Mi woli a ñaʼtan ñujpuñel, ¿bajcheʼ miʼ mejlel a taj wem bʌ a piʼʌl?

1, 2. a) Mi juntiquil yom ñujpuñel, ¿chuqui yom bʌ miʼ ñaxan wen ñaʼtan? b) ¿Chuqui jiñi noviazgo? (Qʼuele jiñi nota «Yom bʌ miʼ ñaʼtʌntel»).

¿A WOM ba ñujpuñel? Tiʼ sujm chaʼan tijicñayonla mach cʼʌñʌlic ñujpuñemonla, pero cabʌl hermanojob yomoʼ bʌ ñujpuñel. Jin chaʼan, mi a wom ñujpuñel, yom maʼ ñaʼtan mi lʌcʼʌlʌch añet tiʼ tojlel Jehová, bajcheʼ yilalet yicʼot mi mucʼʌch caj i mejlel a wʌqʼuen chuqui i cʼʌjñibal i chaʼan jiñi a piʼʌl (1 Cor. 7:36).a Cheʼ bajcheʼ jiñi, mi tsaʼ ñujpuñiyet tijicña mi caj laʼ wajñel.

² Wocol chaʼan mi lac taj majqui mi caj i ñujpuñel la quicʼot (Pr. 31:10). I mi tsaʼix a taja a wom bʌ a ñumen cʌn, tajol wocol maʼ wubin chaʼan maʼ pejcan. Jin chaʼan, ti ili estudio mi caj laj qʼuel chuqui mi caj i coltan juntiquil yom bʌ ñujpuñel chaʼan miʼ taj wem bʌ i piʼʌl i miʼ tech jumpʼejl noviazgo.b Cheʼ jaʼel mi caj lac taj ti tʼan muʼ bʌ i mejlel i mel jiñi yambʌ hermanojob chaʼan miʼ coltañob jiñi yomoʼ bʌ ñujpuñel.

¿BAJCHEʼ MIʼ MEJLEL A TAJ JUNTIQUIL WEM BɅ CHAʼAÑET?

3. ¿Chuqui yom bʌ miʼ ñaxan ñaʼtan jiñi woli bʌ i sʌclan majqui mi caj i ñujpuñel yicʼot?

³ Wen ñuc i cʼʌjñibal chaʼan maʼ ñaʼtan bajcheʼ yilal jiñi a wom bʌ a pʌy. Mi maʼañiqui tajol yaʼʌch an jiñi wem bʌ chaʼañet pero maʼañic maʼ taj a qʼuel o tajol mi caj a tech a pejcan jiñi mach bʌ a chaʼañic. Cʼajtesan, junchajp wen ñuc bʌ i cʼʌjñibal jin cheʼ chʼʌmʌlix i chaʼan jaʼ (1 Cor. 7:39). Pero jiñi mach yomic i yʌl chaʼan majqui jach bʌ hermana o hermano wen chaʼañet. Jin chaʼan wen cheʼ muqʼuic a cʼajtiben a bʌ: «¿Baqui tac bʌ c meta? ¿Bajcheʼ yilal i melbal com jiñi muʼ bʌ caj i ñujpuñel quicʼot? ¿Ñumeñix ba ti pʼis woli bʌ c pijtan tiʼ tojlel?».

4. ¿Chuqui an i cʼajtiyob ti oración jiñi yomoʼ bʌ ñujpuñel?

