Jeowabara kʼarebabʉ bedʼea zroma daya jʉ̃ã ẽã bada erbʉde

1. ¿Kʼãrẽta kʼawuapanʉ dayirãbara?

DAYIRÃRA Jeowa pʉwʉrʉdepanʉ baera, kʼawuapanʉ Jeowabara kãgata akʉza dayirãra bia wãmarẽã kãgabʉta (Rom. 8:35-39). Adewara biʼia kʼawuapanʉ Daizeze Bedʼearadebemaba jarabʉta opanʉbʉrʉ jõma bia wãita (Is. 48:17, 18). Mamina, ¿kʼãrẽta odai dayirãba bedʼea zroma jʉ̃ã ẽãta ũdubʉrʉdera?

2. ¿Kʼãrẽ bedʼea zromata ũduseapanʉ akʉza maʉ̃ kʼarea kʼãrẽta widiseabʉ dayikʉza?

² Jõma Jeowa pʉwʉrʉdebʉra bedʼea zromata ũdupanʉ. Bari jaraita, dayirã mebẽrãnebema abaʉba krĩcha zroma obiseabʉ, mejãcha kayabʉba nãã Daizezedebema bia obada kĩrãkʼa oẽ baera, naʉ̃ drʉade neida berabaribʉde dayirãsida zʉbʉria berabariseabʉ, mawũã ẽ bʉrʉ dayirãra pẽwãseapanʉ zʉbʉria odaita dayirãba ĩjãbʉ kʼarea. Dayirãba kʼãwũã bedʼea zroma ũdubʉrʉdera dayikʉza widiseabʉ: «¿Kʼãrẽa mʉ̃trʉ kʼãwũã zʉbʉrianʉmʉ? ¿Mʉ̃a kʼãrẽ nemitiata osi? ¿Jeowabara kʼãwũãra mʉ̃ra bia akʉ ẽka?». ¿Mawũã krĩchabarika ewari abaʉde? Maʉ̃ta krĩchabʉbʉrʉ maʉ̃ kʼarea sopʉarãra. Nããbema ẽbẽrarã Jeowa ode kʼẽrẽpabʉrasida mawũã krĩcha zroma obada (Sal. 22:1, 2; Hab. 1:2, 3).

3. ¿Kʼãrẽta kʼawuaseapanʉ Salmo 34:19debara?

³ (Akʉra Salmo 34:19). Naʉ̃ salmone bedʼea ũme kʼawuadayi: Nããra, ẽbẽra biarãra bedʼea zroma ũdupanʉ, yi ũmeta, Jeowabara ẽdrʉbibʉ maʉ̃ bedʼea zromaneba, ¿sãwũã kʼarebabʉ Jeowabara? Dayirã kʼawuabibʉ kʼãrẽa naʉ̃ drʉade kʼãwũã berabarinʉmʉta. Jeowabara jarabʉ iya zokʼabʉ opanʉnera dayirãra mejãcha sobia bʼaita, mamina maʉ̃ daucha jarabʉ dayirã naʉ̃ drʉadepanʉnera bedʼea zromara mejãcha ũdudaita (Is. 66:14). Jeowabara kãgabʉ dayirãba biode krĩchamarẽã ʉ̃rabʉrʉ kʼãrẽ nebia zei ʉ̃rʉ (2 Cor. 4:16-18). Mamina maʉ̃ nebia ze ẽ nãã Jeowaba dayirãra kʼarebayi iyi ode kʼẽrẽpa bʼaita (Lam. 3:22-24).

4. ¿Kʼãrẽta kʼawuadai naʉ̃ artikulodera?

⁴ Atia akʉdaya kʼãrẽta kʼawuaseapanʉta dayirãbara nããbema ẽbẽra Jeowa ode kʼẽrẽpapanananeba akʉza idi ewadebema kristianoraneba. Nãã jarada kĩrãkʼa edaʉde dayirãbara bedʼea zroma ũduseabʉ dayirãba jʉ̃ã ẽãne, mamina dayirãba soiduba ĩjãpanʉbʉrʉ Jeowa ʉ̃rʉ, iya kʼarebayi (Sal. 55:22). Dayirãba naʉ̃ra yizara ʉ̃rʉ kʼawuapanʉena dayikʉza wididaibara: «Bedʼea zroma ãyide kĩrãkʼa ũdubʉrʉdera, ¿kʼãrẽta oseabʉ mʉ̃ara? Naʉ̃ra yizarabara, ¿sãwũã audre ĩjãbibʉ Jeowa ʉ̃rʉ? ¿Mʉ̃ara kʼãrẽta kʼawuabʉ ãyideba?».

