Me

Zeova in met sa kat Levanzil dan son Parol pour ed nou aprann konn son Garson. Sa bann Levanzil i koz lo lavi Zezi ek son minister. I osi montre nou sa ki Zezi ti dir, fer e lafason ki i ti santi. Sa kat Levanzil i ed nou pour “reflesir byen lo legzanp” Zezi. Sa bann resi dan sa kat Levanzil, i parey bann lepa ki Zezi in kit deryer. Alor, ler nou etidye sa kat Levanzil, nou kapab aprann konn Zezi pli byen e swiv son lepa fidelman. Pour nou kapab aplik sa ki i dir dan bann Levanzil, nou bezwen fer plis ki zis lir. Nou bezwen pran letan pour etidye e medit lo sa ki nou lir. (Konpar Zozye 1:8.) Fer bann resi dan Levanzil vin pli reel pour ou. Servi ou limazinasyon pour vwar, tande e santi sa ki ti pe arive.Fer resers dan bann piblikasyon ki lorganizasyon Zeova i donnen. w21.04 4-5 ¶11-13

Plizyer santenn lannen avan ki Zezi i vin lo later, Zeova ti’n fer ekri dan Labib ki Mesi ti pou ganny trai pour 30 pyes larzan. (Zek. 11:12, 13, NWT) Sa enn ki ti pou trai Mesi ti pou enn parmi son bann zanmi pros. (Ps. 41:9, NWT) Profet Zekarya ti ekri: “Touy berze e bann ki dan troupo pou ganny disperse.” (Zek. 13:7, NWT) Ler bann dimoun senser ti pou vwar sa bann keksoz arive, zot pa ti pou rezet Zezi. O kontrer zot lafwa ti pou vin pli for ler zot vwar bann profesi pe ganny akonplir konsernan Zezi. Eski i annan sa menm problenm ozordi? Wi. Dan nou letan, serten Temwen Zeova byen koni in aret servi Zeova. Zot in vin aposta e zot in esey fer lezot aret servi Zeova. Zot in koz an mal e koz mansonz lo Temwen Zeova. Zot in rakont bann zistwar lo Temwen Zeova pour anbet dimoun. Zot in fer sa dan bann zournal, lo radyo, lo televizyon e lo Enternet. Me bann ki senser pa les zot ganny anbete. O kontrer zot konnen ki Labib ti predir ki sa bann keksoz ti pou arive.​—Mat. 24:24; 2 Pyer 2:18-22. w21.05 11 ¶12; 12-13 ¶18-19

Labib i dir ki pep Zeova pou konpran laverite pli byen anmezir ki letan i pase. (Kol. 1:9, 10) Zeova i fer konn laverite ptitapti e nou devret pare pour esper avek pasyans ziska ki nou konpran laverite pli byen. Ler Konsey Direkter i vwar ki nou bezwen fer azisteman dan nou konprenezon, zot fer sa sanzman deswit. En kantite larelizyon ozordi i sanz zot bann lansennyman akoz zot anvi fer plezir zot bann dimoun ouswa zot anvi vin popiler. Me Temwen Zeova i fer bann sanzman parski nou anvi vin pli pros avek Bondye e ador li dan menm fason ki Zezi ti ador li. (Zak 4:4) Ler nou fer bann sanzman, nou pa fer li akoz lopinyon bann dimoun dan sa lemonn in sanze me akoz nou konpran Labib pli byen. Nou kontan laverite!​—1 Tesa. 2:3, 4. w21.10 22 ¶12

Ki ou kapab fer si ou santi ou tousel? Mazin lafason ki Zeova pe ed ou. (Ps. 55:22) Sa pou ed ou pour vwar ki ou pa tousel. Mazin osi lafason ki Zeova pe ed nou bann frer ek ser ki santi zot tousel. (1 Pyer 5:9, 10) En frer ki apel Hiroshi, ki pour plizyer lannen i sel Temwen Zeova dan son fanmir, i dir: “Nou konnen ki nou tou, nou pe fer nou mye pour servi Zeova e sa i kapab ankouraz tou bann parmi nou ki tousel dan laverite.” Nou osi priye, lir Labib e asiste renyon regilyerman. Ou devret dir Zeova egzakteman sa ki ou pe santi. I enportan pour lir Labib regilyerman e medit lo bann resi ki montre ki Zeova i kontan ou. Serten serviter Zeova ti aprann bann verse rekonfortan parker parey Psonm 27:10 ek Izai 41:10. Lezot i ekout lanrezistreman odyo bann piblikasyon ki pou ganny etidye pandan renyon oubyen ler zot pe lir Labib. Zot dir ki sa i ed zot pour pa santi zot tro tousel. w21.06 9-10 ¶5-8

