Cʌntesʌntel 15

Jini i yijñam Lot tsiʼ qʼuele i pat

LOT yicʼot i familia tsaʼ tem chumleyob yicʼot Abraham yaʼ ti i lumal Canaán. An jumpʼejl bʌ qʼuin Abraham tsiʼ sube Lot: ‹Wʌʼ ilayi mach jasʌlic jumpejt lum chaʼan ti pejtelel jini la cʌlacʼ tac. Mi caj lac tʼox lac bʌ, a wocolic. Mi jatet tsaʼ majliyet ti junwejl, joñon mic majlel ti yambʌ junwejl›.

Lot tsiʼ qʼuele jini lum. Tsiʼ qʼuele jumpʼejl parte wem bʌ jini lum baʼan jaʼ yicʼot wen yʌx bʌ jamil chaʼan i yʌlacʼ tac. Jiñʌch Jumpejt bʌ lum Jordán. Jini chaʼan, Lot tsiʼ pʌyʌ majlel i familia yicʼot i yʌlacʼ tac. Cheʼ jini tsiʼ meleyob i yotot yaʼ ti tejclum i cʼabaʼ Sodoma.

Jini winicob xʼixicob yaʼ ti Sodoma wen jontolob. Iliyi mach utsʼatic tsiʼ qʼuele Lot, come miʼ mel chuqui wen. Cheʼ jaʼel mach utsʼatic tsiʼ qʼuele Dios. Jini chaʼan, Dios tsiʼ choco majlel chaʼtiquil i yángel chaʼan mi suben Lot mi caj i jisan Sodoma yicʼot jini tejclum lʌcʼʌl bʌ an yicʼot i cʼabaʼ Gomorra come wen jontolob.

Jini ángelob tsiʼ subeyob jini Lot: ‹¡Seʼsebet mecu! ¡Pʌyʌ loqʼuel a wijñam yicʼot jini chaʼtiquil xchʼoc bʌ a walobilob i loqʼuen majlel wʌʼi!› Lot yicʼot i familia tsaʼ to jalʼayob, jini chaʼan jini ángelob tsiʼ chucbeyob i cʼʌb i tsiʼ pʌyʌyob loqʼuel yaʼ ti tejclum. Cheʼ jini junticlelob jini ángel tsiʼ yʌlʌ: ‹¡Putsʼenla chaʼan cuxul mi laʼ wajñel! Mach laʼ qʼuel laʼ pat. Putsʼenla majlel yaʼ ti wits, chaʼan maʼanic mi laʼ chʌmel›.

Lot yicʼot jini chaʼtiquil xchʼoc bʌ i yalobil tsiʼ jacʼʌyob i tsaʼ putsʼiyob loqʼuel yaʼ ti Sodoma. Maʼanic tsaʼ waʼleyob, yicʼot maʼanic tsiʼ qʼueleyob i pat. Pero i yijñam Lot maʼanic tsiʼ jacʼʌ. Cheʼ ñajtix tsiʼ cʌyʌyob Sodoma, tsaʼ waʼle i tsiʼ qʼuele i pat. Cheʼ jini i yijñam Lot tsaʼ sujti ti atsʼam bʌ xajlel. ¿Muʼ ba a taj a qʼuel ila ti dibujo?

Ilayi mi lac taj wem bʌ cʌntesʌntel: chaʼan Dios miʼ coltan jini muʼ bʌ i jacʼbeñob i tʼan, pero jini mach bʌ anic mi jacʼbeñob i tʼan miʼ sʌtob i cuxtʌlel.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8