YIZA DAIZEZE BEDʼEADE EDABɄTA

5. ¿Kʼãrẽ bedʼea zromata ũdusi Jacobʼbara Labán kʼarea? (Akʉra poto yi nããrabemata).

⁵ Ẽbẽra nããbema Jeowa odebadasida bedʼea zroma ũdusi ãya jʉ̃ãna ẽãne. Bari jaraita akʉdaya Jacob ʉ̃rʉ. Jacob zezeba jarasi Labánʼinʉ wãmarẽã, Labán kaume mia kʼãĩmarẽã, ãyisida Daizeze ʉ̃rʉ ĩjãbasi baera. Akʉza jarasi iya mawũã ora, Jeowabara iyaʼa mejãcha nebia diaita (Gén. 28:1-4). Aramaʉ̃ta Jacobʼbara osi yi zezeba zokʼada kĩrãkʼa, Canaánʼneba wãsi Labánma. Iyara kau ũme erbasi Leata akʉza Raquelta. Mamina Jacobʼbara kãgasi yi tẽãbemata Raquelta, maʉ̃ kʼarea Labánʼʉ̃me bedʼeasi yi kaume juwa jidai nãã 7 poagabayeda trajaita (Gén. 29:18). Mamina mawũã berabari ẽ basi, Labánbara sewasi yi kau nããbema Leaʉ̃me juwa jidamarẽã. Mawũã berabaridata Labánbara semana aba berabaribʉrʉde yi kau Raquelʼʉ̃me juwa jidabisi. Mamina maʉ̃ kʼarea jarasi awuru 7 poaga trajamarẽã iyiʉ̃me (Gén. 29:25-27). Akʉza Labánbara Jacobʼra trajodebida sewasi, mawũã sewabʉta 20 poagabasi (Gén. 31:41, 42).

6. ¿Adewara kʼãrẽ bedʼea zromata awuantasi Jacobʼbara?

⁶ Jacobʼbara maʉ̃ awuara bedʼea zromata ũdusi. Jacobʼbara mebẽrãra mejãcha erbasi, mawũãsidu ãbapana ẽ basi. Bari jaraita, yi wũãwũãrabara ariya nẽdo bʉesi ãyi tẽãbʉ Joséta, awuru nezokʼa bamarẽã. Adewara yi wũãwũãra ũmeba Simeón akʉza Levíʉ̃meba imitia bedʼeabisida yi mebẽrã ʉ̃rʉ akʉza Jeowa ʉ̃rʉ. Adewara yi kima Raquel yi wũãwũã ũmeta to bʉeda beisi akʉza Jacob zõnãbaside jarraba kʼarea waĩbarabasi Egiptoeda (Gén. 34:30; 35:16-19; 37:28; 45:9-11, 28).

7. ¿Sãwũã ũdubisi Jeowabara Jacobʼra bia akʉbʉta?

⁷ Jacobʼba naʉ̃ bedʼea zroma mejãcha ũdusimina idubʉ ẽ basi Jeowa ʉ̃rʉ ĩjãbʉta akʉza iya kʼãrẽ nebiata diaya adata. Adewara Jeowabida iyira bia akʉsi akʉza Labánba Jacob mejãcha sewabasimina, Jeowaba iyaʼa nebia mejãcha diasi. Adewara Jacobʼbara Jeowa mejãcha biga diabasibaibara, yi warra José iya beidata krĩchabadara jẽda ũdusi kʼarea. Jacob Jeowaʉ̃me neũdukʼawua bia baera kʼarebasi maʉ̃ bedʼea zroma mejãcha zebʉra awuantaita (Gén. 30:43; 32:9, 10; 46:28-30). Abarika dayirãsida Jeowaʉ̃me neũdukʼawua biabʉrʉ bedʼea zroma dayirãba jʉ̃ã ẽãta ũdubʉrʉdera awuantaseapanʉ.

8. ¿Kʼãrẽta oita krĩchabasi nokʼo Davidbara?

