Aktivite pandan mwan Out pou inoubliyab!
En nouvo trak pou ganny distribye dan lemonn antye
1. Vi ki nou pe apros 100 an depi ki Rwayonm in ganny etablir, ki kanpanny spesyal ki pou ganny fer dan lemonn antye?
1 Santyenm lannen depi ki Rwayonm Bondye in ganny etablir pe aprose. Pa i apropriye ki nou onor Zeova atraver en kanpanny spesyal! Pandan mwan Out, nou pou partisip dan distribisyon en nouvo trak ki annan pour tit Kote nou kapab trouv larepons bann kestyon enportan dan lavi? ki pou ganny fer dan lemonn antye. Sa trak i ankouraz bann lekter pour rod larepons dan Labib e eksplike ki mannyer jw.org i kapab ed zot.
2. Ki mannyer nou kapab partisipe pour loue e glorifye Zeova pandan mwan Out?
2 Annou glorifye Zeova: Pour ed bann proklanmater pour fer plis dan predikasyon, en provizyon spesyal in ganny fer pour bann ki ti a kontan fer pionye asistan pandan mwan Out. Pandan sa mwan, bann proklanmater batize pou kapab fer pionye asistan pour 30 erdtan. Vi ki Out i annan senk Vandredi, Sanmdi ek Dimans, bokou proklanmater ki travay oubyen lekol pandan lasemenn pou kapab fer pionye asistan dan wikenn. Si ou etidye Labib avek en dimoun ki pe byen progrese oubyen en zanfan ki ti a kontan vin en proklanmater, koz avek kordinater konsey ansyen la konmela. Pa i pou en lankourazman pour vwar zot zwenn ansanm avek nou konman proklanmater pandan sa mwan enportan! Menm si bokou pionye ordiner i pran zot vakans pandan mwan Out apre ki zot in fini ganny zot kantite erdtan pour sa lannen, i kapab posib pour zot aziste zot progranm pour ki zot kapab partisip plennman dan sa kanpanny spesyal. La i lemoman pour bann fanmir diskit lo ki mannyer zot pou partisipe pour glorifye e loue Zeova pandan mwan Out.—Ezra 3:11; Prov. 15:22.
3. Ki nou ti a kontan i arive pour sa kanpanny spesyal?
3 Menm si nou’n deza partisip dan en kanpanny parey oparavan, nou swete ki sa enn pou inoubliyab. Eski nou kapab fer plis erdtan, annan plis proklanmater ek pionye asistan pandan mwan Out? Anmezir ki nou termin lannen servis 2014, nou ti a kontan ki Zeova i beni zefor son pep partou dan lemonn pour fer sa mwan Out vin sa pli meyer mwan dan listwar pep Zeova!—Mat. 24:14.