Ki mannyer pour servi sa nouvo brosir Bon nouvel sorti kot Bondye!?
Pour ed nou fer bann retourn vizit e konmans letid Labib
1. Ki nouvo brosir ki nou’n gannyen dan Lasanble Distrik “Protez ou leker!” ki pou ed nou fer retourn vizit e konmans letid Labib?
1 Pandan nou Lasanble Distrik “Protez ou leker!,” nou ti eksite kan nou ti ganny sa nouvo brosir pour ed nou fer retourn vizit e konmans letid Labib. Brosir Sa ki Bondye i ekspekte nou fer in ganny ranplase par brosir Bon nouvel sorti kot Bondye! Tou le de brosir i en pe parey akoz zot leson i senp. Sa pou fer li pli fasil pour konmans letid Labib lo premye vizit. Brosir Ekspekte ti koz lo sa ki en Kretyen i devret fer ki ti kapab difisil pour bann nouvo etidyan aksepte me sa nouvo brosir i konsantre lo sa bon nouvel ki ganny trouve dan Labib.—Akt 15:35.
2. Ki bi sa brosir Bon nouvel?
2 Ki bi sa nouvo brosir? Bann frer dan lemonn antye in demann en piblikasyon ki ti pou atir dimoun ver laverite e entrodwir zot avek nou zouti prensipal pour etidye Labib, liv Ki Labib i vreman dir? Dimoun ki per pour etidye dan en liv i kapab vwar li pli fasil pour konmans etidye dan en brosir. Deplis, en brosir i fasilman ganny tradwir dan plis langaz.
3. Ki mannyer sa brosir i diferan avek lezot?
3 Ki mannyer sa brosir in ganny fer: Bokou nou bann piblikasyon i ganny ekrir pour ki dimoun i kapab lir li e konpran laverite san okenn led. Sa piblikasyon i diferan. I’n ganny prepare konman en gid pour etidye Labib avek en ansenyan. Alor, kan ou pe ofer li avek en dimoun, i pli bon pour diskit enn ou de paragraf avek li. Bann paragraf i kourt e i kapab ganny lir devan laport en dimoun oubyen dan son landrwa biznes. Menm si i bon pour konmans avek leson 1, nou osi kapab konmans nenport ki leson dan sa brosir.
4. Ki mannyer sa brosir i ed nou pour ansenny direkteman dan Labib?
4 Dan bokou nou bann piblikasyon, larepons bann kestyon i ganny trouve dan paragraf. Par kont, dan sa piblikasyon, larepons i ganny trouve dan Labib. Bokou dimoun i anvi trouv larepons dan Labib dan plas dan nou bann piblikasyon. Alors, sanmenm napa preski ditou verse ki’n ganny site. Zot bezwen ganny lir dan Labib. Sa i ed bann etidyan realize ki sa ki zot pe aprann i sorti dan Parol Bondye.—Iza. 54:13.
5. Akoz i enportan pour sa ansenyan prepar byen davans sak letid?
5 Sa brosir pa eksplik tou verse Labib. Akoz? I’n ganny fer pour ki bann etidyan i demann kestyon e ed sa ansenyan devlop son abilite pour ansennyen. Alor, i enportan ki nou byen prepare avan sa letid. En pti konsey: Veye pour pa koz tro bokou. Nou kontan pour eksplik bann verse. Me i pli byen si nou demann sa etidyan pour eksplike ki sa verse i vedir. Par byen servi bann kestyon avek bon zizman, nou kapab ed sa etidyan pour rezonn lo sinifikasyon sak verse.—Akt 17:2.
6. Ki mannyer nou kapab servi sa brosir: (a) kot bann dimoun ki pa tro krwar dan Bondye ek Labib? (b) kan nou pe al portanport? (c) pour konmans letid Labib direkteman? (d) kan nou pe fer bann retourn vizit?
6 Parey lezot piblikasyon pour kondwir bann letid Labib, sa brosir i kapab ganny ofer nenport ler, menm si nou pe ofer en lot piblikasyon sa mwan. Bokou pou kontan servi sa brosir pour konmans letid lo premye vizit. Deplis, parey i’n ganny dir dan lasanble distrik, kan nou servi li avek bann ki’n deza montre en lentere, “sa i kapab fer nou retourn vizit vreman eksitan!”—Vwar bwat lo paz 5-7.
