhmi Khrihfa pawl van an kai hlan ah zeidah an ton hmasa lai? (b) Zei bantuk pum in dah an thawhṭhan lai?
6 Korin Khrihfabu sin a ṭialmi a cakuat pakhatnak ah Paul nih thawhṭhannak a pakhatnak he aa tlaiin “zeitindah mithi cu nunnak ah thawhter a si khawh lai?” Zei bantuk pum dah a ngeih lai” tiah biahalnak a rak tuah. Mah biahalnak kha hitin a rak leh: “Vawlei i thlaici na tuh tikah a thih hmasa lo ahcun a keuh ṭung lo. . . . Pathian nih cu cite cu a duhmi pum kha a pek ko; . . . Van pum hna nih dawhnak phun khat an ngei i vawlei pum hna nih dawhnak phun dang an ngei ve.”—1 Korin 15:35-40.
7 Thiang thlarau in chiti thuhmi Khrihfa hna cu vancung laksawng an hmuh hlan ah an thi hmasa lai ti kha Paul chimmi bia nih a langhter. An thih tikah an vawlei pum cu leidip ah a kir ṭhan. (Genesis 3:19) Pathian rikhiahmi caan ah vancung nunnak he aa tlakmi pum in an thoṭhan. (1 Johan 3:2) Pathian nih a thi kho lomi nunnak zong a pek hna. Cucu minung chimmi i chuahpimi a thi kho lomi thlarau a si lo. “A thi khomi hi thih khawh lonak in thuamh a si lai” tiah Paul nih a ti. A thi kho lomi hi Pathian pekmi laksawng, a pakhatnak thawhṭhannak ah aa telmi nih an i “thuamh” lai..—1 Korin 15:50, 53; Ge-nesis 2:7; 2 Korin 5:1, 2, 8.
8. Pathian nih 144,000 hna kha biaknak a phunphun chungin a thim hna lo kha zeitindah kan hngalh?
8 144,000 lawng a pakhatnak thawh-ṭhannak ah an i tel. Jehovah nih Jesuh a thawhter hnu tlawmpal A.D. 33 Pentekos ni ah a rak thim hna. An dihlak in ‘an cal ah [Jesuh] min le a Pa min khenhmi kha an si.’ (Biathlam 14:1, 3) Cu ruangah, biaknak a phunphun chung in thimmi an si lo. An dihlak in Khrih zultu an si i Pa min Jehovah kha uangthlar ngaiin an cohlan. An thawh-ṭhan tikah vancung ah ṭuan awk rian pek an si. Cuticun Pathian rian dairek in ṭuan awk ruahchannak cu an caah lungthawhter tu ngai a si.
Atu Aa Thawk Cang Maw?
9. A pakhatnak thawhṭhannak zei tikah aa thawk ti kha hngalh awkah Biathlam 12:7 le 17:14 nih zeitindah a kan bawmh?
9 Zei tik ah dah a pakhatnak thawh-ṭhannak aa thawk? Atu ah aa thawk hrimhrim cang ti a langhtertmi a um. Tahchunhnak ah, Biathlam a ngan pahnih hi tahchunh hmanh. Hmasa bik ah Biathlam dal 12 kha zoh. Cuka ah siangpahrang a ṭuan thar Jesuh Khrih le a vancung mi thiang hna nih Satan le a khuachia pawl an doh hna nak kong kan rel. (Biathlam 12:7-9) Mah cauk ah atu le atu aa ṭial bantukin cu raltuknak cu 1914 ah aa thawk.b Asinain chiti thuhmi Khrih zultu pakhat hmanh mah raltuknak ah Jesuh he an umṭi tiah a ti lo kha i cinken. Atu cu Biathlam dal 17 kha zoh. Cuka ah “a liannganmi Babilon” hrawh a si hnu ah tufa nih miphun hna kha a tei hna lai tiah kan rel. Cun hitin a ti: “Tufa le Tufa nih a kawh hna i a thim hna i zumh awk tlak zultu a simi hna nih khan an tei hna lai.” (Biathlam 17:5, 14) ‘Kawh i thimmi zumh awk tlak zultu’ hna cu Satan vawlei a donghnak teinak ah Jesuh he an umṭi lai ti a si ahcun annih cu an thawhṭhan cang awk a si lai. Cu a si caah Armageddon hlan ah a thimi chiti thuhmi hna cu 1914 le Armageddon karlak caan khatkhat ah an tho-ṭhan lai.
