“Konsakre” Ou Letan Avek Ou Minister
1 Ler nou lir ki lapot Pol ti antreprann sa travay fer latant pandan ki i ti an Korent, nou kapab konklir ki sa ti pou limit son loportinite pour prese. Sepandan, Akt 18:5 i dir: ‘Pol ti konsakre tou son letan prese, e sertifye avek bann Zwif ki Zezi ti limenm Kris.’ Akoz Pol ti konsakre tou son letan avek travay predikasyon? Kantmenm bokou dimoun an Korent ti’n deza vin bann krwayan, Senyer ti’n konfirmen ki ti annan ankor bokou plis disip pour fer dan sa lavil. (Akt 18:8-11) Eski nou annan menm rezon pour nou konsakre nou letan avek nou minister? Wi. Bokou plis dimoun i kapab ganny trouve e ganny ansennyen laverite.
2 Pas Plis Letan Dan Predikasyon Pandan Avril: I tre probab ki ou lobzektif se pour kontinyen pres sa bon nouvel tou le mwan. Me serten mwan i donn nou plis loportinite pour “konsakre” plis nou letan dan sa aktivite. Sa i enkli mwan Avril, dan pik sezon Memoryal. Eski ou sirkonstans i permet ou pour fer pionye asistan oubyen pour ogmant ou zefor dan minister pandan sa peryod letan? Bokou proklanmater ki pe fer sa in resevwar bokou benediksyon. (2 Kor. 9:6) Si ou pe fer tou sa ki ou kapab, mazinen ki Zeova i trouv plezir avek ou servis senser. (Lik 21:2-4) Nenport ki sirkonstans ki ou ladan, fer li ou lobzektif pour “konsakre” ankor plis ou letan avek ou minister pandan mwan Avril. E pa oubliye pour remet ou rapor alafen lemwan afen ki ou zefor i ganny konte avek tou lezot serviter Zeova.
3 Vizit Bann Nouvo Ki’n Asiste Memoryal: Lasistans Memoryal pour Sesel lannen pase, ti 569. Nou pa ankor konn lasistans total pour sa lannen. Toudmenm, bann rapor i endike ki i egziste en potansyel ekselan pour en pli gran “rekolt.” (Mat. 9:37, 38) Alor, fer laranzman osito posib pour vizit e ed spirityelman bann ki’n asiste Memoryal e ki enterese. Si ou anvoy sa bann vizit pour plitar sa i kapab permet ‘Dyab vini e retir tou parol Rwayonm ki’n ganny senmen dan son leker.’ (Mat. 13:19) En vizit san tarde pou montre ki ou vreman “konsakre” tou ou letan avek ou minister.
4 Kontinyen Ed Bann Inaktif: An Fevriye, en zefor spesyal ti konmanse pour ed bann inaktif. Si i annan serten ki pa ankor resevwar en vizit pastoral, bann ansyen i devret aranze pour vizit zot avan ki mwan Avril i fini. Bann ansyen pou esey zot mye pour determin lakoz par deryer problenm sa dimoun e osi konman ki zot kapab ed li pli byen pour servi Zeova ankor aktivman. Sa led ki zot ofer li avek lanmour i montre ki bann ansyen i pran oserye zot responsabilite konman bann berze “troupo Bondye.” (1 Pyer 5:2; Akt 20:28) Edisyon Latour Veyer le 15 Septanm, 1993, paz 22-3, i fourni bann sizesyon ekselan ki bann ansyen i kapab servi ler zot pe adres okenn parmi sa senk problenm komen ki kapab pe afekte bann inaktif. Si i posib, serten i kapab repran predikasyon pandan Avril.
5 Ed Plis Dimoun Pour Vin Proklanmater Non Batize: Eski ou zanfan in kalifye konman bann nouvo proklanmater sa bon nouvel? Ki sitiasyon sa bann ki ou pe etidye Labib avek? Si zot ganny aprouve par bann ansyen, eski mwan Avril pa ti a en moman apropriye pour zot konmans prese? Si en dimoun pe fer progre e i’n fini brosir Ekspekte ek liv Konnesans, sa letid Labib i kapab kontinyen dan en dezyenm liv—swa liv Parole de Dieu, Paix véritable oubyen Unis dans le culte. Ou lobzektif se pour ed sa etidyan pour pli byen konpran laverite, kalifye konman en proklanmater, e pour vin en Temwen Zeova ki’n dedye son lavi e batize.—Efe. 3:17-19; 1 Tim. 1:12; 1 Pyer 3:21.
6 Ou lentere konstan e senser dan ou bann etidyan Labib i kapab ed zot pour finalman pran laverite aker. En Temwen ti rankontre en koup aze ki ti senserman dakor pour etidye Labib. Me sa koup ti kennsel sa letid pour trwa semenn konsekitif. Finalman sa letid ti konmanse. Apre, sa koup ti kennsel sa letid preski tou le de semenn. Finalman, sa madanm ti progrese ziska batenm. Sa frer ti rakonte ki “apre ki sa madanm ti’n batize, son lizye ti ranpli avek larm lazwa, sa ti anmenn larm lazwa dan mon lizye ek lizye mon madanm.” Wi, “konsakre” tou nou letan avek sa bon nouvel i anmenn gran lazwa!
7 Profesi Labib ek bann levennman lemonn i endike ki nou byen avanse dan letan lafen. Ozordi i lemoman kot tou pep Bondye i bezwen “konsakre” tou zot letan pour fer lezot konn sa bon nouvel. Lapot Pol ti donn sa lasirans ki tel travay dan Senyer i definitivman “pa anven.”—1 Kor. 15:58.