Enformatif pour ou Lodyans

POUR dimoun kapab aprann atraver ou prezantasyon, ou bezwen fer plis ki zis koz lo en topik ki annan valer. Demann ou lekor: ‘Pour ki rezon sa lodyans i bezwen antann sa topik? Ki mon pou al dir ki pou fer sa lodyans santi ki zot in vreman benefisye atraver sa diskisyon?’

Dan lekol, ler ou ganny demande pour demontre konman pour rann temwannyaz avek en dimoun, se ou lodyans ki pou reprezant sa dimoun. Dan lezot ka, ou kapab pe adres kongregasyon an zeneral.

Ki ou Lodyans i konnen. Poz ou lekor sa kestyon, ‘Ki sa lodyans i konnen lo sa topik?’ Larepons sa kestyon pou servi konman sa baz lo ki ou devlop ou ekspoze. Si ou pe koz avek en kongregasyon ki kontyen bokou Kretyen matir, pa zis repet bann laverite fondamantal, ki laplipar zot i konnen. Servi sa bann laverite fondamantal konman en baz pour ou devlop ou ekspoze. Byensir, si i osi annan bokou nouvo ki enterese dan lasistans, ou devret pran an konsiderasyon bezwen tou le de group dimoun.

Aziste vites ou prezantasyon dapre sa ki ou lodyans i konnen. Si ou enkli serten lenformasyon ki petet zot familye avek, diskit zot ase vitman. Me pa depese ler ou pe prezant bann lide ki kapab nouvo pour lamazorite ou lodyans, pour ki zot ava kapab byen konpran sa bann lide.

Kwa ki pou enform lezot. Pour enform lezot i pa toultan vedir ki ou bezwen annan en keksoz nouvo pour dir. Serten orater i annan en abilite pour dir serten laverite ki familye avek en tel senplisite, ki fer ki bokou dan lodyans pou konpran sa bann laverite fasilman e vitman.

Dan predikasyon, i pa sifi pour zis mansyonn en nouvel ki demontre ki nou pe viv dan bann dernyen zour. Servi Labib pour montre sinifikasyon sa levennman. Sa dimoun pou sirman aprann keksoz par sa fason. Pareyman, ler ou pe mansyonn serten lenformasyon konsernan lalwa lanatir oubyen lavi bann plant ek zannimo, ou pa devret fer li zis avek en bi pour prezant serten fe syantifik enteresan ki sa dimoun pa’n zanmen deza tande avan. Okontrer, ou lobzektif i devret pour relye levidans dan lanatir avek bann deklarasyon dan Labib pour montre ki i annan en Kreater ki kontan nou. Sa pou ed sa dimoun pour get keksoz avek en nouvo fason panse.

Prezant en topik avek en lodyans ki’n deza antann li plizyer fwa i kapab en defi. Me pour vin en ansennyan efikas, ou bezwen aprann konman pour reisi fer sa byen. Konman sa i kapab ganny akonpli?

Fer resers pou ede. Dan plas ki ou zis enkli bann fe ki ou kapab mazinen pandan ou ekspoze, servi bann zouti resers ki ganny diskite lo paz 33 ziska 38. Konsider sa bann sizesyon ki’n ganny prezante dan sa leson konsernan bann lobzektif ki ou devret pe esey akonpli. Dan ou resers, petet ou kapab trouv en levennman istorik ki pa tro byen koni e ki direkteman relye avek sa topik. Oubyen ou kapab dekouver en deklarasyon resan dan nouvel ki pou eklersi sa pwen ki ou deside diskite.

Anmezir ki ou egzamin sa lenformasyon, stimil ou prop lespri par demann bann kestyon parey ki? akoz? kan? kote? lekel? e konman? Par egzanp: Akoz sa i vre? Konman mon kapab prouv sa keksoz? Ki bann krwayans popiler ki fer li difisil pour serten dimoun konpran sa laverite Labib? Akoz i enportan? Konman sa pou afekte lavi en dimoun? Ki legzanp ki annan ki demontre benefis pour aplik li? Ki sa laverite Labib i revele lo personnalite Zeova? Depandan lo lenformasyon ki ou pe diskite, ou kapab demande: Kan sa ti arive? Ozordi, ki mannyer nou kapab aplik sa lenformasyon dan en fason pratik? Ou osi kapab fer ou prezantasyon pli vivan par demann e reponn serten sa bann kestyon ler ou pe donn sa diskour.

Petet ou diskour i obliz ou pour servi bann verse ki ou lodyans i familye avek. Ki ou kapab fer pour prezant zot dan en fason ki enform ou lodyans? Pa zis lir zot; eksplik zot.

Pour ou kapab fer en verse ki familye vin enformatif pour ou lodyans ler ou pe diskit li, i pou byen si ou eksplik sak morso dan sa verse alafwa, separ morso ki relye avek tenm ou diskour e apre eksplik zot. Konsider bann posibilite avek en verse parey Mika 6:8 dan Traduction du monde nouveau. Kisisa “lazistis”? Standar lazistis lekel ki pe ganny diskite? Ki legzanp ou kapab servi pour demontre ki savedir “pour demontre lazistis”? Oubyen “pour kontan labonte”? Kisisa modesti? Konman ou pou aplik sa lenformasyon dan ka en dimoun aze? Byensir, lenformasyon ki ou pou vreman servi, i devret ganny determinen par bann tel fakter parey ou tenm, ou lobzektif, ou lodyans, ek letan ki disponib.