10, 11. (a) Upa 24 cu ahote dah an si i, an lak i pakhat nih Johan kha zeidah a chimh? (b) Mah khan zeidah kan hngalh khawh?
10 A pakhatnak thawhṭhannak aa thawk caan set te kha na chim kho lai maw? Biathlam 7:9-15 ah hngalh duh awk a hliah pakhat kha kan hmuh. Cuka ah lamkaltu Johan nih “mibu nganpi, ahohmanh a rel in rel cawk lomi” hna he aa tlaimi langhnak kong a chim. Mibu nganpi aho an si Johan sin a chimtu cu upa 24 lak i pakhat a si i mah upa hna nih khan Khrih he vancung ro a co hngami roco hawi 144,000 kha a aiawh.c (Luka 22:28-30; Biathlam 4:4) Amah Johan theng hi vancung ruahchannak a ngeimi a si nain mah upa nih a sin i bia a chim lio ah minung pakhat in vawlei i a um lio a si caah mah langhnak ningin Johan nih vancung ro a co rih lomi vawlei cung thlarau chiti thuhmi hna kha a aiawh hna lai.
11 Cu a si caah upa 24 lak i pakhat nih Johan sin i mibu nganpi ahote an si a chimmi bia in zei dah kan hngalh khawh? Tuchan upa 24 lak i a thoṭhan cangmi hna cu Pathian kong biatak theihternak ah tel dawh an si. Cucu zeicah a bia pit? Mibu nganpi ahote an si kha 1935 ah vawlei cung i Pathian chiti thuhmi salle sinah phuan a si caah a si. Upa 24 lak i pakhat cu mah a biapimi biatak phuan awk i hman a si ahcun a tlawm bik in 1935 ah vancung ah a thoṭhan cangmi a si lai. Mah nih a pakhatnak thawhṭhannak cu 1914 le 1935 karlak caan khatkhat ah aa thawk ti kha a langhter. Cu nak fiang deuh in chim khawh a si ti maw?
12. A pakhatnak thawhṭhannak cu 1918, ṭhal a hung chuahka ah a si kho tiah zeicah ti khawh a si kha fianter.
12 Cu kong he aa tlaiin Baibal chung i aa lomi pakhat tuaktan cu bawmtu a si kho. Jesuh Khrih cu A.D. 29 a dih lai ah Pathian Pennak ah siangpahrang ṭuante dingin chiti thuh a rak si. Kum thum le a cheu a rauh hnu, A.D. 33 ṭhal a hung chuahka ah a ṭhawngmi thlarau pakhat in a rak thoṭhan. Cu a si caah Jesuh cu 1914 kum dih lai ah siangpahrang ah ser a si caah kum thum le a cheu a rauh hnu 1918 ṭhal a hung chuahka ah an tho-ṭhan tiah ti khawh a si hnga maw? A si kho ko. Baibal ah cuticun dairek in aa ṭial lo nain a pakhatnak thawhṭhannak cu Khrih a phanh hnu a rauh hlan ah a si tiah ti cu Baibal cang dangdang he aa ral kah lo.
13. A pakhatnak thawhṭhannak cu Khrih a phanh caan a hram thawk ah a si ti kha 1 Thesalon 4:15-17 nih zeitindah a langhter?
