Repetisyon pour aksantye

LANSENNYMAN efikas i enkli servi repetisyon. Ler en pwen enportan i ganny dir plis ki en fwa, i annan plis posibilite ki sa bann dan lasistans pour rapel li. Si sak fwa sa lide i ganny repete dan bann fason enpe diferan, zot menm kapab konpran sa lide pli klerman.

Si sa bann ki ekout ou pa rapel sa ki ou dir, ou bann parol pa pou enfliyans sa ki zot krwar oubyen zot fason viv. I annan plis posibilite ki zot pou kontinyen mazin bann pwen ki ou met lanfaz spesyal.

Zeova, nou Gran Enstrikter, i donn nou legzanp dan lafason ki li i servi repetisyon. I ti donn sa Dis komannman avek nasyon Izrael. Atraver en lanz, i ti fer sa nasyon antann sa bann komannman kot Montanny Sinai. Plitar i ti donn sa bann komannman avek Moiz an ekrir. (Egz. 20:1-17; 31:18; Det. 5:22) Zeova ti demann Moiz pour repet sa bann komannman avek sa nasyon avan ki zot ti antre dan Later Promiz, e par mwayen lespri sen, Moiz ti ekrir sa bann komannman, ki ganny trouve dan Deterononm 5:6-21. Parmi sa bann komannman ki Izrael ti resevwar ti sa legzizans ki zot kontan e servi Zeova avek tou zot leker, nanm, ek lafors. Sa ti osi ganny repete plizyer fwa. (Det. 6:5; 10:12; 11:13; 30:6) Akoz? Parski, parey Zezi ti dir, sa ti “premye e pli gran konmannman.” (Mat. 22:34-38) Atraver profet Zeremi, Zeova ti rapel pep Zida plis ki 20 fwa konsernan sa gran lenportans pour obei li dan tou keksoz ki i ti konmann zot. (Zer. 7:23; 11:4; 12:17; 19:15) E atraver Ezekyel, Bondye ti deklar plis ki 60 fwa ki bann nasyon “pou bezwen konnen ki mwan mon Zeova.”—Ezek. 6:10; 38:23.

Dan resi minister Zezi, nou osi obzerv lizaz efikas repetisyon. I annan, par egzanp, sa kat Levanzil—sakenn pe kouver bann menm levennman enportan ki’n deza ganny raporte par lezot me dan en fason en pti pe diferan. Dan son prop lansennyman, Zezi ti kouver menm pwen debaz dan plis ki en lokazyon me dan diferan fason. (Mark 9:34-37; 10:35-45; Zan 13:2-17) E letan i ti lo Montanny Zolivye detrwa zour avan son lanmor, Zezi ti servi repetisyon pour aksantye sa konsey enportan: “Veye alor, akoz zot pa konnen ki zour zot Senyer pou arive.”—Mat. 24:42; 25:13.

Dan Predikasyon. Ler ou rann temwannyaz avek dimoun, ou swete ki zot pou rapel sa ki ou dir. Servi repetisyon dan en fason efikas i kapab ed ou akonpli sa lobzektif.

Souvan, en dimoun pa pou oubliy en keksoz si omoman ki sa keksoz pe ganny diskite i ganny repete. Pour sa rezon, apre ki ou’n fini lir en verse, ou kapab aksantye sa verse par endik en porsyon enportan sa verse an dizan, “Eski ou remarke konman sa verse in ganny ekrir?”

Bann dernyen fraz dan en konversasyon i kapab osi ganny servi dan en fason efikas. Par egzanp, ou kapab dir: “Sa pwen prensipal ki mon ti a kontan ou rapel dan nou konversasyon se . . .” Apre senpleman repet li. I kapab en keksoz koumsa: “Plan Bondye se ki later i ganny transformen dan en paradi. Sa plan pou sirman ganny akonpli.” Oubyen petet: “Labib i montre klerman ki nou pe viv dan bann dernyen zour sa sistenm. Si nou pou sirviv son lafen, nou bezwen aprann sa ki nou Bondye i ekspekte avek nou.” Ouswa i kapab: “Parey nou’n vwar, Labib i ofer bann konsey pratik lo konman pour fer fas avek bann problenm lavi fanmiy.” Dan serten ka ou kapab senpleman repet en sitasyon dan Labib konman sa pwen pour rapel. Byensir, pour fer sa dan en fason efikas i demann refleksyon davans.

Lo bann retourn vizit, ki enkli bann letid Labib, ou kapab servi bann kestyon revizyon pour fer repetisyon.

Ler en dimoun i trouv li difisil pour konpran oubyen pour aplik konsey Labib, petet ou bezwen soulev sa topik dan plizyer lokazyon. Esey abord sa topik dan diferan fason. Pa fodre ki sa diskisyon i long me i devret ankouraz sa etidyan pour kontinyen mazin lo sa keksoz. Rapel, Zezi ti servi sa kalite repetisyon pour ed son bann disip sirmont sa dezir pour vin dan premye plas.—Mat. 18:1-6; 20:20-28; Lik 22:24-27.

Ler pe donn Diskour. Si ou donn diskour devan lo lestrad, ou bi se pa senpleman pour prezant lenformasyon. Ou anvi ki sa lodyans i konpran, rapel, e aplik sa lenformasyon. Pour arive fer sa, servi byen repetisyon.

Toutfwa si ou repet bann pwen prensipal tro souvan, ou kapab perdi latansyon ou lodyans. Avek swen, swazir bann pwen ki merit lanfaz spesyal. Zot souvan bann pwen prensipal ki form baz ou diskour, me zot kapab osi enkli lezot lide ki pou annan valer spesyal pour ou lodyans.

Pour servi repetisyon, premyerman ou kapab fer en rezimen lo ou bann pwen prensipal dan lentrodiksyon. Fer sa par servi bann fraz kourt ki fourni en lide zeneral lo sa ki ou pou kouver, avek bann kestyon oubyen legzanp kourt ki met an plas bann problenm ki merit ganny rezourd. Ou kapab dir ki kantite pwen prensipal i annan e mansyonn zot par nimero. Apre devlop sak sa bann pwen dan parti prensipal ou diskour. Lanfaz i kapab ganny ranforsi dan parti prensipal ou diskour par repet sak pwen avan pas lo lot pwen. Oubyen i kapab ganny akonpli par servi en legzanp ki enplik laplikasyon sa pwen prensipal. Plis lanfaz i kapab ganny mete lo ou bann pwen prensipal par servi en konklizyon ki repet sa bann pwen, fer zot evidan par servi bann diferans, reponn bann kestyon ki ti ganny souleve, oubyen an bref donn bann solisyon pour bann problenm ki ti ganny souleve.

Anplis ki sa bann keksoz ki’n ganny mansyonnen pli boner, en orater eksperyanse i obzerv byen bann dimoun ki konpoz son lodyans. Si serten i trouv en serten lide difisil pour konpran, sa orater pou remark sa. Si sa pwen i enportan, i pou repas lo sa pwen ankor. Sepandan, repet sa menm mo i kapab pa ase pour li akonpli son lobzektif. Ansennyen i enplik plis ki sa. Sa orater i devret adapte son lansennyman. Petet i bezwen fer lazistaz enprovize avek son diskour. Aprann pour adres bezwen lodyans dan sa fason pou determin bokou ou lefikasite konman en ansennyan.