⁸ Nokʼo Davidbara jõma obe ẽ basi Jeowaita oita krĩchabadara. Iyara krĩchabasi Daizezeita templo oita. Iya jarasi Natánʼa kʼãrẽta oita krĩchabʉta, maʉ̃ba Natánba jarasi: «Bʉ soba jarabʉta ora, Daizeze wãrĩnuarãra bʉme bʉ baera» (1 Cró. 17:1, 2). Maʉ̃ bedʼeaba Davidʼra mejãcha sobiasibaibara, maʉ̃ kʼarea iya krĩchasibaibara templo sãwũã parã jʉ̃drʉita.

9. ¿Kʼãrẽta osi Davidba iyaʼa bedʼea mitiata jarasidadera?

⁹ Mamina iyabaʉ ewaride propeta Natánbara bedʼea biata jara ẽ basi nokʼo Davidʼara. Jeowaba jarasi Natánʼa Davidbara templora parã ẽ baibasita awuarabʉrʉ yi warrara abaʉdebemaba parãibasita (1 Cró. 17:3, 4, 11, 12). ¿Kʼãrẽta osi Davidbara maʉ̃ bedʼea ũrĩsidera? Iya templo oita krĩchabada idubʉ kʼãrãpe, krĩchasi yi warraʼa kʼareba odiaita maʉ̃ templora, maʉ̃ kʼarea nekʼãrẽ jõma jʉrʉsi maʉ̃ templo parãmarẽã (1 Cró. 29:1-5).

10. ¿Jeowabara Davidʼa kʼãrẽ nebiata diasi?

¹⁰ Jeowaba Davidʼa templo parã ẽ baita jarada tẽã, bedʼea abarika zesi iyiʉ̃me. Jeowaba jarasi Davidʼa iyideba zedaranebema abaʉba ewari jõmaʉ̃nẽ zokʼaita (2 Sam. 7:16). Jesuba 1.000 poagabayeda zokʼabʉrʉde, ẽjũã biadera Davidʼra mejãcha sobiabayi, maʉ̃ra iyideba zesi baera. Dayirãba Jeowaita jõma oita kãgabʉta aripe obeda ẽ mina, Jeowaba dayirã nebiata diaseabʉ dayirãba jʉ̃ã ẽ badata.

11. Kristianora nããbema siglodebemaraba Daizeze Nokʼo zeita jʉ̃ãpanʉenara, ¿kʼãrẽ nebiata ũdusi? (Hechos 6:7).

¹¹ Kristianora nããbema siglodebemarasida ãya bedʼea zromata ũdusida ãya jʉ̃ã ẽ badata. Bari jaraita, ãyara kãgapanasi Daizeze Nokʼoba, mesera zokʼa jʉ̃drʉmarẽã, mamina kʼawua ẽ basi kʼãrẽ ewaride zeita maʉ̃ra (Hech. 1:6, 7). Mawũẽra ãyara, ¿kʼãrẽta osida? Nekʼãrẽ opanasi Daizeze Bedʼea ewari jõmaʉ̃nẽ jaradiapanʉne, ãya Daizeze Bedʼea wuabema ẽbẽrarã audre jaradia wãne ũdusida sãwũã Jeowaba ãyaʼa nebia mejãcha diabʉta (akʉra Hechos 6:7).

12. ¿Kʼãrẽta osida kristianora nããbema siglodebemarabara jarraba zroma baesidera?

¹² Kristianora nããbema siglodebema ewaride «jarraba zromata» zesi jõmaʉ̃ drʉade (Hech. 11:28). Maʉ̃ne mebẽrãsida mejãcha zʉbʉriasi jarraba kʼarea. Bari jaraita, maʉ̃ba yibarirãra mejãcha krĩcha zroma obasibaibara, yiko edeita ãyi wũãwũãra kʼarea. Mamina, ¿kʼãrẽta odaibarabasi warrara Daizeze bedʼea audre jaradiakĩrãbadabara? ¿Ãyara jʉ̃ãnaibarabasika jarraba berabariyeda? Adewara ãyi aba abaka awuarapanasimina idubʉda ẽ basi Daizeze Bedʼea jaradiapanʉta, adewara ãya yiko erbʉta mebẽrã Judeadebema dedekapanasi (Hech. 11:29, 30). 

13. ¿Kʼãrẽ nebiata ũdusida kristianora nããbema siglodebemarabara jarraba zromata berabariside?