Eski ou dan dey akoz en dimoun ki ou kontan in mor? Pran letan pour lir bann resi dan Labib konsernan bann dimoun ki ti ganny resisite, sa pou ranforsi ou lafwa dan rezireksyon. Eski ou sagren akoz en manm ou fanmir in ganny ekskli dan kongregasyon? Etidye Parol Bondye pour konvenk ou lekor ki lafason ki Bondye i disiplin nou, i toultan sa ki pli bon. Nenport problenm ki ou pe fer fas avek, servi sa konman en loportinite pour ranforsi ou lafwa. Devid ou leker avek Zeova. Pa izol ou lekor me reste pros avek bann frer ek ser. (Prov. 18:1, NWT) Fer bann keksoz ki pou ed ou andire, menm si ou plere ler ou mazin konsernan sa ki’n arive avek ou. (Ps. 126:5, 6, NWT) Kontinyen asiste bann renyon, anons sa bon nouvel e lir Labib. Kontinyen mazin konsernan bann bon keksoz ki Zeova in promet pour donn ou dan lavenir. Anmezir ki ou vwar lafason ki Zeova i ed ou, ou lafwa dan li pour vin pli for. w21.11 23 ¶11; 24 ¶17

Dan ki fason bann disip Zezi i parey bann zanfan? Lekel ki dimoun dan sa lemonn i konsider konman enportan? Dimoun ki ris, popiler e bann ki annan lotorite. Me laplipar disip Zezi pa konmsa. (1 Kor. 1:26-29) Alor, dimoun dan lemonn i mazinen ki zot pa enportan me Zeova pa vwar zot dan sa fason. Akoz Zezi ti koz lo “sa bann dimoun ki parey en zanfan”? Bann disip Zezi ti demann li: “Lekel ki pli gran dan Rwayonm lesyel?” (Mat. 18:1) En kantite Zwif ti anvi ki lezot i vwar zot enportan. En spesyalis Labib i dir: “Sa keksoz ki ti pli enportan dan zot lavi ti pou ganny loner e vin popiler.” Zezi ti konnen ki en kantite Zwif ti krwar ki i enportan pour zot pli siperyer ki lezot, alor son bann disip ti bezwen fer bokou zefor pour sanz zot fason panse. w21.06 20 ¶2; 21 ¶6, 8; 22 ¶9

Zapot Pol ti en bon ansyen e i’n kit en bon legzanp. Par egzanp, Pol ti donn bann frer ek ser Tesalonik konsey ler zot ti bezwen. Me avan ki Pol ti donn zot konsey, i ti felisit zot pour zot travay fidel, zot travay dir ki zot fer avek lanmour e zot landirans. I ti osi mazin lo sa ki zot ti pe pas atraver e i ti dir zot ki i konnen ki zot lavi pa ti fasil e ki zot ti pe andir persekisyon fidelman. (1 Tesa. 1:3; 2 Tesa. 1:4) I ti menm dir zot ki zot ti bann bon legzanp pour lezot Kretyen. (1 Tesa. 1:8, 9) Sa bann frer ek ser ti vreman kontan ki Pol ti’n felisit zot. I ti napa okenn dout ki Pol ti kontan zot en kantite. I pour sa rezon ki dan sa de let ki Pol ti ekri bann Tesalonisyen i ti kapab donn zot bann bon konsey.​—1 Tesa. 4:1, 3-5, 11; 2 Tesa. 3:11, 12. w22.02 15 ¶6

Satan i servi bann sef fo larelizyon pour dir ki Zeova i kriyel e i fer bann imen soufer. Serten i menm dir ki ler en zanfan i mor, Bondye ki’n pran li parski i bezwen plis lanz dan lesyel. Sa i vreman en mank respe pour Bondye. Me nou, nou konnen ki Zeova i en Papa ki kontan nou. Ler nou annan en maladi grav ouswa en dimoun ki nou kontan i mor, nou pa zanmen blanm Bondye. O kontrer, nou krwar ki en zour i pou geri bann malad e resisit bann mor. Nou kapab dir avek tou dimoun ki anvi ekoute, ki Zeova i en Bondye ki kontan nou. Sa pou fer ki Zeova i kapab reponn sa enn ki pe provok li. (Prov. 27:11, NWT) Zeova i en Bondye ki annan konpasyon. I vreman sagren ler i vwar nou pe soufer petet akoz nou pe ganny persekite, akoz nou malad oubyen akoz nou lenperfeksyon. (Ps. 22:23, 24) Zeova i konpran nou soufrans. I anvi ki nou aret soufer e i pou tir sa ki pe fer nou soufer.​—Konpar Egzod 3:7, 8; Izai 63:9, NWT. w21.07 9-10 ¶9-10

