Sezon Memoryal i en Moman pour fer plis
1. Ki lefe bann lafet dan diferan sezon ti fer lo bann Izraelit ki ti annan lakrent pour Bondye?
1 Dan diferan sezon pandan lannen, bann Izraelit ti selebre bann lafet pour Zeova. (Lev. 23:2) Zot ti pran letan pour reflesir lo labonte zot Bondye, e sa ti anmenn bokou lazwa e pous zot pour devoue anver vre ladorasyon.—2 Kron. 30:21–31:2.
2, 3. Akoz i apropriye ki nou fer plis spirityelman pandan sezon Memoryal, e kan nou pou obzerv Memoryal?
2 Dan nou letan, nou aktivite teokratik agreab i ogmante sak lannen pandan sezon Memoryal. I en moman kot nou reflesir oprofon lo sa kado vreman presye ki Zeova in donn nou. Sa i son sel Garson. (Zan 3:16; 1 Pyer 1:18, 19) Anmezir nou reflesir lo lanmour ki Bondye ek son Garson in demontre, nou santi nou pouse pour loue Zeova e pour fer zefor pour fer son lavolonte.—2 Kor. 5:14, 15.
3 Sa lannen Repa Senyer pou ganny obzerve Zedi le 24 Mars, apre soley kouse. Konman nou kapab partisip plis dan predikasyon pandan mwan Mars, Avril, ek Me?
4, 5. (a) Kwa ki’n ed serten pour zwenn plis dimoun avek sa bon nouvel? (b) Ki ou’n vwar efikas isi lokalman?
4 Zwenn bokou plis Dimoun: Rod bann fason pour zwenn bokou plis dimoun ler ou pe partisip dan predikasyon. Eski ou kapab fer plan pour partisip dan port an port ler plis dimoun i kot lakour, tel parey lo tar apremidi oubyen aswar? Si serten dimoun dan ou group letid liv ti a kontan partisip dan predikasyon avan oubyen apre letid, sirveyan letid liv i kapab fer laranzman pour fer en randevou pour kapab travay dan en teritwar pros lanmenm.
5 En lot fason pour zwenn plis dimoun i ler nou donn temwannyaz dan bann landrwa piblik. En ser Zapon ti anvi fer pionye asistan menm si i ti annan en travay aplentan. En ansyen ti sizere ki sak zour avan i al travay, i kapab donn temwannyaz dan semen pre avek en stasyon tren. Apre ki i ti’n sirmont son timidite ek sikannri serten dimoun ki pe al travay, i ti devlop en fason pour anmenn magazin pour 40 dimoun tou le mwan, enkli bann ki pe al travay, bann ki travay lo stasyon, ek bann boutikye. I ti plas an mwayenn 235 magazin dan en mwan. Par partaz bann pwen biblik avek bann dimoun pour en pe letan sak zour, i ti kapab konmans sis letid Labib.
6. Ki mannyer bann zenn i kapab fer plis spirityelman?
6 Loportinite pour donn Temwannyaz: Bokou proklanmater ki pe al lekol i ganny vakans pandan lannen. Sa i bann bon moman pour fer pionye asistan. Deplis, bann zenn Kretyen i kapab fer plis ler zot donn temwannyaz kot lekol. Ou kapab sirprann pour vwar konman ou bann kanmarad lekol i anvi konn ou krwayans. Akoz ou pa profite pour donn en temwannyaz ler i annan bann diskisyon dan laklas ouswa dan bann konpozisyon? Lezot in kapab donn temwannyaz par servi nou bann video. Serten in konmans bann letid Labib avek bann kanmarad lekol e ed zot progrese ziska dedikasyon ek batenm. Sa i bann bon fason pour “loue non Zeova.”—Ps. 148:12, 13.
7. (a) Ki mannyer en frer ti profit loportinite pour donn temwannyaz avek lezot? (b) Eski ou osi ou’n ganny en leksperyans parey?
7 Dan ou lavi toulezour, rod bann fason pour koz avek dimoun lo nou Bondye merveye ek son bann zoli promes. En frer ki vwayaz lo menm tren toulezour i donn temwannyaz avek bann dimoun ki pe al travay ler i apropriye. Par egzanp, toulezour ler i pe esper en lot tren dan en stasyon, i ti donn temwannyaz en zennonm pour apepre senk minit. Alors, sa zennonm ek son koleg ti dakor pour etidye Labib. Letid Labib ti ganny fer lo tren pandan ki zot pe vwayaze. En pe letan apre, en madanm aze ki ti pe ekout zot konversasyon ti apros sa frer e demann li en letid Labib. Li osi i pe benefisye avek son letid dan bann zour ki i pran tren. Dan sa fason, sa frer in etidye avek dis diferan dimoun ler i pe vwayaz lo tren.
8. Ki metod ki kapab ed bann ki pa kapab fer bokou akoz zot avanse dan laz ouswa ki annan problenm lasante pour fer plis dan predikasyon?
8 Me si ou pa kapab fer bokou akoz ou avanse dan laz ouswa ou annan problenm lasante? I annan bann fason ki ou kapab loue Zeova plis. Eski ou’n deza esey donn temwannyaz par telefonn? Si ou pa asire konman pour fer li, mansyonn sa avek ou sirveyan letid liv. I kapab fer laranzman avek bann proklanmater pour servi sa metod ansanm avek ou. Ler ou travay ansanm konman partner, ou kapab aprann avek kanmarad e ed kanmarad pour donn en temwannyaz efikas. Bann bon sizesyon pour donn temwannyaz par telefonn i kapab ganny trouve dan Nou Minister Rwayonm Fevriye 2001, paz 5-6.