7. Ki mannyer nou kapab kondwir en letid Labib an servan sa brosir?
7 Konman pour kondwir letid: Nou kapab konmans sa diskisyon par lir bann kestyon ki an gro lekritir nwanr. Apre, lir sa paragraf ek sa verse an italik. Servi bann kestyon pour ed sa met lakour konpran ki sa verse i vedir. Apre, avan ou al lo lot seksyon, demann sa met lakour pour reponn sa kestyon pour fer sir ki i konpran. O konmansman, i ti pou pli byen pour reponn zis en kestyon. Avek letan, nou pou kapab prolonz nou diskisyon pour fer en leson an antye.
8. Ki mannyer nou devret entrodwir bann verse e akoz?
8 Bann verse ki ganny demande pour “lir” i bann ki direkteman reponn sa bann kestyon. Kan ou pe entrodwir en verse, evite dir “Zapot Pol ti ekrir” oubyen “Remark sa ki Zeremi ti predir.” Sa met lakour i kapab krwar ki nou pe lir parol bann zonm. I ti pou pli byen pour dir, “Parol Bondye i dir” oubyen “Remark sa ki Labib ti predir.”
9. Eski tou verse ki’n ganny site i devret ganny lir pandan letid?
9 Eski nou devret lir tou bann verse ki’n ganny site oubyen zis verse ki’n ganny demande pour “lir”? Sa pou depan lo sirkonstans. Tou sa bann verse in ganny mete pour en rezon. Zot tou zot annan bann lenformasyon ki vo lapenn koz lo la. Me dan serten ka, si sa etidyan napa letan, lentere, oubyen i pa kapab lir byen, nou kapab zis lir bann verse ki’n ganny demande pour “lir.”
10. Kan ki nou kapab sanze pour konmans letid dan liv Ki Labib i dir?
10 Kan pour al dan liv Ki Labib i dir?: Apre ki zot in etidye regilyerman pour en pe letan, ou kapab al dan liv Ki Labib i dir? oubyen kontinyen dan brosir Bon nouvel ziska ki i’n fini. Bann proklanmater i kapab servi bon zizman pour deside kan zot pou sanz liv. Kan nou sanze, eski nou devret absoliman konmans o konmansman liv Ki Labib i dir? Napa okenn lareg lo la. Sak dimoun i diferan. Toudmenm, laplipar etidyan pou benefisye pour repas lo sa menm size dan en fason pli detaye dan liv Ki Labib i dir?
11. Akoz nou devret byen servi sa nouvo brosir?
11 Dan en lemonn kot napa bokou bon nouvel, nou ganny sa gran privilez pour anons sa pli bon nouvel e sa se ki Rwayonm Bondye pou byento anmenn nou dan en nouvo lemonn kot pou annan lazistis! (Mat. 24:14; 2 Pyer 3:13) Nou konvenki ki bokou ki antann sa mesaz pou dakor avek sa parol dan Labib: “Pa i zoli pour vwar lipye sa enn ki pe anmenn bon nouvel lo bann montanny, sa enn ki pe anons lape, sa enn ki pe anmenn bon nouvel konsernan en keksoz meyer, sa enn ki pe anons delivrans, sa enn ki pe dir avek Siyon: ‘Ou Bondye in vin lerwa!’” (Iza. 52:7) Annou servi sa nouvo brosir pour anmenn sa bon nouvel sorti kot Bondye avek bann ki swaf dan teritwar!
[Bwat lo paz 5]
Kot bann dimoun ki pa tro krwar dan Bondye ek Labib:
● Dan serten landrwa, bann proklanmater i remarke ki kan zot servi sa mo “Bondye” oubyen “Labib,” sa i kapab koup konversasyon. Dan serten ka, i pou pli bon pour diskit bann topik ki dimoun i pli enterese avek parey en bon gouvernman, kote pour ganny led pratik pour zot fanmir e ki lavenir i rezerve. Anfet, sa brosir Bon nouvel i kapab ganny entrodwir apre ki nou’n fer enn de konversasyon pour vwar ki mannyer nou konnen Bondye i egziste e akoz nou kapab annan konfyans dan Labib.