Byento bann imen obeisan pou ganny sa pli gran loner pour kontan Zeova e pour ador li pour touzour. Zezi pou retir tou problenm ki desizyon Adan ek Ev in anmennen ler zot ti deside pour kit fanmir Bondye. Zeova pou resisit plizyer milyon dimoun pour donn zot sa loportinite pour viv pour touzour avek en lasante parfe. Zot pou viv lo later ki pou’n vin en paradi. (Lik 23:42, 43) Ler bann imen ki servi Zeova pou’n vin parfe, zot tou zot pou annan sa “laglwar ek splander” ki David ti koz lo la. Si ou form parti sa “gran lafoul,” ou annan en zoli lespwar. (Rev. 7:9) Bondye i kontan ou e i anvi ki ou form parti son fanmir. Alor fer tou sa ki ou kapab pour fer li plezir. Gard promes Bondye dan ou lespri ek ou leker toulezour. Apresye sa privilez ki ou annan pour ador ou Papa ki dan lesyel e apresye sa lespwar ki ou annan pour ador li pour touzour! w21.08 7 ¶18-19

Profet Zeremi ti anons mesaz Bondye pour plis ki 40 an menm si dimoun pa ti ekout li e zot ti opoz li. Dimoun ti ‘ensilte e monk’ li e sa ti fer li sitan dekouraze ki i ti anvi aret anons mesaz Bondye. (Zer. 20:8, 9) Me Zeremi pa ti abandonnen. Kwa ki ti ed li pour kontinyen e pour trouv lazwa? I ti konsantre lo de keksoz. Premyerman, ki sa mesaz ki i ti pe anons sa pep ti pou donn zot “en lavenir ek en lespwar.” (Zer. 29:11, NWT) Dezyenmman, Zeova ti’n swazir Zeremi pour port son non e pour anons son mesaz avek bann dimoun. (Zer. 15:16) Nou osi nou anons en mesaz lespwar e nou port non Zeova. Ler nou konsantre lo sa, nou kapab zwaye ki swa dimoun i ekout nou oubyen non. Alor, pa dekouraze ouswa abandonnen si i pe pran plis letan ki ou ti pe ekspekte. I pran letan pour en dimoun devlop lafwa.​—Zak 5:7, 8. w21.10 27 ¶12-13

Nenport ki kantite letan ki nou’n servi Zeova, nou bezwen kontinyen batir nou lafwa dan li. Akoz? Parski si nou pa fer atansyon, nou lafwa pou afebli. Parey nou’n vwar, lafwa i baze lo levidans konsernan bann keksoz ki nou pa vwar. I kapab fasil pour oubliy sa ki nou pa kapab vwar. Alor Pol ti dir ki en mank lafwa i en “pese ki kapab fasilman anpay nou.” Me ki mannyer nou kapab fer sir ki nou lafwa i reste for? (2 Tesa. 1:3) Premyerman, sipliy Zeova regilyerman pour li donn ou son lespri sen. Akoz? Parski lafwa i en kalite ki lespri sen i ed nou pour devlope. (Gal. 5:22, 23) Nou pa kapab batir nou lafwa dan nou Kreater san led son lespri sen. Si nou kontinyen demann Zeova son lespri sen, i pou donn nou. (Lik 11:13) Nou kapab priye e dir: “Donn nou plis lafwa.” (Lik 17:5) Ou osi kapab etidye Parol Bondye regilyerman.​—Ps. 1:2, 3. w21.08 18-19 ¶16-18

Bann frer ek ser aze i kapab ed lorganizasyon Zeova dan en kantite fason. I kapab ki zot nepli annan lafors parey avan me zot annan en kantite leksperyans ki zot in gannyen pandan plizyer lannen. Zeova i kapab kontinyen servi zot dan diferan fason.Par egzanp, dan Labib, i annan legzanp bann serviter fidel ki ti kontinyen servi Zeova dan zot vye zour. Par egzanp ler Moiz ti dan son bann 80 an, Zeova ti swazir li konman son profet e pour diriz nasyon Izrael. Ler Danyel ti dan son bann 90 an, Zeova ti ankor pe servi li konman en profet. I tre probab ki zapot Zan ti dan son bann 90 an ler i ti ganny enspire pour ekri liv Revelasyon. Labib pa koz bokou lo Simeon ki “ti en zonm drwat e [ki] ti annan respe pour Bondye.” Me Zeova ti konn li e i ti donn sa loner pour vwar Zezi ler i ti ankor en pti baba e pour profetize konsernan Zezi ek son manman.​—Lik 2:22, 25-35. w21.09 3-4 ¶5-7