9. Konman nou kapab ed bann etidyan Labib pour kalifye pour partisip avek kongregasyon dan predikasyon?
9 Ler bann nouvo i asiste Memoryal, sa i kapab ankouraz zot pour anvi loue Zeova plis. Ou kapab ed zot pour sirmont okenn lafreyer ki zot kapab annan pour partisip dan travay predikasyon par rakont zot bann leksperyans predikasyon ankourazan e par form zot ptit-a-pti pour eksplik bann lansennyman Labib e pour defann zot lafwa. (1 Pyer 3:15) Si en letid Labib i anvi konmans pres sa bon nouvel, koz avek sirveyan prezidan. I pou fer en pti renyon avek sa etidyan pour vwar si i kalifye pour partisip avek kongregasyon dan predikasyon. Sirman Zeova i bezwen kontan ler i vwar bann nouvo pe vin dan son kote pour siport son drwa pour dirize!—Prov. 27:11.
10. (a) Konman en bon progranm i kapab ed nou fer pionye asistan? (b) Eski ou ti kapab fer pionye asistan lannen pase pandan sezon Memoryal? Ki mannyer?
10 Eski ou kapab fer Pionye asistan? En pionye asistan i devret met 50 er-d-tan par mwan e sa i devret ganny konsidere seryezman. (Mat. 5:37) I vedir ki ou pou bezwen fer laranzman pour dedye apepre 12 er-d-tan dan predikasyon sak semenn. Eski enn sa bann progranm pour fer pionye asistan lo paz 5 i adapte avek ou sitiasyon? Si non, eski ou kapab fer en progranm ki pou ed ou fer pionye asistan dan mwan Mars, Avril, ek Me? Demann Zeova pour ed ou fer plis.—Prov. 16:3.
11. Konman bann ansyen ek asistan ministeryel i kapab siport bann ki pou fer pionye asistan?
11 Bann ansyen ek asistan ministeryel pou donn ou tou zot sipor pour fer sa sezon Memoryal enn pli spesyal pour loue Zeova. I paret ki bokou zot pou fer pionye asistan. Bann ansyen pou fer lezot randevou predikasyon si i neseser lo tar apremidi, aswar dan lasemenn, e dan bann wikenn. Zot kapab koz avek bann ki’n plàn pour fer pionye oubyen ki pe mazin pour fer li, pour zot konnen kote e kan sa bann randevou pou ganny fer e lekel ki pou la pour pran group. Zot pou esey fer laranzman pour ki lezot proklanmater i travay avek ou dan bann zour ek ler ki ou’n progranmen pour predikasyon. Dan sa fason, bann plan i kapab ganny fer e bokou bon keksoz i kapab ganny akonpli.—Prov. 20:18.
12. Kwa ki pous nou pour loue Zeova toultan?
12 Fer tou sa ki ou kapab: Si ou sitiasyon pa permet ou fer pionye asistan, rapel ki Zeova i aksepte zefor ek sakrifis ki nou fer “dapre sa ki nou annan, non pa dapre sa ki nou napa.” (2 Kor. 8:12) Nou annan en kantite pour remersi Zeova. Avek bon rezon, David ti ekrir: “Mon pou beni Zeova toultan; son louanz pou dan mon labous konstaman.” (Ps. 34:1) Fotespere sa i nou determinasyon pandan sa sezon Memoryal.
[Bwat lo paz 3]
Ki mannyer ou pou fer plis?
◼ Pres en ler ki dimoun i kot lakour
◼ Donn temwannyaz dan bann landrwa piblik
◼ Donn temwannyaz dan travay ouswa kot lekol
◼ Donn temwannyaz par telefonn
◼ Fer pionye asistan
[Latab lo paz 5]
Progranm Pionye asistan—Bann fason pour ganny 12 er-d-tan Predikasyon sak Semenn
Bomaten—Lendi ziska Sanmdi
Nenport zour i kapab ganny ranplase avek Dimans.
Zour Moman Er-d-tan
Lendi Bomaten 2
Mardi Bomaten 2
Merkredi Bomaten 2
Zedi Bomaten 2
Vandredi Bomaten 2
Sanmdi Bomaten 2
Total Er-d-tan: 12
De Lazournen
Nenport de zour dan lasemenn i kapab ganny swazir. (Depandan lo bann zour ki’n ganny swazir, sa progranm i kapab donn zis 48 er-d-tan pour sa mwan.)
Zour Moman Er-d-tan
Merkredi Lazournen 6
Sanmdi Lazournen 6
Total Er-d-tan: 12
De Swar ek Wikenn
Nenport de swar dan lasemenn i kapab ganny swazir.
Zour Moman Er-d-tan
Lendi Swar 1 1⁄2
Merkredi Swar 1 1⁄2
Sanmdi Lazournen 6
Dimans Demi Zournen 3
Total Er-d-tan: 12
Trwa Apremidi ek Sanmdi
Nenport zour i kapab ganny ranplase avek Dimans.
Zour Moman Er-d-tan
Lendi Apremidi 2
Merkredi Apremidi 2
Vandredi Apremidi 2
Sanmdi Lazournen 6
Total Er-d-tan: 12
Mon Progranm personnel
Desid kantite er-d-tan pour sak moman.
Zour Moman Er-d-tan
Lendi
Mardi
Merkredi
Zedi
Vandredi
Sanmdi
Dimans
Total Er-d-tan: 12