Rahab miʼ coltan jiñi xyojchʼob

Jiñi xyojchʼob tsaʼ majliyob yaʼ Jericó i tsaʼ cʌyleyob tiʼ yotot Rahab. I rey Jericó tsaʼ cʼoti i ñaʼtan, jin chaʼan tsiʼ choco majlel soldadojob tiʼ yotot Rahab. Tsiʼ mucu jiñi chaʼtiquil xyojchʼob yaʼ tiʼ pam i yotot i tiʼ sube jiñi soldadojob chaʼan miʼ majlel i sʌclañob ti yambʌ parte. Cheʼ jiñi Rahab tiʼ sube jiñi xyojchʼob: «Mi caj j coltañetla come cujil chaʼan laʼ wicʼot Jehová yicʼot chaʼan mi caj laʼ chʼʌm ili lum. Laʼ wocolic, acʼʌ laʼ tʼan chaʼan mi caj laʼ coltan c familia».

Jiñi xyojchʼob tiʼ subeyob Rahab: «Mi maʼ jocʼchocon ili chʌchʌc bʌ lazo yaʼ ti a ventana, mi cʌqʼueñet lon c tʼan chaʼan maʼañic chuqui mi caj i chaʼlen jiñi yaʼ bʌ añob ti a wotot i cuxul mi caj i cʌytʌl a familia».

Rahab tsiʼ colta jiñi xyojchʼob yaʼ ti Jericó cheʼ bʌ tsiʼ yʌqʼueyob jumpʼejl lazo chaʼan miʼ jubelob yaʼ ti ventana. Uxpʼejl qʼuin tsiʼ mujcuyob i bʌ yaʼ ti wits tac chaʼan miʼ cʼotelob yaʼ baqui an Josué. Ti wiʼil, jiñi israelob tsaʼ cʼaxiyob yaʼ ti Jordán jaʼ i tsiʼ chajpayob i bʌ chaʼan miʼ chʼʌmob jiñi lum. Jiñʌch Jericó muʼ bʌ caj i ñaxam chʼʌmob. Jehová tiʼ subeyob chaʼan miʼ joyob jiñi tejclum i 6 qʼuin tsiʼ joyoyob, junsujtel ti jujumpʼejl qʼuin. Cheʼ ti 7 qʼuin, wucyajl (7) tsiʼ joyoyob. Tsiʼ wusuyob (cupuyob) i trompeta jiñi motomajob i jiñi soldado bʌ israelob tsiʼ chaʼleyob oñel. I murojlel jiñi tejclum tsaʼ jejmi. Anquese i yotot Rahab yaʼ ticʼʌl ti muro, maʼañic tsaʼ jejmi. Rahab yicʼot i familia tsiʼ tajayob i coltʌntel come tsiʼ yʌcʼʌyob ti ñuc Jehová.