Koz avek lezot lo sa “Lalimyer Lemonn”
1. Lekel sa gran lalimyer ki’n ganny predir dan Parol Bondye, e ki lokazyon ki atir en gran latansyon lo sa lalimyer?
1 Zeova ti predir atraver profet Izai: “Sa pep ki ti pe mars dan teneb in vwar en gran lalimyer. Me bann ki pe reste dan pei gran fernwanr, lalimyer in klere lo zot.” (Iza. 9:2) Sa “gran lalimyer” ti evidan dan sa ki Zezi Kri, Garson Bondye ti fer. Son travay predikasyon ler i ti ankor lo later ek byenfe son sakrifis ti fortifye bann ki ti dan teneb spirityel. Se sa lalimyer ki bann dimoun ki dan teneb ozordi i bezwen. Repa Senyer i donn nou en gran loportinite pour koz avek lezot lo sa “lalimyer lemonn.” (Zan 8:12) Lannen pase, plizyer milyon dimoun ti demontre serten lentere ler zot ti zwenn ansanm avek nou pour obeir sa lord Zezi: ‘Kontinyen fer sa an mon memwar.’ (Lik 22:19) Byento nou pe al obzerv Memoryal, konman nou kapab donn lanmen pour atir latansyon lo sa gran lalimyer ki Zeova in fer briye?—Fili. 2:15.
2. Konman nou kapab ogmant nou lapresyasyon pour sa sakrifis, e ki lefe sa pou annan lo nou?
2 Devlop en gran Lapresyasyon: Sezon Memoryal i en letan apropriye pour reflesir lo sa gran lanmour ki Zeova ek Zezi in demontre par fourni en sakrifis pour limanite. (Zan 3:16; 2 Kor. 5:14, 15) En tel refleksyon pour ogmant nou lapresyasyon pour sa lokazyon sakre. Tou pep Bondye pou anvi met letan dekote pour lir e reflesir lo lektir Labib spesyal pour Memoryal, parey i’n ganny endike dan Egzamin Labib sak Zour. Kan nou mazin bann kalite parfe Zeova, ki ganny revele dan en fason merveye dan sa sakrifis, sa i fer nou fyer pour annan en Bondye parey li. Ler nou reflesir lo sinifikasyon sa sakrifis, nou lanmour pour Bondye ek son garson i ogmante e i motiv nou pour fer tou sa ki nou kapab pour fer lavolonte Bondye.—Gal. 2:20.
3. Ki mannyer nou demontre nou lapresyasyon pour Memoryal?
3 Si nou ogmant nou lapresyasyon pour sa provizyon ki Zeova in donnen pour sov nou, nou lanvi pour asiste Memoryal pou fer bann etidyan Labib, retourn vizit, fanmiy, vwazen, kanmarad lekol, koleg travay, ek lezot dimoun ki nou envite anvi asiste zot osi. (Lik 6:45) Annou fer en gran zefor pour envit tou sa bann dimoun. Par donn zot en lenvitasyon Memoryal sa pou ed zot rapel sa zour. Bokou proklanmater in vwar li neseser pour gard en lalis bann dimoun ki zot abitye envite e azout bann nouvo tou le zan pour zot pa bliy personn. Ler nou byen organize e fer tou sa ki nou kapab pour envit bann dimoun ki enterese, sa pou en bon fason pour eksprim nou rekonesans pour Zeova “pour son gran don.”—2 Kor. 9:15.
4. Kwa ki kapab ed nou pour fer plis dan predikasyon pandan mwan Mars ek Avril?
4 Fer plis dan Predikasyon: Eski ou kapab fer plis dan predikasyon pandan mwan Mars ek Avril? Ou pou sirman ganny benediksyon Bondye si ou fer zefor pour partaz avek lezot sa “Bonn Nouvel, konsernan laglwar Kris.” Zeova ki Sours tou leklersisman spirityel in dir: “Lalimyer pour klere omilye teneb.” (2 Kor. 4:4-6) Kot i neseser, bann ansyen pou fer plizyer randevou predikasyon dan diferan ler ek landrwa. Zot pou osi fer plis pour siport bann ki anvi pas plis letan dan predikasyon. Sa i kapab enkli predikasyon dan semen dan bomaten oubyen fer teritwar biznes ek temwannyaz par telefonn dan apremidi oubyen aswar. Pour ed ou kapab fer plis dan predikasyon, ou kapab deside pour met serten kantite er-d-tan e fer zefor pour atenn sa lobzektif. Bokou proklanmater i fer pionye asistan konman en fason pour donn Zeova zot meyer.—Kol. 3:23, 24.