[Bwat lo paz 6]
Kan nou pe al portanport:
● “Nou pe vizit bann dimoun pour montre zot ki i fasil pour konn plan Bondye pour lavenir. Eski ou’n deza mazinen si en zour Bondye pour met en lafen avek soufrans? [Les sa dimoun reponn.] Sa brosir i montre kote dan Labib ou kapab trouv larepons sa kestyon. [Donn li sa brosir e lir premye paragraf dan leson 1 e osi Zeremi 29:11.] Dapre sa ki nou fek lir, eski i fer sans pour dir ki Bondye i anvi en meyer lavenir pour nou? [Les sa dimoun reponn.] Mon ti a kontan kit sa magazin avek ou, si ou kontan. En lot fwa, nou kapab vwar sa dezyenm paragraf pour trouv larepons sa lot kestyon, ‘Ki mannyer Bondye pou tir tou sa ki fer nou soufer?’” Si sa met lakour i annan letan lo sa premye vizit, ou kapab lir e diskit dezyenm paragraf ek son trwa verse Labib. Fer laranzman pour diskit sa dezyenm kestyon dan sa leson en lot fwa.
● “Bokou dimoun i kontan priye espesyalman kan zot dan problenm. Eski ou priye parler? [Les sa dimoun reponn.] Eski ou panse Bondye i ekout tou lapriyer oubyen i annan zis serten lapriyer ki fer li plezir? [Les sa dimoun reponn.] Mon annan en brosir ki montre ki larepons Labib i donnen. [Donn li en kopi e vwar ansanm paragraf 1 dan leson 12 e bann verse ki ganny demande pour “lir.”] Pa i gou ki Bondye i pare pour ekout nou? Me pour benefisye plennman atraver lapriyer, nou bezwen konn Bondye byen. [Vir lo leson 2 e montre li sa bann soutit.] Si ou ti a kontan, mon kapab kit sa brosir avek ou, e en lot fwa nou pou lir larepons ki Labib i donnen pour sa bann kestyon enteresan.”
● “Bokou dimoun i enkyet e pe demande kote sa lemonn pe ale. Eski ou panse sa bann kondisyon pou amelyore? [Les sa dimoun reponn.] Bokou dimoun i sirprann pour konnen ki Labib i annan en bon nouvel ki kapab donn nou lespwar. La serten kestyon ki Labib i reponn.” Donn li en brosir e envit li pour swazir en kestyon ki pli enteres li lo dernyen paz. Apre, al lo sa leson ki i’n swazir e montre li ki mannyer en letid i ganny fer. Fer laranzman pour retournen e vwar lot kestyon dan sa leson.
[Bwat lo paz 7]
Esey lapros direk:
● “Nou ti pe pas kot ou pour montre ou en nouvo fason fer letid Labib. Sa brosir i annan 15 leson kot i montre kote dan Labib ou kapab vwar larepons pour bann kestyon enportan. [Montre li son kouvertir lo premye e dernyen paz.] Eski ou’n deza esey konpran Labib? [Les sa dimoun reponn.] Les mwan montre ou ki mannyer i fasil. [Annou vwar premye paragraf pour kestyon 3 dan leson 3 e lir Revelasyon 21:4, 5. Si i apropriye, fer lot paragraf e lir bann verse Labib ki’n ganny demande pour “lir.”] Si ou ti a kontan, mon kapab kit sa brosir avek ou. Nou ankouraz ou pour esey omwen en fwa sa letid Labib, ki ou dir? Si ou ti a kontan, ou kapab kontinyen. Nou kapab konmans lo premye leson en lot fwa. Remarke i zis en paz, i pa pou pran bokou ou letan.”
[Bwat lo paz 7]
Lo en retourn vizit:
● Kan ou pe retournen pour vizit en dimoun ki’n demontre en lentere, ou kapab dir: “Mon kontan pour revwar ou. Mon’n anmenn en brosir ki donn larepons bokou bann kestyon enteresan. [Donn li en brosir e envit li pour get dernyen paz.] Lekel parmi sa bann topik ki pli enteres ou? [Les sa dimoun reponn. Apre, vir lo sa leson ki i’n swazir.] Les mwan montre ou ki mannyer sa brosir i kapab ganny servi pour trouv larepons dan Labib.” Montre konman pour fer letid Labib par diskit en paragraf oubyen de ek bann verse ki’n ganny demande pour “lir.” Deza ou’n fini konmans en letid Labib! Kit sa brosir avek sa met lakour e fer laranzman pour retournen. Kan ou fini sa leson, ou kapab diskit en lot leson ki sa met lakour in swazir oubyen konmans o konmansman sa brosir.