Paran pa devret konpar zot zanfan avek kanmarad oubyen ekspekte ki en zanfan i fer plis ki i kapab. Si paran i fer sa, zot kapab dekouraz zot zanfan. (Efe. 6:4) En ser ki apel Sachiko i dir: “Mon manman pa ti anvi mon fer okenn fot dan mon legzanmen. Me sa ti enposib. Menm si i fer plizyer lannen ki mon’n fini lekol, parfwa mon santi ki menm si mon pe donn Zeova mon meyer, Zeova pa satisfe.” Lerwa David ti dir ki i pa “tay deryer bann keksoz ki tro gro” oubyen bann keksoz ki gran pour li. Vi ki i ti annan limilite, i ti kontant li avek sa ki i annan e i ti ere. (Ps. 131:2, NWT) Ki bann paran i kapab aprann avek sa ki David ti dir? Paran i kapab demontre limilite ler zot pa ekspekte tro bokou avek zot lekor e avek zot zanfan. Paran i kapab fer zot zanfan santi ki zot ganny apresye ler zot rekonnet sa ki zot zanfan i kapab fer e sa ki i pa kapab fer. Apre, i ed son zanfan pour met bann lobzektif ki i kapab atenn. w21.07 21 ¶5-6

Nou bezwen rapel ki Zeova in donn nou tou sa liberte pour swazir. Sa i vedir ki nou kapab swazir si nou pou obei li ouswa non. I annan serten zenn ki ti napa bann paran ki ti bann bon legzanp me zot in deside pour servi Zeova e zot fidel avek li. I annan lezot ki zot paran in travay dir pour ansenny zot pour kontan Zeova e pli tar zot in aret servi Zeova. Sa i montre ki nou tou nou bezwen deside si nou pou servi Zeova. (Zoz. 24:15) Alor, paran ki sagren akoz ou zanfan in aret servi Zeova, pa bezwen krwar ki sa i ou lafot! Parfwa en papa oubyen en manman i aret servi Zeova e i menm kit son fanmir. (Ps. 27:10) Sa i kapab afekte bann zanfan ki annan respe pour zot paran e ki vwar zot paran konman en legzanp pour zot. Zenn, si ou manman oubyen ou papa in ganny ekskli dan kongregasyon, ou kapab asire ki Zeova i konnen ki kantite sa in bles ou. I kontan ou e i kontan ki ou pe kontinyen servi li fidelman. Rapel ki pa ou ki responsab pour bann desizyon ki ou paran i fer. w21.09 27 ¶5-7

Nou kapab konpar en dimoun ki’n ganny ekskli dan kongregasyon avek en mouton ki annan en maladi kontazyez e ki kapab enfekte troupo. Vi ki sa dimoun i nepli annan en bon lanmitye avek Zeova, i parey en dimoun ki malad. (Zak 5:14) Parey en dimoun ki annan en maladi kontazyez, en dimoun ki napa en bon lanmitye avek Zeova i kapab enfliyans lezot pour fer sa ki mal. Alor, parfwa i neseser pour en dimoun ki’n fer en keksoz mal ganny ekskli dan kongregasyon. Sa laranzman i montre ki Zeova i kontan bann dimoun ki fidel dan kongregasyon e i kapab ed sa enn ki’n fer en pese grav pour repantir. Menm si sa dimoun in ganny ekskli, i kapab asiste renyon pour li ganny lenstriksyon sorti dan Labib e pour ranforsi son lafwa. I kapab osi ganny bann piblikasyon pour lir e pour etidye e i kapab get Televizyon JW. Ler bann ansyen i vwar ki i pe fer bann sanzman, zot kapab tanzantan donn li bann konsey pour ed li revin zanmi avek Zeova e pour li revin en Temwen Zeova. w21.10 10 ¶9, 11

