En Led ki fasilman ganny trouve
1. Ki mannyer en dimoun i kapab vin feb spirityelman?
1 Anna i en ser ki annan en mari ki pa Temwen e i osi annan en travay ki pran preski tou son letan. I ti tre difisil pour li asiste bann renyon regilyerman, partisip dan predikasyon, e etidye Parol Bondye. Menm si i ti ankor kontan Zeova, i ti vin inaktif. Erezman, bann ansyen ti ed li spirityelman.
2. Dan ki fason tou Kretyen i kapab vin en led ki fasilman ganny trouve?
2 Ler nou aksepte led dan kongregasyon, sa i montre ki nou pe depan lo Zeova. Par imit swen ki Zezi ti donnen avek lanmour, bann ansyen i rod loportinite pour ankouraz e ofer led bann ki pe rankontre difikilte pour akonpli zot devwar konman Kretyen. (1 Tesa. 5:14) Souvannfwa, zis en parol lankourazman baze lo en verse Labib i kapab sa ki sa dimoun ti bezwen. Tou Kretyen pa zis bann ansyen ki bezwen siport bann ki feb. San dout nou tou nou’n deza santi lefe en bon “parol ki ganny dir dan son moman apropriye.”—Prov. 25:11; Iza. 35:3, 4.
3, 4. Ki i enplike ler nou pe ed lezot, e ki mannyer nou kapab fer sa?
3 Pran Linisyativ: Pour kapab montre lentere senser dan bann ki bezwen led, fodre ki nou pran linisyativ, konpran lezot, e persiste dan nou zefor. Kan Yonatann ti konnen ki David ti dan en sitiasyon tre difisil, i “ti leve e al ver David, laba Ores, pour fortifye son lanmen.” (1 Sam. 23:15, 16) Ed lezot avek douser. Bann parol ki ganny dir avek lentere senser i anmenn bon rezilta. Anplis ki sa, Zezi ti montre klerman ki nou bezwen fer bokou zefor e byen prepare pour kapab ed en frer oubyen en ser revin for spirityelman. (Lik 15:4) Ler nou vreman anvi ed en lot dimoun, sa pou pous nou pour kontinyen ofer led menm si nou pa ganny rezilta vitman.
4 Pa i ankourazan ler nou pran linisyativ pour envit lezot, tel parey bann ki dan nou letid liv, pour akonpanny nou dan predikasyon! Ler nou pe ed en serviter Zeova pour partisip dan predikasyon, nou kapab profit sa loportinite pour ankouraz li pour fer plis dan servis Bondye. Bann tel moman lazwa ki zot pase ansanm pou sirtou ankouraz bann ki pe esey reganny zot lekilib.
5. Ki led bann ansyen i kapab ofer dan serten ka?
5 En bon Laranzman: Bann ki pa pe partisip oubyen asosye avek kongregasyon pour en pe letan i kapab bezwen plis led pour batir zot lafwa. En letid Labib dan en piblikasyon parey Ador sa sel vre Bondye, Apros avek Zeova, oubyen Ki Labib i vreman dir? i kapab san menm sa led ki zot bezwen. Vi ki sa dimoun in deza batize, sa letid pa devret al pour bokou letan. Komite Servis Kongregasyon i devret byen obzerve lekel ki bezwen benefisye avek sa laranzman.—Vwar Kwen Kestyon dan Nou Minister Rwayonm Novanm 1998 ek Novanm 2000.
6. Ki mannyer en ser ti reganny lafors spirityelman?
6 Anna, ki nou ti mansyonnen pli boner, ti aksepte led bann ansyen. Zot ti fer en ser matir spirityelman kondwir en letid Labib avek li. Apre zis kat sesyon letid, pour ankor enn fwa i ti kapab apros avek Zeova. I ti rekonmans asiste bann renyon e reganny sa lanvi pour loue Zeova piblikman. Sa ser ti osi ed li dan predikasyon par anmenn li lo lezot letid Labib ziska i ti kapab lo li menm reganny lafors pour pres port an port. I ti zis bezwen led pour li kapab rekonmans son bann aktivite spirityel!
7. Ki byenfe i anmennen ler nou fortifye lezot spirityelman?
7 Ler nou fortifye lezot sa i benefisye tou dimoun. Sa dimoun ki’n ganny led i vreman kontan pour apros avek Zeova e pour enplike dan bann aktivite Son lorganizasyon. Bann ansyen i kontan pour vwar en tel progre. (Lik 15:5, 6) Ler kongregasyon antye i anvi ed lezot sa i fer zot ini. (Kol. 3:12-14) Pa nou annan bon rezon pour imit Zeova, ki en led ki fasilman ganny trouve!—Efe. 5:1.