¹³ ¿Kʼãrẽ nebiata ũdusida kristianora nããbema siglodebemarabara jarraba zromata berabariside? Ẽbẽra yi kʼareba jidadarabara ũdusida Jeowaba sãwũã kʼarebabʉta ãyira, maʉ̃ kʼarea mejãcha sobiapanasi (Mat. 6:31-33). Adewara sentisida mebẽrã ãyi kʼareba jʉ̃ẽnabawara ãbapanʉta. Mebẽrãba ãya nekʼãrẽ erbada diadata akʉza nekʼãrẽ awurude kʼarebadara mejãcha sobiapanasi, ãya wuabemara diapanasi baera (Hech. 20:35). Jeowabara ãyaʼa nekʼãrẽ biata mejãcha diasi, ãya oseabʉta jõma osida baera.

14. ¿Bernabéta Pabloʉ̃mera kʼãrẽta sãwũã berabarisi akʉza ãya kʼãrẽ nebiata ũdusida? (Hechos 14:21, 22).

¹⁴ Kristianora nããbema siglodebemara badua pẽwãpanasi zʉbʉria odaita. Krĩchara kʼãrẽta sãwũã berabarisita Bernabéta Pabloʉ̃me Daizeze Bedʼea jaradiapanʉne pʉwʉrʉ Listra kʼawa. Nããrãra Bernabé akʉza Pablo bedʼeara ẽbẽrabara bia ũrĩsida. Mamina iyabaʉ ewaride wuabema ẽbẽrarã jarasida Bernabéta Pabloʉ̃me mejãcha podamarẽã, maʉ̃ kʼarea Pablora mejãcha posida baera krĩchasida beasidata (Hech. 14:19). Mawũãsidu Bernabéta Pabloʉ̃mera Daizeze Bedʼea jaradiabasi awuru pʉwʉrʉde. ¿Kʼãrẽ nebiata ũdusi ãyara? Kʼarebasi ẽbẽrarã mejãchaʉta Daizeze ode wãmarẽã akʉza ãya odadeba yiza biata amaesi wuabemara mebẽrãita (akʉra Hechos 14:21, 22). Ẽbẽra mejãchaʉba Jeowa ʉ̃rʉ ũdukʼawuasida Bernabéta Pabloʉ̃me Daizeze bedʼeata jaradiabasi baera ãyi pẽwãpanasimina zʉbʉria odaya. Dayirãsida abarika aukʼarada ẽ bʉrʉ Daizeze bedʼea jaradiapanʉta Jeowaba dayirã mejãcha nebiata diayi.

YIZA DAYIRÃ EWARIDE

15. ¿Kʼãrẽta kʼawuaseapanʉ mebẽã Alexander Macmillanʼnebara?

¹⁵ Poaga 1914 nãã, jõma Jeowa ʉ̃rʉ Kʼawuabipanʉrãbara krĩchapanasi ãyira ʉ̃ta wãbodota. Mawũã krĩchabasi mebẽã Alexander Macmillanba, maʉ̃ kʼarea iya diskurso diadade jarasi septiembre 1914de: «Naʉ̃ diskurso diadata wuara dia ẽ bayi mʉ̃ara». Mamina mawũã berabari ẽ basi, maʉ̃ tẽã mebẽã Alexanderba bʉsi: «Dayirãbara mawũã krĩchada ẽ baibarabasi, awuarabʉrʉ ewari jõmaʉ̃nẽ krĩchaibarabasi sãwũã Daizezede ewariza audre bia odaita». Mebẽã Alexanderʼra ewari jõmaʉ̃nẽ Daizezedebemata obasi, adewara kʼarebasi mebẽrã karselde badasida, adewara mebẽã Alexanderʼra ãba yi jʉrebasi zõnã ba kʼãrãpe iyi beibodobʉidu. Mebẽã Alexanderʼra ewari neẽbasi Daizezedebema obʉ kʼarea. Mawũã obʉba iyara ¿kʼãrẽ nebiata ũdusi iyi ʉ̃ta wãñiena jʉ̃ã bʉedara? Iya poaga 1966de bʉsi naʉ̃ta: «Mʉ̃a ĩjãbʉra idibasidu zareabʉ mʉ̃a nãã ĩjãbada kĩrãkʼa». Mebẽã Alexanderʼra yiza bia jõmaita, mamina audre jari mebẽrã bedʼea zroma erbʉta mesera taʉmarẽãbʉmina wabida jõ ẽãita (Heb. 13:7).

16. ¿Kʼãrẽ bedʼea zroma ãya jʉ̃ãna ẽãta ũdusida Herbert Jennings akʉza yi kimaʉ̃mebara? (Santiago 4:14).