⁴ Tajol tsaʼix a sube Jehová chaʼan a wom ñujpuñel (Filip. 4:6). I sujmʌch, Jehová maʼañic ba i yʌcʼʌ i tʼan chaʼan mi caj i sʌclʌbeñonla la quijñam o lac ñoxiʼal. Pero mucʼʌch i chʼʌm ti ñuc bajcheʼ yubil maʼ wubin a bʌ yicʼot chuqui i cʼʌjñibal a chaʼan, i miʼ mejlel i coltañet a taj. Jin chaʼan, mach a cʌy a suben chuqui jiñi a wom bʌ yicʼot bajcheʼ yubil maʼ wubin a bʌ (Sal. 62:8). Chʌn cʼajtiben chaʼan miʼ yʌqʼueñet a ñaʼtʌbal yicʼot chaʼan maʼ chʌn pʌs a pijt (Sant. 1:5). Juntiquil hermano ti Estados Unidos i cʼabaʼ Johnc miʼ yʌl chuqui tac miʼ cʼajtin ti oración: «Mic suben Jehová bajcheʼ yilal i melbal mic mulan jiñi hermana, i mij cʼajtiben chaʼan mic tajben i yorajlel baqui miʼ mejlel j cʌn juntiquil. Yicʼot chaʼan miʼ coltañon c weñʼesan c melbal chaʼan mic sujtel ti wem bʌ ñoxiʼal baʼ ora». Juntiquil hermana ti Sri Lanka i cʼabaʼ Tanya miʼ yʌl: «Mij cʼajtiben Jehová chaʼan miʼ coltañon chaʼan chʌn xucʼul miʼ cajñel tiʼ tojlel yicʼot chaʼan chʌn tijicñayon cheʼ bʌ woli c sʌclan majqui wem bʌ chaʼañon». ¿Ixcu mi añix ora cajel a sʌclan i maʼañic woli a taj? Jehová miʼ yʌcʼ i tʼan chaʼan mi caj i yʌqʼueñet chuqui i cʼʌjñibal a chaʼan chaʼan chʌn tijicñayet (Sal. 55:22).

5. ¿Chuqui mi caj i coltan jiñi i bajñelobto bʌ chaʼan miʼ cʌñob yambʌ hermanojob muʼ bʌ i cʼuxbiñob Jehová? (1 Corintios 15:58, qʼuele jaʼel jiñi foto tac).

⁵ Jiñi Biblia miʼ subeñonla: «Yom mi laʼ wen chaʼlen eʼtel tiʼ chaʼan bʌ lac Yum tiʼ pejtelel ora» (pejcan 1 Corintios 15:58). Mi mucʼʌch a jacʼ ili ticʼojel mi caj a cʌn cabʌl hermanojob yicʼot mi caj a taj wem bʌ a wamigojob. I cheʼ jaʼel mi caj a cʌn yambʌ hermanojob yicʼot hermanajob i bajñelobto bʌ woli bʌ (choncol bʌ) i chaʼleñob wersa i melbeñob i yeʼtel Jehová. Cheʼ bajcheʼ jiñi mi caj a tijicñesan Jehová, i tijicña mi caj a wubin a bʌ.

6. ¿Chuqui yom bʌ miʼ ñaʼtañob jiñi woli bʌ i sʌclañob majqui miʼ ñujpuñel yicʼot?

⁶ Cheʼ jaʼel, cʼajtesan chaʼan jiñi ñumen ñuc bʌ i cʼʌjñibal mach jiñic cheʼ maʼ taj majqui mi caj i ñujpuñel a wicʼot, jiñʌch i melol i yeʼtel (troñel) Jehová (Filip. 1:10). Jiñi muʼ bʌ i yʌqʼueñonla lac tijicñʌyel jiñʌch cheʼ i yamigojonla Dios, mach jiñic mi ñujpuñemoñixla o lac bajñelto (Mat. 5:3). Cheʼ bʌ a bajñelto muʼto i mejlel a ñumen melben i yeʼtel Jehová (1 Cor. 7:32, 33). Jessica, chʼoyol bʌ ti Estados Unidos, tsaʼ ñujpuñi cheʼ bʌ lʌcʼʌ 40 i jabilel i miʼ yʌl: «Tsaʼ bʌ i coltayon chaʼan chʌn tijicñayon cheʼ bʌ wolito c sʌclan majqui miʼ ñujpuñel quicʼot jiñʌch cheʼ tsaʼ c chaʼle wersa subtʼan».

AQʼUEN I YORAJLEL CHAʼAN MAʼ WEN CɅN

7. Cheʼ bʌ an majqui woli a mulan, ¿chucoch weñʌch cheʼ maʼ ñaxan wen qʼuel bajcheʼ yilal? (Proverbios 13:16).

⁷ ¿Ixcu mi tsaʼix a taja juntiquil muʼ bʌ a mulan chaʼan miʼ sujtel ti a ñoxiʼal o ti a wijñam? ¿Ti ora ba yom maʼ tech a pejcan? Jiñi Biblia miʼ yʌl chaʼan jiñi cʌntesʌbiloʼ bʌ miʼ wʌn ñaʼtañob chuqui mi caj i melob (pejcan Proverbios 13:16). Ili yom i yʌl chaʼan ñumen wen cheʼ ñaxan maʼ wen qʼuel bajcheʼ yilal i melbal (chaʼlibal). Juntiquil hermano ti Países Bajos i cʼabaʼ Albert miʼ yʌl: «Miʼ mejlel ti waʼ qʼuextʌyel bajcheʼ yubil mi la cubin tiʼ tojlel, jin chaʼan ñumen wen cheʼ maʼ wʌqʼuen i yorajlel chaʼan maʼ wen qʼuel bajcheʼ yilal i mach ti orajic maʼ suben chaʼan a wom a cʌn». Cheʼ jaʼel cheʼ bʌ maʼ wʌqʼuen i yorajlel chaʼan maʼ qʼuel bajcheʼ yilal, tajol miʼ cʼotel a ñaʼtan chaʼan mach a chaʼañic.

