SUJTEN TI WEM BɅ XCɅNTESA | ÑUMEN UBIN A TIJICÑɅYEL TI SUBTʼAN
Laʼ laj coltan jiñi muʼ bʌ la cʌqʼueñob estudio chaʼan miʼ majlelob ti tempa bʌ tac
Jiñi tempa bʌ tac jiñʌch junchajp ñuc bʌ i cʼʌjñibal ti lac chʼujutesaya (Sal. 22:22). Jiñi muʼ bʌ i tempañob i bʌ chaʼan miʼ chʼujutesañob Jehová tijicñayob yicʼot miʼ tajob cabʌl bendición (Sal. 65:4). Jiñi muʼ bʌ i chʼʌmob estudio, mi mucʼʌch i chʌn tempañob i bʌ ora miʼ colelob majlel tiʼ chaʼan bʌ Dios.
¿Bajcheʼ miʼ mejlel a coltan jiñi muʼ bʌ a wʌqʼueñob estudio chaʼan miʼ majlelob ti tempa bʌ? Mach junsujtel jach yom maʼ subeñob. Pʌsben jiñi video ¿Chuqui miʼ mejlel yaʼ ti i Yotlel Tempa bʌ?, i suben chuqui ti wenlel mi caj i taj mi tsaʼ cʼoti (lff cʌntesʌntel 10). Miʼ mejlel a suben am bʌ a cʌñʌ ti jumpʼejl tempa bʌ i cheʼ jaʼel suben chuqui mi caj i yʌjlel ti jiñi yambʌ tempa bʌ. Miʼ mejlel a wʌqʼuen jiñi jun tac muʼ bʌ caj i cʼʌjñel yaʼ ti tempa bʌ tac o pʌsben yaʼ ti JW Library® baqui miʼ yʌl «Reuniones». Cheʼ jaʼel, mi an bajcheʼ miʼ mejlel a coltan, mele, jumpʼejl ejemplo, ñumen pʌyʌ yaʼ tiʼ yotot. Mi cojaxto tsaʼ cʼoti ti tempa bʌ, mi caj i qʼuel ti ñuc cheʼ ti a chaʼle wersa chaʼan maʼ coltan (1Co 14:24, 25).
CHEʼ BɅ TSAʼIX LAʼ QʼUELE JIÑI VIDEO LAʼ LAJ COLTAN JIÑI MUʼ BɅ LA CɅQʼUEÑOB ESTUDIO CHAʼAN MIʼ MAJLELOB TI TEMPA BɅ TAC, JACʼɅ ILI CʼAJTIYA TAC:
¿Bajcheʼ tsiʼ mele Rita chaʼan miʼ mejlel i pʌy majlel Coral ti tempa bʌ?
¿Chucoch wen tijicñayonla cheʼ bʌ jiñi muʼ bʌ la cʌqʼuen estudio miʼ cʼotel ti tempa bʌ?
«Tiʼ sujm Dios añʌch yicʼotetla».
¿Bajcheʼ yubil tsiʼ yubi Coral ti cojaxto bʌ i tempa bʌ?