¹⁶ Mebẽrã mejãchaʉta kaya zroma ũdupanʉ ãya jʉ̃ã ẽãne. Akʉdaya mebẽã Herbert Jennings nebʉra ʉ̃rʉ.b Iyira yi kimaʉ̃me misionerobasi drʉa Ghanane. Tẽã iyira kayasi buru morrode, maʉ̃ba atiaʉde kĩrã kʼawua ẽ totobichuasi. Jenningsba jara ũrĩbita daya kʼawua ẽãta nrʉemane kʼãrẽta sãwũã berabari ʉ̃rʉ iya zokʼasi Santiago 4:14ba bedʼea jarabʉta (akʉra). Iya tẽã bʉsi: «Daira wãibarabasi pʉwʉrʉ Ghananeba akʉza amaeibarabasi dai neũdukʼawuarata, mawũã Canadáeda wãita [tratamiento jʉrʉita]». Jeowabara biode kʼarebasi mebẽã Jenningns akʉza yi kimaʉ̃me ãyi mejãcha kayabʉmina Daizeze ode kʼẽrẽpapanʉ baera.

17. ¿Sãwũã kʼarebasi Jennigns nebʉrabara wuabemara mebẽrãra?

¹⁷ Mebẽã Jennings nebʉra ʉ̃rʉra karta Jarakabʉdebʉ. Iya bedʼea jaradaba mebẽrã mejãcha kʼareba zebʉrʉ. Mebẽã wẽrã abaʉba jarabʉ: «Mebẽã Jenningsba jarabʉra mʉ̃ soidu jʉ̃ẽsi […]. Mʉ̃a lebʉrʉde mebẽã Jenningsba iyi misionerobadata idubʉsi baera iyi zrogabaya. Naʉ̃ba kʼarebabʉ mʉ̃abida bia krĩchaibarata, kʼãrẽta oibarata mʉ̃ neida berabaribʉrʉdera». Abarika berabarisi mebẽã aba, iyabida naʉ̃ta jarasi: «Mʉ̃ra 10 poagabayeda zõrãrã kongregasionebemabasi, mamina maʉ̃ta idubʉibarabasi burude kayabʉ baera. Mʉ̃ara lekĩrã ẽ basi mebẽrã ʉ̃rʉ nebʉrabʉra, mama eda jarasi baera mebẽrãbara nekʼãrẽ biata mejãcha obasita. Krĩchabasi mʉ̃ra jipa zeri ẽãta […]. Mebẽã Jennigns aukʼara ẽ basi baera Daizezeba zokʼabʉ aripe oita, naʉ̃ba mʉ̃aʼa so zarea diasi». Naʉ̃ba dayirã jaradiabʉ bedʼea zroma dayirãba jʉ̃ã ẽãta awuantabʉrʉdera dayirãbara wuabemara so zarea diaseabʉta. Dayirã nekʼãrẽ berabaribʉrʉba daya kãgabadata aripe berabaribi ẽãne, dayirãra yiza bia baseabʉ wuabemaraita, daya ĩjãbʉ ũdubibʉde akʉza maʉ̃ bedʼea zroma awuantabʉde (1 Ped. 5:9).

18. Potode ũdubibʉ kĩrãkʼa, ¿kʼãrẽta kʼawuapanʉ mebẽã wẽrã Nigeriadebemanebara?

¹⁸ Naʉ̃ drʉade nemitia berabaribʉba kaya zroma COVID-19 kĩrãkʼa naʉ̃ba mejãcha zʉbʉriabibʉ mebẽrãra. Bari jaradaita, mebẽã wẽrã pẽdrabʉta Nigeriadebemata yiko mejãcha neẽbasi. Yi kauba iyaʼa widisi arroz sãbʉ zakedebʉta makoda tẽãra, ¿kʼãrẽta kodaita? Aramaʉ̃ta iya jarasi iyi kauʼa: «Wuara neẽ baita yikora akʉza maʉ̃ daucha platasida neẽãta, mamina odaibasita pẽdra Sareptade kĩrãkʼa, okodaita arroz zake erbadata akʉza maʉ̃ tẽãra Jeowa ʉ̃rʉ ĩjãnaibasita» (1 Rey. 17:8-16). Iyabaʉ ewaride ãya yiko zake erbada makoda tẽã kʼãrẽ ʉ̃rʉ koita krĩchai naweda, mebẽrãba yikota mejãcha wesida. Mebẽrãba yiko wedabara ãyira nekobibasi semana ũme. Mebẽãba jarasi iya kʼawua ẽ basita Jeowaba jõma ũrĩnʉmʉta iya yi kauʼa jarabadara. Dayirãba soiduba ĩjãpanʉbʉrʉ Jeowa ʉ̃rʉ bedʼea zroma erpanʉne, naʉ̃ba kʼarebayi audre Jeowa kʼawa bʼaita (1 Ped. 5:6, 7).

