Servi jw.org dan predikasyon—“Vin zanmi Zeova”
Dan“Bible Teachings” lo jw.org i annan en seksyon pour zanfan ki apel “Vin Zanmi Zeova” ki enkli bann sanson, video ek aktivite. Eski ou’n deza servi li dan predikasyon? Si ou pe etidye Labib avek en paran ki annan pti zanfan, akoz ou pa montre li? Sa i kapab motiv li pour al get lezot seksyon lo nou sit Enternet.
Ler i ti pe distribye Nouvel Rwayonm No. 38, en frer ti zwenn en madanm ki ti konmans lir sa trak deswit apre ki i ti’n gannyen. I ti annan detrwa zanfan avek li ki ti anvi konnen kisisa sa trak. Sa frer ti koz en pe lo konteni sa trak e i ti montre zot ladres nou sit Enternet par deryer. Lefet ki sa madanm ti montre lentere, i ti sezi sa loportinite pour zwe enn sa bann video lo Kaleb pour li ek son zanfan, par servi son lekipman elektronik.
En ser ti koz avek en koleg travay lo nou sit Enternet ek bann lenformasyon ki i annan lo la pour lafanmir. Sa koleg travay ti al lo jw.org ansanm avek son bann zanfan. Pli tar, i ti dir sa ser ki son bann zanfan ti pe taye dan lakaz anmezir zot ti pe sant sa kantik “Anonse,” ki enn parmi bann kantik anba sa seksyon“Vin Zanmi Zeova.”
Vin familye avek sa seksyon lo jw.org e download enn sa bann video, sanson oubyen aktivite lo ou lekipman elektronik. Koumsa ou pou pare pour servi sa seksyon lo jw.org dan predikasyon. Pa sa i en zouti itil ki pou ed nou konman bann serviter Senyer!—Akt 20:19.