Ozordi nou swiv legzanp bann Kretyen dan premye syek. Par egzanp, lafason ki nou ganny organize i menm fason ki sa bann Kretyen ti ganny organize. Nou annan sirveyan rezyonal, ansyen ek bann serviter kongregasyon zis parey zot. (Fili. 1:1; Tit 1:5) Parey sa bann Kretyen, nou annan respe pour bann lalwa Zeova konsernan sèks ek maryaz. Nou dakor avek sa ki Bondye i dir konsernan disan e nou protez kongregasyon kont bann ki pa anvi swiv lalwa Bondye. (Akt 15:28, 29; 1 Kor. 5:11-13; 6:9, 10; Ebr. 13:4) Labib i dir nou ki i annan “en sel lafwa” ki annan laprouvasyon Bondye. (Efe. 4:4-6) I en gran loner pour form parti pep Zeova e pour konn laverite lo Zeova ek son plan. Alor, annou fer tou sa ki nou kapab pour montre ki nou asire ki nou dan laverite. w21.10 22-23 ¶15-17

Lerwa Zeosafat ti fer fas avek en gro problenm. En gran larme bann Amonit, Moabit ek bann zonm ki sorti dan rezyon bann montanny Seir ti menas li, son fanmir ek son pep. (2 Kron. 20:1, 2) Ki Zeosafat ti fer? I ti demann Zeova pour ed li e donn li lafors. Lapriyer Zeosafat ki dan 2 Kronik 20:5-12 i montre ki kantite i ti annan konfyans dan son Papa ki dan lesyel ki kontan li. Zeova ti koz avek Zeosafat atraver en levit ki ti apel Zaryel. Zeova ti dir sa ki dan teks pour ozordi. Zeosafat ti annan konfyans total dan Bondye e i ti obei sa bann lenstriksyon. Ler Zeosafat ek son bann dimoun ti al lo fron batay, i pa ti met bann solda ki ti pli eksperyanse devan. O kontrer i ti met bann santer ki ti napa okenn zarm. Zeova ti gard son promes ki i ti’n fer avek Zeosafat e i ti ranport laviktwar lo son bann lennmi.​—2 Kron. 20:18-23. w21.11 15-16 ¶6-7

Ler nou dan problenm nou kapab asire ki Zeova pou ed nou reste fidel avek li. (2 Kor. 4:7-9) Nou kapab asire ki Zeova pou kontinyen demontre lanmour fidel anver nou, parski Labib i dir ki “lizye Zeova i vey lo tou bann ki annan en gran respe pour li, bann ki pe esper son lanmour fidel.” (Ps. 33:18-22, NWT) Avan ki nou ti konmans servi Zeova, i ti kontan nou parey i kontan tou dimoun. Me konman son bann serviter, Zeova i osi demontre lanmour fidel anver nou. Lanmour fidel Zeova i motiv li pour protez nou. I pou toultan ed nou pour reste pros avek li e i pou gard son bann promes ki i’n fer. I anvi ki nou reste son zanmi pour touzour! (Ps. 46:1, 2, 7) Alor nenport problenm ki nou fer fas avek, Zeova pou donn nou sa lafors ki nou bezwen pour reste fidel avek li. w21.11 7 ¶17-18

Laplipar parmi nou, i konn dimoun ki’n gard rankin anver en koleg travay, en kanmarad lekol oubyen en manm fanmir. Parfwa sa dimoun in gard rankin pour plizyer lannen. Rapel ki sa dis frer Zozef ti gard rankin anver Zozef e sa ti fer zot fer en move keksoz. (Zen. 37:2-8, 25-28) Me Zozef pa ti tret zot dan en move fason. Ler i ti annan sa loportinite pour pran revanz lo zot, i ti demontre konpasyon anver zot. Zozef pa ti gard rankin. O kontrer i ti fer sa ki Levitik 19:18 i dir nou devret fer. (Zen. 50:19-21) Bann Kretyen ki anvi fer plezir Bondye i devret swiv legzanp Zozef. I ti pardonn son bann frer olye pran revanz lo zot. Zezi ti dir ki nou devret pardonn bann ki’n fer pese kont nou. (Mat. 6:9, 12) Pareyman zapot Pol ti donn bann Kretyen sa konsey: “Mon bann frer, pa bezwen revanze.”​—Rom. 12:19. w21.12 11 ¶13-14

Tar aswar le 14 Nizan lannen 33, Zezi ti al dan zarden Zetsemane. Ler i ti laba, i ti devid son leker avek Zeova. (Lik 22:39-44) Pandan sa moman, Zezi ti fer “siplikasyon . . . avek gran leokri ek larm.” (Ebr. 5:7) Ki Zezi ti priy lo la pandan dernyen lannwit avan i mor? I ti demann Zeova lafors pour reste fidel e pour fer Son lavolonte. Atraver sa lapriyer ki Zezi ti fer, Zeova ti vwar ki son Garson i vreman tris e i ti anvoy en lanz pour ankouraz li. Zezi ti konnen ki degre i enportan pour li sanktifye non son Papa. Zeova ti ekout bann lapriyer senser ki Zezi ti fer. Akoz? Parski sa ki ti pli enportan pour Zezi, ti pour reste fidel avek son Papa e sanktifye Son non. Si pour nou osi sa i sa keksoz ki pli enportan, Zeova pou reponn nou lapriyer ler nou rod son led.​—Ps. 145:18. w22.01 17-18 ¶15-17

