Parte 3
Tsa’ loc’sʌntiyob ya’ ti Egipto c’ʌlʌl che’ tsa’ ochi jini ñaxam bʌ rey ti Israel
Moisés tsiʼ pʌyʌ loqʼuel jini israelob yaʼ baqui woliyob ti mosojintel ti Egipto i tsiʼ pʌyʌ majlel yaʼ ti wits Sinaí, baqui Dios tsiʼ yʌqʼueyob jini I mandar tac. Ti wiʼil, Moisés tsiʼ choco majlel lajchʌntiquil xyojchʼ bʌ winicob chaʼan miʼ majlel i qʼuelob jini lum ti Canaán. Pero jini lujuntiquil cheʼ tsaʼ chaʼ sujtiyob tilel tsaʼ cʼoti i yʌlob mach bʌ isujmic tʼan. Cheʼ tsiʼ yubiyob jini tʼan tsiʼ chaʼ ñaʼtayob sujtel ti Egipto. Chaʼan maʼanic tsiʼ ñopoyob Dios tiʼ pejtelel i pusicʼal, Dios tsiʼ yʌcʼʌyob ti xʌmbal ñumel chaʼcʼal jab yaʼ ti i tiquiñal lum.
Ti wiʼil, Josué jiñʌch tsaʼ bʌ yajcʌnti chaʼan miʼ pʌy ochel jini israelob yaʼ tiʼ lumal Canaán. Jioba tsiʼ mele milagro tac, chaʼan miʼ mejlel i chʼʌmob jini tejclum. Tsiʼ waʼchoco jini Jordán jaʼ chaʼan maʼanix miʼ chaʼlen xʌmbal, yicʼot chaʼan miʼ jejmel jini tsʼajc tac am bʌ ti Jericó yicʼot tsaʼ waʼle jini Qʼuin cʼʌlʌl tsaʼ ñumi jumpʼejl qʼuin. Cheʼ bʌ tsaʼ ñumi wʌcpʼejl jab, jini lum tsaʼix chilbentiyob jini cananeojob.
Miʼ tejchel ti Josué, Israel tsaʼ yumantiyob ti juezob ti wʌclujumpʼejl i waxʌclujuncʼal (356) jabil. Cabʌl chuqui mi caj laj cʌn tiʼ tojlel lamitalob, cheʼ bajcheʼ jini Barac, Gedeón, Jefté, Sansón yicʼot Samuel. Cheʼ jaʼel mi caj laj cʌn lamital jini xʼixicob cheʼ bajcheʼ Rahab, Débora, Jael, Rut, Noemí yicʼot Dalila. Ti pejtelel, jini PARTE 3 chaʼan ili tsaʼ bʌ ujti miʼ tsʼʌctiyel wʌclujumpʼejl i jumbajcʼ (396) jabil.