Miʼ qʼuejlel mi ñopol i chaʼan Dios

Abraham tsiʼ cʌntesa Isaac chaʼan miʼ cʼuxbin Jehová yicʼot chaʼan miʼ ñopben tiʼ pejtelel i tʼan. Cheʼ bʌ añix 25 i jabilel Isaac, Jehová ti sube jiñi Abraham chaʼan miʼ mel (chaʼlen) ñoj tsʌts bʌ ti jacʼol. ¿A wujil ba chuqui tsiʼ cʼajtibe?

Dios tiʼ sube Abraham: «A wocolic, chucu jiñi chʼiton bʌ a walobil, jiñi cojach bʌ, i aqʼueñon bajcheʼ pulbil bʌ c majtan yaʼ ti wits Moria». Abraham mach yujil chucoch Jehová tsiʼ cʼajtibe jiñi ,pero tsaʼʌch i jacʼʌ.

Ti wen sʌcʼan cheʼ ti yijcʼʌlel, Abraham tsiʼ pʌyʌ majlel Isaac yicʼot chaʼtiquil i wiñicob yaʼ ti Moria. Cheʼ bʌ ñumeñix uxpʼejl qʼuin, tsaʼ caji i ñajti qʼuelob jiñi wits tac. Abraham tiʼ sube i wiñicob chaʼan miʼ cʌytʌlob ti pijt come mij caj i majlel yicʼot i yalobil i yʌcʼ pulbil bʌ majtañʌl. Abraham tsiʼ chʼʌmʌ majlel i cuchillo i tsiʼ yʌqʼue i yalobil chaʼan mi cuch majlel jiñi siʼ. Isaac tsiʼ cʼajtibe i tat: «¿Baqui an jiñi tiñʌmeʼ muʼ bʌ caj lac pulben chaʼan i majtan Dios?». Abraham tsiʼ jacʼbe: «Calobil, Jehová mi caj i yʌqʼueñonla».

Cheʼ bʌ tsaʼ cʼotiyob yaʼ ti wits, tsiʼ chajpayob jumpʼejl pulʌntib. Cheʼ jiñi, Abraham tsiʼ cʌchbe i yoc yicʼot i cʼʌb Isaac, i tsiʼ yʌcʼʌ yaʼ ti pulʌntib.

Abraham tsiʼ chucu i cuchillo. Ti jiñi bʌ ora, i yángel Jehová tsiʼ chaʼle tʼan yaʼ ti panchan i tsiʼ yʌlʌ: «¡Abraham! ¡Mach a tsʌnsan jiñi chʼiton! Wʌle cujilix chaʼan ñopol a chaʼan Dios come tsaʼ wʌqʼueyon a walobil». Cheʼ jiñi, Abraham tsiʼ qʼuele juncojt i tat tiñʌmeʼ jocʼol bʌ i xulub ti xʌcʼ teʼ. Ti orajach tsiʼ colo jiñi Isaac i tsiʼ pulu jiñi tiñʌmeʼ chaʼan miʼ ñusʌben i wenta i yalobil.

Cʼʌlʌl ti jimbʌ ora, Jehová tiʼ sube Abraham bajcheʼ i yamigo. ¿A wujil ba chucoch? Come Abraham tsiʼ luʼ jacʼʌ tsaʼ bʌ i sube Jehová, anquese mach yujilic chucoch tsiʼ cʼajtibe jiñi.

Jehová tsiʼ chaʼ cʼajtesʌbe jiñi i tʼan tsaʼ bʌ i yʌqʼue: «Mi caj c wen aqʼueñet cutslel. Mi caj c wen pʼojlesʌbeñet a pʼolbal». Jiñi yom i yʌl chaʼan Jehová miʼ caj i yʌqʼuen i chobejtʌbal tiʼ tojlel i familia Abraham jiñi weñoʼ bʌ i pusicʼal.