“En Parol ki Ganny Dir dan Son Letan Apropriye”
1 Eski partaz sa mesaz lavi avek lezot i en leprev pour ou? Eski ou santi ki ou devret dir serten keksoz profon pour enpresyonn sa dimoun ki ou pe koz avek? Kan Zezi ti anvoy son bann disip, i ti dir zot: “Ale, e prese ki, ‘Rwayonm lesyel i pros!’ ” (Mat. 10:7) Sa mesaz pa ti konplike. I ti fasil pour partaze. I pa diferan ozordi.
2 Souvan zis en pti parol i neseser pour konmans en konversasyon. Kan Filip ti rankontre sa Etyopyen, i ti demann li: “Eski ou konpran sa ki ou pe lir?” (Akt 8:30) Son rezilta ti en diskisyon satisfezan “en parol ki ganny dir dan son letan”!—Prov. 25:11.
3 Ou kapab servi menm lapros dan ou minister. Konman? Si ou obzerv byen e swazir bann parol ki apropriye avek bann sirkonstans. Poz en kestyon, e ekout larepons.
4 Serten Kestyon Fondamantal: Pour konmans en konversasyon, ou kapab esey nenport sa bann kestyon swivan:
◼ “Eski ou itiliz lapriyer Notre Père dan ou ladorasyon?” (Mat. 6:9, 10) Resit en porsyon, e apre dir: “Serten dimoun i demande, ‘Lekel non Bondye ki Zezi ti dir i bezwen ganny sangtifye?’ Lezot i demande, ‘Lekel sa Renny oubyen Rwayonm, pour ki Zezi ti dir nou devret priye?’ Eski ou’n trouv larepons satisfezan pour sa bann kestyon?”
◼ “Eski ou pa’n zanmen mazinen: ‘Akoz nou la lo later?’ ” Montre ki sa i relye avek en konnesans Bondye.—Ekle. 12:13; Zan 17:3.
◼ “Eski ou panse ki lanmor pou en zour disparet?” Pour donn en repons sir servi Izai 25:8 ek Revelasyon 21:4.
◼ “Eski i annan en senp solisyon pour bann boulvers dan lemonn?” Montre ki Bondye i ansennyen pour “kontan ou prosen.”—Mat. 22:39.
◼ “Eski en gran dezas pou detri nou later en zour?” Partaz promes Labib ki later pou reste pour touzour.—Ps. 104:5.
5 Prezant sa bon nouvel dan en fason senp, direk e avek en lapros emab. Zeova pou beni ou zefor pour partaz menm zis “en parol” laverite avek lezot.