13 Tahchunhnak ah Paul nih hitin a rak ṭial: “Bawipa a rat ni ah kannih a nungmi hna nih hin a thimi kha kan chawhkanh hna lai lo. Au thawng, vancung mi bawibik au thawng Pathian muko aw thawng cu a hung thang lai i Bawipa hrimhrim cu vancung khin a rung ṭum lai. Khrih zum bu in a rak thimi kha nunnak ah thawhter an si hmasa lai i cu caan i a nung rihmi kannih pawl cu khuadawm lakah khin Bawipa cu van i hung ton awkah pumh kan si dih lai. Cun Bawipa sinah cun zungzal in kan um lai.” (1 Thesalon 4:15-17) Cucaah Khrih phanh hlan i a thimi chiti thuhmi Khrihfa hna cu Khrih a phanh caan chung i a nung rihmi hna nakin tuan deuh ah vancung ah an thoṭhan lai. Cucaah a pakhatnak thawhṭhannak cu Jesuh phanh caan a hram thawk ah aa thawk lai tinak a si i cucu ‘Khrih rat caan chung’ ah a um peng lai. (1 Korin 15:23) Voikhat ah zapi in thawhṭhan si loin a pakhatnak thawhṭhannak caan caan khat chungah a si lai.
“Annih Cu Puan Rang Pakhat Cio An Pek Hna”
14. (a) Biathlam dal 6 i aa ṭialmi langhnak cu zeitik ah dah a tlin? (b) Biathlam 6:9 ah zeidah langhter a si?
14 Biathlam dal 6 i a ummi kong zong kha ruat hmanh. Cuka ah Jesuh cu teitu siangpahrang pakhat in rang aa cit kha kan hmuh. (Biathlam 6:2) Miphun hna cu raltuknak ah an hung i teltum ngai. (Biathlam 6:4) Hmunkip ah mangṭam a um. (Biathlam 6:5, 6) Mi a that khomi rai ruangah mi cu an thi. (Biathlam 6:8) Cu chimchungbia vialte cu 1914 thawk in vawlei cung i a ummi thil sining he aa khat tuk. Asinain a um hnga dingmi thil a um rih. Raithawinak nih kan lungthin kha a lak. ‘Pathian bia an chim ruangah le Pathian tehte an si ruangah an thahmi hna thlarau’ kha raithawinak toi ahcun an um. (Biathlam 6:9) “Titsa nunnak cu thi chungah a um” caah raithawinak toi ah a ummi hna nih ralṭha te le lungtho tein tehte an khan ruangah thah a simi zumhawktlak Jesuh salle thisen kha a langhter taktak.—Levitikas 17:11.
15, 16. Biathlam 6:10, 11 bia cu a pakhatnak thawhṭhannak he zeiruang ah aa pehtlaih kha fianter.
15 Miding mi Abel thisen bantukin an zumhnak caah a thimi mah Khrihfa hna i thisen cu dingte in biaceihpiak awkah an au. (Genesis 4:10) “Fakpi in an au i, ‘A lianngan bik Pathian, a thiang i a taktak a simi Pathian, vawlei cungmi, a kan thattu hna hi zei can dah kan phu hlam loin na um hna lai i an biaceih loin na um hna lai’ an ti.” Cu hnu ah zeidah a hung cang? “‘Annih cu puan rang pakhat cio an pek hna i tlawmte in i din ko rih u. Nanmah bantuk in thihnak a ing ve ding nan sal hawile nan unau hna an tling rih lo,’ tiah an ti hna.”—Biathlam 6:10, 11.
16 Raithawinak toi ah a ummi thi kha puan rang an pek hna maw a si? A si lo! Raithawinak cungah thi theh bantukin a thimi kha puan cu an pek hna. Jesuh min caah an nunnak kha an i pe i atu cu thlarau in an thoṭhan cang. Cucu zeitindah kan theih? Biathlam a hramthawk ah hitin kan rel: “Teitu a simi hna cu hi bantukin puan rang an i aih lai i a nungmi hna cauk chung khan an min cu ka hlo lai lo.” Upa 24 hna zong ‘puan rang an i aih i sui luchin an i chinh’ kha philh hlah. (Biathlam 3:5; 4:4) Ral, mangṭam le rai cu vawlei cung pumpi kha a phan i raithawinak toi i thi kha a aiawhmi a thi cangmi 144,000 chungmi hna cu vancung nunnak ah an thoṭhan cang i langhternak in puan rang kha an i aih.