8. ¿Chuqui miʼ mejlel i mel jiñi i bajñelto bʌ chaʼan miʼ taj i qʼuel bajcheʼ yilal jiñi woli bʌ i mulan? (Qʼuele jaʼel jiñi foto tac).

⁸ Tajol maʼ cʼajtiben a bʌ: «¿I bajcheʼ miʼ mejlel j qʼuel bajcheʼ yilal i melbal?». Yaʼʌch ti tempa bʌ o cheʼ bʌ mi laʼ tempan laʼ bʌ laʼ wicʼot yambʌ hermanojob, yaʼi mi caj a qʼuel bajcheʼ yilal yicʼot mi lʌcʼʌlʌch an tiʼ tojlel Dios. ¿Majqui jiñi i yamigojob? ¿Chuqui tac miʼ taj ti tʼan? (Luc. 6:45). ¿Cheʼ ba i meta bajcheʼ a chaʼan? Tajol miʼ mejlel a cʼajtiben jiñi ancianojob o yambʌ hermanojob wen i cʌñʌyoʼ bʌ bajcheʼ yilal (Pr. 20:18). Miʼ mejlel a cʼajtibeñob bajcheʼ yilal i melbal o chuqui miʼ yʌjlel tiʼ tojlel (Rt. 2:11). Pero yom maʼ cʌntan a bʌ chaʼan cheʼ bʌ woli (yʌquel) a qʼuel jiñi hermano o jiñi hermana maʼañic maʼ wʌqʼuen i yubin chaʼan woli jach i joybintel o chaʼan a wom a luʼ taj a qʼuel pejtelel muʼ bʌ i mel.

9. ¿Chuqui yomʌch bʌ maʼ ñaʼtan cheʼ bʌ muʼto caj a pejcan jiñi muʼ bʌ a mulan?

⁹ Cheʼ jiñi, ¿jal ba yom maʼ pijtan chaʼan maʼ pejcan jiñi woli bʌ a mulan? Mi orajach maʼ waʼ suben tajol miʼ mejlel i ñaʼtan chaʼan waʼ a womix ñujpuñel (Pr. 29:20). Pero mi maʼ cʌlʌx jalʼan miʼ mejlel i ñaʼtan chaʼan mach segurojetic (Ec. 11:4). Cʼajtesan chaʼan mach yomic i yʌl chaʼan jiñi muʼ bʌ caj a tech a pejcan jiñʌch muʼ bʌ caj i ñujpuñel a wicʼot. Yomʌch bʌ maʼ ñaʼtan jin mi chajpʌbiletʌch chaʼan jiñi ñujpuñel yicʼot chaʼan tajol jiñʌch muʼ bʌ i mejlel ti sujtel ti a ñoxiʼal o ti a wijñam.

10. ¿Chuqui yom maʼ mel mi tsaʼ qʼuele chaʼan an majqui miʼ mulañet?

¹⁰ ¿Ixcu miʼ tsaʼ qʼuele chaʼan an majqui woliʼ mulañet? ¿Chuqui yom maʼ mel? Mi maʼañic woli a mulan, yom jamʌ tsiquil maʼ pʌsben chaʼan maʼañic chuqui a wom. Mach utsʼatic cheʼ muqʼuic a toʼol aqʼuen i ñaʼtan chaʼan wolʌch a mulan jaʼel (1 Cor. 10:24; Efes. 4:25).