5. Konman bokou i benefisye avek lakantite er-d-tan ki en pionye asistan i mete?
5 Eski ou kapab fer Pionye asistan? I fer plis ki set an depi ki lakantite er-d-tan ki en pionye asistan i mete in diminyen. Sa sanzman in fer li posib pour bokou plis proklanmater eksperyans lazwa ek byenfe ler zot fer pionye asistan. Eski ou’n seye? Serten i abitye fer li tou le zan. En kantite proklanmater dan bokou kongregasyon i fer pionye asistan ansanm. Sa i vin en gran lakonplisman dan aktivite kongregasyon pandan lannen. Eski ou kapab fer en progranm pour pas en bon mwan konman en pionye asistan pandan sezon Memoryal? Vi ki Avril i annan senk wikenn, alor i pou en bon mwan pour serten fer pionye asistan.
6. Ki laranzman ki’n ganny fer?
6 Eski ou kongregasyon pou ganny vizit sirveyan rezyonal pandan mwan Mars oubyen Avril? I annan en gran loportinite devan ou. Parey i’n deza ganny anonse, pandan lannen servis 2006, tou bann ki pe fer pionye asistan pandan sa mwan ki sirveyan rezyonal i vizite, pou ganny envite pour asiste lanmwatye sa renyon ki ganny fer avek bann pionye pandan semenn spesyal. San dout bann lenformasyon ki fortifye nou spirityelman ki ganny donnen dan sa renyon pou ed bann ki fer pionye asistan pour fer pionye ordiner. Deplis, pandan mwan Mars nou pou kontan pour ed bann dimoun vin dan laklerte spirityel par servi sa nouvo piblikasyon Ki Labib i vreman dir? Akoz ou pa fer li ou lobzektif pour konmans en letid Labib dan sa nouvo liv?
7, 8. (a) Kwa ki kapab ed nou fer en progranm pour kapab fer pionye asistan? (b) Ki mannyer ler fanmiy i korpere sa i kapab ede, e konman fanmiy antye i benefisye?
7 Anmezir ki ou reflesir lo sa 50 er-d-tan ki en pionye asistan i mete, deside ki progranm ki pou permet ou fer sa lalimyer laverite klere pour apepre 12 er-d-tan sak semenn. Koz avek bann ki’n reisi fer li, e osi avek lezot dan kongregasyon. Sa i kapab ankouraz zot pour zwenn ansanm avek ou. Bann proklanmater batize, zenn konman vye in vwar ki i pa tro difisil pour atenn zot lobzektif akoz zot fer en bon plan. Priye e apre si posib, fer ou plan e fer pionye asistan!—Mal. 3:10.
8 Bokou fanmiy in vwar ki ler tou dimoun i korpere i posib ki omwen enn dan fanmiy i kapab fer pionye. En fanmiy ti deside ki tou le senk ki ti’n batize i fer pionye asistan. Sa de lezot zanfan ki pa ti ankor batize ti fer en gran zefor pour fer plis. Ki mannyer sa fanmiy ti benefisye par sa gran zefor ki zot ti’n fer? Zot ti ekrir: “Ti vreman gou, e nou ti santi ki nou fanmiy ti’n vin pli pre avek kanmarad. Nou remersye Zeova pour sa gran benediksyon!”
9. Ki mannyer nou kapab les nou lalimyer klere pandan sa sezon Memoryal?
9 Eski nou aktivite spesyal pandan mwan Mars ek Avril pou ankourazan? Eski i pou apros nou pli pre avek nou Papa dan lesyel? Sikse ki nou pou gannyen pou depan lo zefor ki nou fer pour ogmant nou lanmour pour Bondye ek son Garson e osi pour partisip plis dan predikasyon. Annou determinen parey sa psalmis ki ti sante: “Mon pou loue Zeova en kantite avek mon labous, e mon pou loue li parmi en kantite dimoun.” (Ps. 109:30) Pandan sa sezon Memoryal, Zeova pou beni tou sa ki nou fer avek devouman. Alor annou les en gran lalimyer klere pour ki bokou dimoun i kapab sorti dan teneb e “ganny lalimyer lavi.”—Zan 8:12.