19. ¿Kʼãrẽta sãwũã berabarisi mebẽã Alexéi Yershovʼra?

¹⁹ Aranʉwedaʉba dayirã mebẽrãra mejãcha pẽwã zebʉda ãyi zʉbʉria odaita ãya jʉ̃ã ẽãne. Krĩchadaya kʼãrẽta sãwũã berabarisita mebẽã Alexéi Yershovta iyira Rusiadebʉ. Iyi poaga 1994de buru kʼoesidera wabida, Jeowa ʉ̃rʉ Kʼawuabipanʉrã iduaribibasi Daizeze bedʼea jaradiamarẽã maʉ̃ pʉwʉrʉde. Mamina tẽã juneane jõma awuara besi. Poaga 2020de jenenerata mebẽã deda jʉ̃ẽsida, mõbe jõma edesida iya nekʼãrẽ nebia erbadata. Jedeko bio berabarida tẽã, iyira edesida juez nãã, mõbe jarasida iyara nekʼãrẽ mitiata osita. Akʉza ẽbẽra abaʉba ũdubisi Daizeze Bedʼea kʼawuakĩrãbʉta, mamina maʉ̃ra jipa sewidabasi, maʉ̃ba bideota grawasi. Maʉ̃ bideora zokʼasida mebẽã ʉ̃rʉ kʼawua odaita. Maʉ̃ ẽbẽrarã kʼãrẽaba so neẽ chuasi mawũã sewaita.

20. Mebẽã Yershovʼra, ¿sãwũã audre Jeowa neũdukʼawuabasi?

²⁰ Mebẽã Yershorv iyi zʉbʉria odaita pẽwãbadadebara, ¿nebiata ũdusika? Nebiata ũdusi. Maʉ̃ba kʼarebasi baera audre Jeowaʉ̃me neũdukʼawua bia bʼaita. Iya jarabʉ: «Mʉ̃ kimaʉ̃me badua yiwidʼipanʉ Jeowaʼa. Mʉ̃a kʼawuasi Jeowaba kʼareba ẽ bʉrʉ mʉ̃a awuantabe ẽ basita naʉ̃ra. Akʉza mʉ̃a Daizeze Bedʼea mʉ̃yidobaʉba estudiabʉba, mʉ̃ sopʉabʉta biode kʼarebasi. Mʉ̃a krĩchabʉ ẽbẽrarã Jeowaʉ̃me kʼẽrẽpabada Daizeze Bedʼeade eda nebʉrabʉta. Naʉ̃ nebʉraba mʉ̃aʼa jaradiabʉ yibiata bedʼea zroma ũdubʉrʉdera aduʼa bʼaita akʉza Jeowa ʉ̃rʉ wãrĩnu ĩjãita».

21. ¿Kʼãrẽta kʼawuasida naʉ̃ artikulodera?

²¹ ¿Kʼãrẽta kʼawuasida naʉ̃ artikulodera? Kʼawuasida dayirãbara edaʉde ũdubʉta bedʼea zroma daya jʉ̃ã ẽãne. Mawũã berabaribʉrʉdera Jeowabara ewari jõmaʉ̃nẽ kʼarebabʉ iyi odepanʉraba iyi ʉ̃rʉ ĩjãbʉrʉdera. Naʉ̃ artikulo testoba jarabʉ kĩrãkʼa «ẽbẽra biarãra mejãcha bedʼea zromata ũdupanʉ, mamina Jeowabara maʉ̃neba ẽdrʉbibʉ» (Sal. 34:19). Mawũẽra mejãcha krĩchada ẽ baibara dayirãba bedʼea zroma erbʉ ʉ̃rʉ, awuarabʉrʉ ĩjãnaibara Jeowaba zarea erbʉ ʉ̃rʉ, maʉ̃ba Apostol Pablode kĩrãkʼa jaraseapanʉ: «Nekʼãrẽ jõmaʉ̃ita zarea erbʉ, mʉ̃aʼa zarea diabʉdeba» (Filip. 4:13).