11. Mi an baqui miʼ mejlel cheʼ bajcheʼ miʼ yʌjlel yaʼ ti párrafo, ¿chuqui yom miʼ chʼʌjmel ti ñuc?

¹¹ An baqui jiñʌch jiñi tatʌlob o yambʌyob tiʼ familia muʼ bʌ i sʌclañob majqui mi caj i ñujpuñel yicʼot jiñi chʼiton o xchʼoc. I an yambʌ baqui jiñʌch jiñi i familia o yambʌ i yamigojob muʼ bʌ i sʌclʌbeñob i piʼʌl, i ti wiʼil miʼ chajpañob chaʼan miʼ cʌñob i bʌ i cheʼ bajcheʼ jiñi miʼ qʼuelob mi mucʼʌch caj i ñujpuñelob. Mi tsaʼ subentiyonla chaʼan mi lac mel iliyi, laʼ lac chʼʌm ti ñuc chuqui yomob yicʼot chuqui miʼ mulañob tiʼ chaʼticlelob. Mi tsaʼix lac taja mi laj qʼuel, laʼ lac chaʼlen wersa laj cʌn bajcheʼ yilal i melbal tac yicʼot mi lʌcʼʌlʌch an tiʼ tojlel Jehová. Jiñi ñumen ñuc bʌ i cʼʌjñibal jiñʌch cheʼ wem bʌ i yamigo Jehová, mach jiñic mi an i taqʼuin, mi tsiʼ wen chaʼle clase o mi wen cʌmbil. Mach lac ñajʌtesan jaʼel chaʼan ti wiʼil jiñʌch mi caj i ñaʼtañob mi mucʼʌch caj i ñujpuñelob o maʼañic (Gál. 6:5).

¿BAJCHEʼ MIʼ MEJLEL A SUBEN CHAʼAN A WOM A ÑUMEN CɅN?

12. Mi an majqui a wom a ñumen cʌn, ¿chuqui miʼ mejlel a suben?

¹² ¿Ixcu mi an majqui a wom a tech a ñumen cʌn? ¿Bajcheʼ miʼ mejlel a mel? Tajol miʼ mejlel a suben chaʼan an baqui mi laʼ qʼuel laʼ bʌ, o tajol miʼ mejlel a pejcan ti teléfono o ti videollamada.d Jamʌ suben chaʼan woli a mulan i chaʼan a wom a ñumen cʌn (1 Cor. 14:9). Mi tiʼ subeyet chaʼan yomto i ñaʼtan, pijtanto (Pr. 15:28). I mi tiʼ subeyet chaʼan maʼañic, qʼuele ti ñuc bajcheʼ miʼ yubin i bʌ i mach a wersa xiqʼueʼ.

13. ¿Chuqui yom maʼ mel mi an majqui tiʼ subeyet chaʼan miʼ mulañet? (Colosenses 4:6).

¹³ ¿Ixcu mi an majqui miʼ subeñet chaʼan miʼ mulañet? Yomʌch maʼ qʼuel ti ñuc, come tsaʼʌch i pʌsʌ i chʼejlel chaʼan miʼ pejcañet (pejcan Colosenses 4:6). Pero mi a womto a wen ñaʼtan maʼ wubin, suben. Pero mach cʌlʌx jalʼaquet (Pr. 13:12). I mi maʼañic chuqui a wom jamʌ suben, pero ti wen jach bʌ tʼan. Jiñʌch tsaʼ bʌ ujti tiʼ tojlel juntiquil hermano ti Austria i cʼabaʼ Hans. Cheʼ bʌ juntiquil hermana tiʼ sube chaʼan yom i ñumen cʌn, miʼ yʌl chuqui tsiʼ mele: «Ti wen jach bʌ tʼan tsaʼ c sube chaʼan maʼañic chuqui woli c ñaʼtan tiʼ tojlel jiñi hermana. I orajach tsaʼ c mele chaʼan maʼañic miʼ cʌqʼuen i ñaʼtan chaʼan tajol mucʼʌch caj c jacʼ ti wiʼil. Cʼʌlʌl ti jimbʌ ora tsajalon jach bajcheʼ yilalon tiʼ tojlel jiñi hermana». Pero mi a womʌch a ñumen cʌn jaʼel suben chuqui maʼ wubin tiʼ tojlel i comol alʌla chuqui mi caj laʼ mel cheʼ bʌ mi laʼ tech laʼ cʌn laʼ bʌ. Yomʌch mi laʼ wʌl iliyi come tajol mach junlajalic bajcheʼ mi laʼ ñaʼtan tiʼ caj jiñi laʼ cultura, bajcheʼ tsaʼ coliyetla o yan tac bʌ.

¿BAJCHEʼ MIʼ MEJLEL LAJ COLTAN JIÑI I BAJÑELOBTO BɅ?