Fourni bann definisyon senp lo bann lekspresyon i souvan itil. Pour serten dimoun, i sirprann e eklersi zot pour aprann sinifikasyon sa mo “Rwayonm” ki ganny mansyonnen dan Matye 6:10. Ganny rapele en definisyon i menm kapab ed en dimoun ki depi lontan i Kretyen pour pli konpran sa ki en verse pe vreman dir. Sa i evidan ler nou lir 2 Pyer 1:5-8 e apre definir bann diferan laspe ki ganny mansyonnen dan sa bann verse: lafwa, laverti, konnesans, kontrol lo ou prop lekor, perseverans, latasman avek Bondye, lafeksyon fraternel, ek lanmour. Ler bann mo ki annan apepre menm sinifikasyon i ganny servi dan en menm konteks, si ou definir zot sa i kapab ede diferansye zot avek kanmarad. Sa i vre avek bann tel term parey lasazes, konnesans, disernman, ek konpreansyon, ki ganny servi dan Proverb 2:1-6.

Si ou senpleman rezonn lo en verse, sa osi i kapab vin enformatif pour ou lodyans. Bokou dimoun i sirprann omoman ki zot realize ki dan serten tradiksyon Labib kot Zenez 2:7, i dir ki Adan i en nanm vivan e ki dapre Ezekyel 18:4, bann nanm i mor. Dan en moman partikilye, Zezi ti sirprann bann Sadiseen par fer referans lo Egzod 3:6, ki zot ti pretann pour krwar, e apre aplik li avek rezireksyon bann mor.—Lik 20:37, 38.

Parler fer resorti bann verse ki vin avan oubyen apre en verse i ede pour pli byen konpran bann sirkonstans ki sa ti ganny ekrir, osi lidantite sa orater oubyen sa dimoun ki ti pe ganny adrese. Bann Farizyen ti konn byen Psonm 110. Kantmenm sa, Zezi ti atir zot latansyon lo en detay enportan ki trouve dan premye verse. I ti demande: “Ki zot mazinen lo Mesi? I garson lekel?” Zot ti reponn li, “Garson David.” Zezi ti demann zot, “Alor akoz David enspire par Lespri ti apel li ‘Senyer,’ an dizan: ‘Senyer ti dir avek mon Senyer, asiz lo mon kote drwat, ziska ki mon a met ou bann lennmi anba ou lipye’? Si David ti apel li ‘Senyer’ ki mannyer alor Mesi i kapab garson David?’” (Mat. 22:41-45) Ler ou rezonn lo Labib parey Zezi ti fer, ou pou ed dimoun pour lir Parol Bondye avek plis latansyon.

Ler en orater i mansyonn letan ki en liv Labib ti ganny ekrir oubyen letan ki en serten levennman ti arive, i devret osi dekrir bann kondisyon ki ti dominan dan sa letan. Dan sa fason, sa lodyans pou konpran pli klerman lenportans sa liv oubyen sa levennman.

Bann konparezon i kapab ede pour fer lezot konpran e ganny enformen par sa ki ou dir. Ou kapab fer diferans ant en pwenn-vi popiler avek sa ki Labib i dir lo sa menm pwen. Oubyen ou kapab konpar de resi Labib ki parey avek kanmarad. Eski i annan diferans? Akoz? Ki nou aprann atraver zot? An fezan sa i kapab donn sa bann ki ekout ou en nouvo fason panse lo sa topik.

Si ou ganny dezinyen pour diskit serten laspe minister Kretyen, ou kapab anrisi ou prezantasyon par konmans avek en apersi. Diskit sa ki fodre ganny fer, akoz i bezwen ganny fer, e konman sa i relye avek nou lobzektif zeneral konman Temwen Zeova. Apre eksplik kote, kan e konman pour fer sa travay.

Me ki ou pou fer si dan ou diskour ou bezwen diskit lo serten “keksoz profon Bondye”? (1 Kor. 2:10, NW) Si ou konmans par idantifye e eksplik serten eleman enportan sa topik, alor i pou vin pli fasil pour lodyans konpran bann detay. E si ou konklir avek en rezimen bref lo ou lenformasyon, i tre probab ki ou lodyans pou santi zot satisfe ki zot in vreman aprann serten keksoz.

Konsey lo Fason viv Kretyen. Ou lodyans pou sirman benefisye ler ou ed zot pour vwar konman sa lenformasyon dan ou diskour i konsern zot lavi. Ler ou egzamin bann verse dan ou lenformasyon ki ou’n resevwar, demann ou lekor, ‘Akoz sa lenformasyon ti ganny prezerve dan Lekritir ziska nou letan?’ (Rom. 15:4; 1 Kor. 10:11) Mazin bann sitiasyon dan lavi ki sa bann dimoun dan ou lodyans pe fer fas avek. Konsider sa bann sitiasyon zot menm dan lalimyer bann konsey ek prensip dan Lekritir. Dan ou diskour, rezonn lo Lekritir pour montre konman sa bann verse i kapab ed en dimoun pour azir avek sazes dan bann tel sitiasyon. Evite koz dan en fason zeneral. Diskit bann latitid ek aksyon spesifik.

Pour konmanse, aplik enn oubyen de sa bann sizesyon presedan dan en diskour ki ou pe prepare. Anmezir ki ou ganny leksperyans, aplik lezot sa bann konsey. Avek letan, ou pou trouve ki lodyans pou antisip ou bann diskour, konfidan ki zot pou antann serten keksoz ki pou vreman benefisye zot.