Senplisite i Pli Bon
1 Akoz bann zenn proklanmater i souvan-d-fwa kaptir latansyon bann dimoun avek ki zot partaz mesaz Rwayonm? En rezon se akoz sa ki zot dir i senp. Serten proklanmater i kapab panse ki pour rann en temwannyaz efektiv i demann en prezantasyon ki pou enpresyonn sa dimoun. Sepandan, leksperyans i montre ki en prezantasyon senp e kler i pli bon.
2 Zezi ti anons Rwayonm Bondye dan en fason senp e direk e i ti form son bann disip pour fer menm parey. (Mat. 4:17; 10:5-7; Lik 10:1, 9) I ti servi bann lentrodiksyon, ensi ki kestyon ek ilistrasyon ki pa ti konplike pour kaptir latansyon sa bann ki ti ekout li e tous zot leker. (Zan 4:7-14) I ti a meyer pour nou imit son legzanp e fer bann prezantasyon ki fasil pour konpran.
3 “Bonn Nouvel Rwayonm” i sa mesaz ki nou bezwen anonse. (Mat. 24:14) Par servi Rwayonm konman ou tenm debaz, sa pou ed ou gard ou prezantasyon senp. Koz bann keksoz ki konsern sa bann ki pe ekout ou. Bann madanm i pli souvan enterese avek zot fanmiy ki dan bann zafer politik. Premye lenkyetid ki dan lespri en papa se son travay ek sekirite son fanmiy. Bann zenn zan i enterese avek zot lavenir, bann dimoun aze en pli bon lasante ek zot sekirite. Ordinerman dimoun i pli konsernen avek bann levennman lokal ki bann ki ariv dan lezot pei. Apre ki ou’n koz lo en size ki konsern sa dimoun, diriz son latansyon lo bann benediksyon ki bann imen obeisan pou rezwir anba dominasyon Rwayonm Bondye. Detrwa mo senp, byen plase, ansanm avek en verse, i kapab pli bon mwayen pour revey lentere sa enn ki pe ekout ou.
4 Ou kapab konmans en konversasyon an dizan:
◼ “Sirman ou ava dakor ki limanite in ganny anvair avek bokou maladi ki napa gerizon. Me eski ou konnen ki Bondye in promet ki byento i pou elimin tou kalite maladi, osi byen ki lanmor?” Les li reponn, e apre lir Revelasyon 21:3, 4.
5 An servan bann prezantasyon kler e senp, ou kapab tous lespri ek leker plis dimoun dan ou teritwar, ed zot konn Zeova ek sa loportinite pour rezwir lavi pour touzour.—Zan 17:3.