En kantite dimoun ozordi pa dakor avek nou akoz nou pa partisip dan politik. Zot krwar ki nou devret vote dan eleksyon. Me nou realize ki si nou swazir en dirizan imen, nou pe rezet Zeova. (1 Sam. 8:4-7) Petet dimoun i osi santi ki nou devret konstri bann lekol, lopital e fer lezot keksoz ki kapab ed dimoun dan kominote. Zot pa aksepte nou mesaz parski nou fer bokou zefor pour anons sa bon nouvel olye rezourd bann problenm ki i annan dan lemonn. Ki nou devret fer pour fer sir ki nou kontinyen swiv Zezi? (Mat. 7:21-23) Nou devret konsantre dan sa travay ki Zezi in donn nou lord pour fer. Nou pa devret zanmen les nou ganny distrer avek bann problenm sosyal ek politik sa lemonn. Nou kontan nou prosen e nou ti a kontan ed zot. Me nou konnen ki sa pli bon fason pour ed zot, i par ansenny zot konsernan Rwayonm Bondye e par ed zot pour devlop en lanmitye avek Zeova. w21.05 7 ¶19-20

Menm si en kantite dirizan bann nasyon i dir ki zot servi Bondye, zot pa anvi perdi sa lotorite ki zot annan. Alor parey bann dirizan dan letan Zezi ti fer, bann dirizan ozordi i opoz sa Enn ki Zeova in swazir par atak son bann disip fidel. (Akt 4:25-28) Ki mannyer Zeova i reazir? Psonm 2:10-12 (NWT) i dir: “Aprezan, zot bann lerwa, servi bon zizman, zot bann ziz lo later, les zot ganny korize. Servi Zeova avek gran respe e tranble avek lazwa. Onor son garson, si non Bondye pou ankoler e zot pou ganny detrir. Parski son lakoler i mont fasilman. Ere bann ki pran refiz dan Li.” Zeova i bon e i donn zot en serten kantite letan pour fer sa bon desizyon. Zot ankor kapab sanze e aksepte Rwayonm Zeova. Me napa bokou letan ki reste. (Iza. 61:2) I pli irzan la konmela pour dimoun konn laverite e swazir pour servi Zeova. w21.09 15-16 ¶8-9

Pol ti pe dir ki nou devret kontant nou avek sa ki nou annan. (Fili. 4:12) Sa keksoz pli presye ki nou annan i nou lanmitye avek Bondye non pa bann keksoz materyel ki nou annan. (Aba. 3:17, 18) Annou vwar sa ki Moiz ti dir bann Izraelit apre ki zot ti pas 40 an dan dezer. Moiz ti dir zot: “Parski Zeova zot Bondye in beni zot dan tou sa ki zot in fer. . . . Pandan sa karant an, Zeova zot Bondye ti avek zot e zot pa’n mank nanryen.” (Det. 2:7, NWT) Pandan sa 40 an, Zeova ti donn bann Izraelit lamann pour manze. Zeova ti fer sir ki zot lenz pa ti ize. Alor zot ti kapab kontinyen servi sa lenz ki zot ti annan ler zot ti kit Lezip. (Det. 8:3, 4) Si nou aprann pour kontant nou avek sa ki nou annan, sa pou fer Zeova plezir. Zeova i anvi ki nou rekonesan pour menm bann pti keksoz ki i donn nou e pour konpran ki sa bann keksoz i en kado sorti kot li. w22.01 5 ¶10-11

Bann msye marye, ou annan sa responsabilite pour pran swen avek ou fanmir. Alor, ou travay dir pour protez e siport ou fanmir. Ler ou annan problenm, petet ou santi ki ou kapab rezourd ou problenm ou menm. Me pa depan lo ou prop lekor. O kontrer, ler ou tousel, priy Zeova pour ganny led. An plis, fer en lapriyer senser ansanm avek ou madanm. Rod gidans Zeova par etidye Labib ek bann piblikasyon ki lorganizasyon Bondye i donnen e aplik sa konsey ki ou gannyen. I kapab ki lezot pa dakor avek bann desizyon ki ou fer. Zot kapab dir ou ki larzan ek bann keksoz ki larzan i kapab aste, pou donn ou fanmir sa pli bon proteksyon. Me rapel legzanp Lerwa Zeosafat. (2 Kron. 20:1-30) I ti met konfyans dan Zeova e i ti montre sa par son aksyon. Zeova pa ti abandonn sa zonm fidel e i pa pou abandonn ou.​—Ps. 37:28; Ebr. 13:5. w21.11 15 ¶6; 16 ¶8

