Ti a tsʼej cʼʌlʌl ti a ñoj: Marcelo, Yomara yicʼot Hiver. Añob i chaʼan jumpʼejl volumen ti braille chaʼan jiñi Traducción del Nuevo Mundo ti español.
Tsaʼ pʌsbentiyob cʼuxbiya
YOMARA, Marcelo yicʼot Hiver i yerañob i bʌ yicʼot xpotsʼob i chumulob ti jumpʼejl tejclum ti Guatemala. Yomara tsaʼ caji ti estudio yicʼot jiñi i testigojob Jehová, i ti wiʼil tsaʼ cajiyob ti estudio jaʼel jiñi i yerañob. Pero an jumpʼejl wocol: Mach yujilobic i pejcʌntel braille. Jin chaʼan, jiñi muʼ bʌ i yʌqʼuen estudio miʼ pejcʌbeñob jiñi párrafo yicʼot jiñi texto tac.
Wocolʌch tsiʼ yubiyob jaʼel chaʼan miʼ majlelob ti tempa bʌ. 40 minuto cʌylem jiñi i Yotlel tempa bʌ ñumen lʌcʼʌl bʌ, i maʼañic miʼ mejlelob ti bajñel ajñel. Jin chaʼan, jiñi hermanojob tsiʼ turnariyob i bʌ chaʼan miʼ pʌyob majlel ti tempa bʌ. I cheʼ bʌ tsaʼix caji i ñusañob i parte tac yaʼ ti tempa bʌ, jiñi hermanojob miʼ coltañob chaʼan miʼ cʌytʌlob tiʼ jol chuqui miʼ yʌlob.
Ti mayo ti 2019, jiñi Testigojob tsaʼ caji i melob jiñi tempa bʌ tac ti jiñi tejclum baqui chumulob, i tsaʼ cʼotiyob ti chumtʌl jumpʼejl xñujpuñel precursor regularoʼ bʌ. Ili xñujpuñel tsiʼ chaʼle wersa chaʼan miʼ pʌsbeñob ili uxtiquilob bajcheʼ miʼ mejlel i pejcañob yicʼot i tsʼijbuñob braille, anquese mach yujilobic bajcheʼ miʼ mejlel. Jin chaʼan, tsaʼ majliyob ti jumpʼejl biblioteca chaʼan miʼ cʌñob braille yicʼot bajcheʼ miʼ mejlel i pʌsbeñob yambʌlob.
Marcelo woliʼ yʌcʼ i comentario ti tempa bʌ.
Ti chaʼpʼej uxpʼejl uw tsiʼ cʌñʌyob i pejcʌntel braille, i jiñi tsiʼ coltayob chaʼan miʼ ñumen chaʼleñob wersa.a Wʌle tiʼ yuxticlelob precursor regularob, i Marcelo siervo ministerial. Miʼ wen aqʼueñob i yorajlel chaʼan miʼ melbeñob i yeʼtel (troñel) Jehová ti jujumpʼejl semana. I jiñi i tijicñʌyelob muʼto i toyob yañoʼ bʌ.
Ili uxtiquilob miʼ wen qʼuelob ti ñuc bajcheʼ tsiʼ coltayob yicʼot tsiʼ pʌsbeyob cʼuxbiya jiñi congregación. Yomara miʼ yʌl: «Jiñi hermanojob an i pʌsbeyon lon i sujm bʌ cʼuxbiya cʼʌlʌl cheʼ bʌ tsiʼ cʌñʌyoñob lon». I Marcelo miʼ yʌl: «An wem bʌ lon camigojob ti congregación i ochemon lojon ti jumpʼejl familia am bʌ tiʼ petol pañimil (mulawil) temeloʼ bʌ come miʼ cʼuxbiñob i bʌ». Yomara yicʼot i yerañob yomobix i qʼuel cheʼ bʌ miʼ sujtel ti jumpʼejl paraíso ili Pañimil (Sal. 37:10, 11; Is. 35:5).
a Jiñi folleto Aprenda a leer braille melbil chaʼan miʼ cʌñob i pejcʌntel yicʼot i tsʼijbuntel braille jiñi xpotsʼob o jiñi maʼañic bʌ miʼ wen cʼotelob i wut.