14. ¿Chuqui yom mi lac mel chaʼan mi laj coltan jiñi i bajñelobto bʌ?

¹⁴ ¿Chuqui miʼ mejlel lac mel chaʼan mi laj coltan jiñi i bajñelobto bʌ yomoʼ bʌ ñujpuñel? Yom tsajilonla bajcheʼ mi lac chaʼlen tʼan (Efes. 4:29). Laʼ laj cʼajtiben lac bʌ: «¿Muʼ ba cʌl chuqui tseʼentic tiʼ tojlelob? Cheʼ bʌ mij qʼuel chaʼan juntiquil hermano woliʼ pejcan juntiquil hermana, ¿ti ora ba mic waʼ ñaʼtan chaʼan i noviojobix i bʌ?» (1 Tim. 5:13). Cheʼ jaʼel, mach la comic la cʌqʼuen i ñaʼtan juntiquil hermano chaʼan mach ñuquic i cʼʌjñibal tiʼ caj maxto ñujpuñemic. Hans, tsaʼ bʌ la cʌlʌ ti yambʌ párrafo, miʼ yʌl: «An hermanojob muʼ bʌ i yʌlob: ‹¿Chucoch maxto ñujpuñemetic? Wolix a ñoxʼan, qʼuele yañoʼ bʌ tsaʼix ñujpuñiyob i jatet wolix a cʌytʌl›. Cheʼ tac bʌ tʼan bajcheʼ ili cojach miʼ yʌqʼueñob i yubin chaʼan woliʼ xijqʼuelob chaʼan miʼ ñujpuñelob i chaʼan maʼañic miʼ qʼuejlelob ti ñuc». Ñumen wen cheʼ bʌ mi lac subeñob tʼan tac muʼ bʌ i ñuqʼuesʌbeñob i pusicʼal (1 Tes. 5:11).

15. a) Cheʼ bajcheʼ miʼ yʌl Romanos 15:2, ¿chuqui yom mi lac chʼʌm ti ñuc mi la com laj coltan yom bʌ i taj i novio o i novia? (Qʼuele jaʼel jiñi foto). b) ¿Chuqui tsaʼ mulaj ti jiñi video? (Qʼuele jiñi nota).

¹⁵ ¿Ixcu mi tsaʼ laj qʼuele chaʼan juntiquil hermano yicʼot hermana wen miʼ tajob i bʌ? ¿Chuqui yom mi lac mel? Jiñi Biblia miʼ pʌsbeñonla chaʼan yom mi lac chʼʌm ti ñuc bajcheʼ miʼ yubiñob i bʌ (pejcan Romanos 15:2). Cabʌlob maʼañic bʌ miʼ mulañob chaʼan miʼ coltʌntelob chaʼan miʼ sʌclañob i novio o i novia, i mach yomic mi la cotsan lac bʌ (2 Tes. 3:11). I an yambʌ yomobʌch coltʌntel, pero cojach mi caj lac mel mi tsaʼix i subeyoñobla (Pr. 3:27).e Yambʌlob yomobʌch coltʌntel, pero maʼañic miʼ pijtañob chaʼan joñonla mi lac luʼ chajpan. Lydia, chʼoyol bʌ ti Alemania, miʼ yʌl: «Miʼ mejlel a mel jumpʼejl reunión social i maʼ pʌy jiñi hermano yicʼot jiñi hermana. Cheʼ bʌ yaʼix añobi muqʼuix a cʌy chaʼan jiñix miʼ bajñel cʌñob i bʌ».

16. ¿Chuqui yom bʌ cʼajalob i chaʼan jiñi bajñelobto bʌ?

¹⁶ Ti lac pejtelel tijicña mi lac mejlel ti ajñel, mach yʌlʌyic mi ñujpuñemonla o lac bajñelto (Sal. 128:1). Pero mi a womʌch ñujpuñel i maxto añic a taja, chʌn melben i yeʼtel Jehová. Juntiquil hermana ti Macao i cʼabaʼ Sin Yi miʼ yʌl: «Ñusan a bʌ cheʼ bʌ a bajñelto, cheʼ bʌ maʼ ñujpuñel i yaʼix añet ti Paraíso tiʼ pejtelelix ora mi caj a wajñel a wicʼot a ñoxiʼal o a wijñam». Pero ¿ixcu mi añix majqui woli a pejcan? Ti jiñi yambʌ estudio mi caj laj qʼuel chuqui miʼ mejlel a mel chaʼan wen miʼ loqʼuel.