Bondye in fer nou dan son resanblans e nou annan sa abilite pour demontre son bann kalite. (Zen. 1:26) Alor nou vreman anvi vwar dimoun ganny trete dan en fason ki zis. Me vi ki nou enparfe, nou kapab pa ziz en sityasyon byen, menm si nou krwar ki nou annan tou lenformasyon. Par egzanp, rapel ki mannyer Zonas pa ti dakor avek desizyon Zeova pour pran pitye pour bann dimoun Niniv. (Zon. 3:10–4:1) Me mazin sa ki ti arive. Plis ki 120,000 dimoun dan lavil Niniv ti repantir e ganny sove. Parey nou vwar, Zonas ki ti’n mal ziz bann dimoun me non pa Zeova. Zeova pa oblize eksplik nou akoz i fer en desizyon. Dan lepase, Zeova in les son bann serviter dir ki mannyer zot santi konsernan bann desizyon ki i ti’n fer ouswa ki i ti pe al fer. (Zen. 18:25; Zon. 4:2, 3) Parfwa i ti eksplike akoz i’n fer en desizyon. (Zon. 4:10, 11) Me Zeova pa bezwen nou laprouvasyon avan ouswa apre ki i’n fer en keksoz.​—Iza. 40:13, 14; 55:9. w22.02 3-4 ¶5-6

Nou vin “parey sa enn pli zenn” ler nou “konsider lezot pli siperyer” ki nou. (Fili. 2:3) Ler nou fer sa, i tre probab ki nou pa pou dekouraz lezot. Dan en fason ou en lot, tou nou bann frer ek ser i pli siperyer ki nou. I fasil pour vwar sa, ler nou konsantre lo zot bann bon kalite. Nou devret gard antet sa konsey ki zapot Pol ti donn bann Korentyen, ki dir: “Lekel ki fer ou diferan avek ou kanmarad? Anfet, ki ou annan ki ou pa’n gannyen? Si ou’n ganny li, akoz ou bezwen fer vantar dan zar konmsi ou pa’n gannyen?” (1 Kor. 4:7) Alor, nou pa devret zanmen anvi ki lezot i admir nou ouswa vwar nou pli siperyer ki lezot. Par egzanp, si en frer i kapab fer bann bon diskour oubyen en ser i kapab konmans en kantite letid Labib, sa frer oubyen sa ser i devret toultan donn laglwar Zeova pour sa ki i kapab fer. w21.06 22 ¶9-10

I pe vin pli difisil pour en kantite Temwen Zeova anons sa bon nouvel avek dimoun kot zot lakour. Serten proklanmater i reste dan bann landrwa kot i annan bann batiman ki zot pa ganny akse avek ouswa bann lakour ki annan bann gran baro. I kapab ki sa bann batiman oubyen lakour i annan gard sekirite ki pa les dimoun antre san ganny permisyon avek en dimoun ki reste dan sa landrwa. Dan lezot landrwa, bann proklanmater pa zwenn bokou dimoun kot lakour oubyen dan zot teritwar napa bokou dimoun ki reste. I kapab ki sa bann proklanmater i vwayaz bann gran zistans zis pour esey zwenn en dimoun me i kapab ki sa dimoun pa kot lakour. Menm si nou pe fer fas avek sa bann difikilte, nou bezwen kontinyen anons sa bon nouvel. Esey sanz nou ler predikasyon. Nou pou zwenn plis dimoun dan predikasyon si nou al en ler ki zot normalman kot lakour. Apre tou, dimoun i bezwen retourn kot zot a en moman. En kantite frer ek ser i pres dan apremidi oubyen dan aswar parski zot zwenn plis dimoun. Petet sa bann ler, bann met lakour i pli rilaks e pli pare pour koze. w21.05 15 ¶5, 7

