Pres avek lasirans dan teritwar biznes
1. Akoz nou pa devret dekouraze si nou vwar li difisil pour pres dan bann teritwar biznes?
1 Eski ou kanmi pour rann temwannyaz dan bann teritwar biznes? Si i le ka, pa dekouraze akoz menm Pol ki labitid ti pres san lafreyer e avek lardyes ti bezwen “pran kouraz” pour li prese. (1 Tesa. 2:2, NW) Annou get serten defi ek sizesyon ki kapab ed nou dan sa domenn.
2. Akoz nou pa devret enkyet ki nou pou irit sa bann travayer?
2 Eski i pou irit bann dimoun ki pe travay? Dan bann lofis ouswa landrwa komersyal, bann travayer i servi manm piblik e zot ekspekte ganny enteronpe. Souvan zot pou zantiy vi ki zot konsider ou konman en kliyan. Si ou sanz dan en bon fason e ou amikal e zantiy, ou pou pous zot pour azir parey.
3. Dan ki fason ou kapab evite irit bann kliyan?
3 Eski mon pou bezwen fer mon prezantasyon devan lezot kliyan? Si i posib, swazir en letan kot napa bokou dimoun ki pe frekant sa landrwa, par egzanp, ler zot fek ouver. Espere ziska ki manedyer ouswa travayer i tousel avan ou apros li. Fer en prezantasyon ki vreman kourt.
4. Ki nou kapab dir kan nou dan bann landrwa travay?
4 Ki mon pou dir? Si i annan plizyer travayer, koz avek sa enn ki ansarz. Ou kapab dir: “I difisil pour trouv bann anplwaye kot lakour, alor nou pe vizit ou dan ou landrwa travay. Mon konnen ou okipe, alor mon pa pou pran bokou ou letan.” Pour pa donn lenpresyon ki nou pe vin vann serten keksoz, ordinerman i pli bon pour pa koz lo kontribisyon amwen ki nou ganny demande ki mannyer nou travay i ganny finanse. Depandan lo sa kalite biznes, ou kapab demann sa manedyer permisyon pour koz avek son bann anplwaye. Fer menm prezantasyon avek lezot travayer. Si en travayer i vreman okipe, akoursi ou prezantasyon e kit en trak avek li. Si i pa posib pour koz avek bann travayer, petet ou pou ganny permisyon pour kit bann piblikasyon kot bann travayer i pran brek ouswa kot resepsyon.
5. Ki rezon nou annan pour pres dan bann teritwar biznes avek lasirans?
5 Zezi ek Pol ti pres dan bann landrwa biznes avek lasirans e ou osi ou kapab fer parey. (Mat. 4:18-21; 9:9; Akt 17:17) Demann Zeova led pour reste kalm e annan lardyes. (Akt 4:29) Dan teritwar biznes, nou zwenn serten dimoun ki nou pa normalman zwenn kot lakour, alor akoz ou pa esey sa metod predikasyon?