17. Puan rang pek a simi hna cu zei ti phun in dah an i ‘dinh’ lai?
17 A thoṭhanmi mithar hna cu an i “din” ta lai. Annih nih Pathian phuhlam ni tiang kha lungsau tein an hngah lai. An “sal hawi” a simi vawlei cung i a taang rihmi thlarau chiti thuhmi Khrihfa hna tu cu hneksaknak tangah an zumhfehnak kha langhter a hau rih. Pathian biaceih caan a phanh tikah ‘dinh’ caan cu a dih te lai. (Biathlam 7:3) Cu tikah a thoṭhanmi hna cu Jesuh Khrih he an ṭangṭi lai i a sual lomi Khrihfa hna thisen a chuahtu telin miṭhalo vialte kha hrawhnak ah an i tel lai.—2 Thesalon 1:7-10.
Cucu Kan Caah Zei Sullam Dah A Ngeih
18, 19. (a) A pakhatnak thawhṭhannak cu atu aa thawk cang tiah zei ruangah na chim khawh? (b) A pakhatnak thawhṭhannak kong na hngalhmi nih zeitindah an umter?
18 Baibal nih a pakhatnak thawh-ṭhannak cu cu ni set ah a si lai tiah a langhter lo nain Khrih phanh caan, caan caan khat chung ah a si lai tiah a langhter. Hmasa bik ah a thoṭhanmi hna cu Khrih phanh hlan ah a thimi chiti thuhmi pawl an si. Khrih phanh caan chungah zumhawktlak tein an vawlei nunnak a dihmi chiti thuhmi hna cu “mit ṭhep” ah a ṭhawngmi thlarau ah an i thleng. (1 Korin 15:52) Thlarau chiti thuhmi an zapi in Armageddon raktuk ni hlan ah vancung laksawng kha an co lai maw? Kan hngal lo. Asinain Pathian khiahmi caan ah 144,000 an zapi in vancung Zion Tlang ah an dir lai ti kha kan hngalh.
19 144,000 chung i a tamdeuh cu Khrih he an umṭi cang ti zong kha kan hngalh. Tlawmte lawng vawlei ah an taang cang. Cu nih Pathian biaceih caan a naih tuk cang kha fiang tein a langhter! A rauhhlan ah Satan vawlei pumpuluk cu hrawh a si cang lai. Satan theng khor thuk chungah an thlak lai. Cu hnu ah zapi thawhṭhannak aa thawk lai i zumhawktlakmi minung pawl cu Jesuh tlanhnak man hram bunh in Adam sunghmi mitling sinak kha an hmu kho lai. Genesis 3:15 i ṭialmi Jehovah chimchungbia cu khuaruahhar in a hung tling lai. Cu caan i nun cu tinvo sung taktak a va si dah!
[A Tanglei Fianternak]
a Khrih cu 1914 ah a phan ti Baibal langhtermi kha Jehovah Hngaltu hna chuahmi Baibal Cawnpiakmi Taktak Cu Zei Dah A Si? timi cauk cahmai 215-218 kha zoh.
b Upa 24 nih vancung ah a ummi chiti thuhmi Khrihfa pawl a aiawh hna hngalh khawh awk a konglam kha Jehovah Hngaltu hna chuahmi Biathlam cauk—A Tlin Lai Caan Cu A Naite Cang! Ṭhen 14, cahmai 8-11 kha zoh.
c Thawhṭhannak a dang pariat kha 1 Siangpahrang 17:21-23; 2 Siangpahrang 4:32-37; 13:21; Marka 5:35, 41-43; Luka 7:11-17; 24:34; Johan 11:43-45 le Lamkaltu 9:36-42 ah zoh.
Na Fianter Kho Lai Maw?
A tanglei Baibal cang hna nih “mithi thawhter an si a pakhatnak” caan hngalhthiam awkah zeitindah a kan bawmh?
• 1 Korin 15:23; 1 Thesalon 4:15-17