Eski i annan sa menm problenm ozordi? Wi. En kantite dimoun i ankoler avek Temwen Zeova akoz zot pa zwenn avek zot pour selebre bann tradisyon ki pa fer plezir Bondye, parey lanniverser nesans ek Nwel. Lezot i ankoler ler Temwen Zeova pa partisip dan bann selebrasyon nasyonal oubyen pa swiv bann koutim lanterman ki Parol Bondye i montre i mal. Bann ki ankoler avek Temwen Zeova akoz sa bann rezon, i kapab krwar ki Bondye i aksepte lafason ki zot ador li. Me zot pa kapab fer plezir Bondye si zot pli kontan bann tradisyon zonm ki bann lansennyman ki sorti dan Labib. (Mark 7:8, 9) Ki nou devret fer pour fer sir ki nou kontinyen swiv Zezi? Nou bezwen annan en gran lanmour pour bann lalwa ek bann prensip Zeova. (Ps. 119:97, 113, 163-165, NWT) Ler nou kontan Zeova, nou pa pou swiv okenn tradisyon ki pa fer li plezir. Nou pa pou les nanryen vin pli enportan ki nou lanmour pour Zeova. w21.05 6 ¶15-16

Ki mannyer nou kapab aplik konsey zapot Pol? Nou bezwen gard nou lafwa for par kontinyen etidye Labib, kontinyen priye e kontinyen reste okipe dan sa travay ki Zeova in donn nou. (2 Tim. 4:4) Si nou annan lafwa, nou pa pou panik ler nou tann bann fo zistwar lo Temwen Zeova. (Iza. 28:16, NWT) Nou lanmour pour Zeova, son Parol ek bann frer ek ser pou anpes nou ganny anbete avek bann ki’n kit laverite. Dan letan Zezi, en kantite dimoun pa ti aksepte Zezi. Kantmenm sa, en kantite lezot ti aksepte li. Sa ti enkli, omwen en manm Sannedren e en kantite “pret.” (Akt 6:7; Mat. 27:57-60; Mark 15:43) Pareyman ozordi, en kantite dimoun in vin bann disip Zezi. Akoz? Parski zot konn bann laverite ki dan Labib e zot kontan sa bann laverite. Parol Bondye i dir: “Bann ki kontan ou lalwa i annan labondans lape e i napa okenn lobstak ki kapab fer zot tonbe.”​—Ps. 119:165, NWT. w21.05 13 ¶20-21

Zapot Pol ti rekonnet ki tou sa ki i ti fer ti akoz Zeova i donn li lafors. Zeova ti donn Pol lafors atraver son lespri sen pour akonpli byen son minister malgre i ti ganny persekite, ganny met dan prizon e i ti fer fas avek lezot problenm. Timote ki ti pli zenn ki Pol, ti osi bezwen depan lo pwisans Bondye pour li kontinyen anons sa bon nouvel. Timote ti akonpanny Pol lo bann gran vwayaz misyonner. Pol ti osi anvoy Timote pour vizit e ankouraz bann kongregasyon. (1 Kor. 4:17) Petet Timote ti santi ki i pa ti kalifye pour li fer sa. I kapab i sanmenm rezon Pol ti dir li: “Pa les personn mepriz ou akoz ou zenn.” (1 Tim. 4:12) Deplis, pandan sa letan Timote ti “souvan malad.” (1 Tim. 5:23) Me Timote ti konnen ki lespri sen Zeova ti pou donn li sa lafors ki i ti bezwen pour kontinyen anons sa bon nouvel e pour ed son bann frer ek ser.​—2 Tim. 1:7. w21.05 21 ¶6-7

Sa prensip dan Zak 1:19 i sirtou aplik pour bann ki donn konsey. Zak ti ekri: “En dimoun i devret pare pour ekoute, me i devret pran letan avan koze e avan pran lakoler.” En ansyen i kapab krwar ki i konn tou keksoz lo en sityasyon me eski i vreman konn tou keksoz? Proverb 18:13 (NWT) i dir: “Ler en dimoun i reponn vitman avan i tann lenformasyon ki egzakt, sa i bet e i en imilyasyon.” I ti pou byen pour rod lenformasyon avek sa dimoun menm. Alor sa ansyen i devret ekoute avan i koze. Sa ansyen i kapab demande: “Ki pe arive dan ou lavi?” “Ki mon kapab fer pour ed ou?” Si bann ansyen i pran letan pour rod lenformasyon konsernan en sityasyon, i tre probab ki zot pou kapab ed e ankouraz zot bann frer ek ser. Pour ou kapab donn bann bon konsey, ou pa devret zis lir detrwa verse oubyen donn detrwa sizesyon. Nou bann frer ek ser i bezwen santi ki nou kontan zot, ki nou konpran zot e ki nou anvi ed zot. w22.02 17 ¶14-15