Cʼajtesan i yijñam Lot

Lot i yichañʌch Abraham i tsaʼ laja chumleyob yaʼ ti Canaán. Tsaʼ wen pʼojliyob i yʌlacʼ i maʼañix baqui tsaʼ mejli i yʌcʼob. Jin chaʼan Abraham tsiʼ sube Lot: «Mach jasʌlix jumpejt lum chaʼan tiʼ pejtelel la cʌlacʼ. A wocolic, yajcan baqui a wom majlel. Mi tsaʼ majliyet ti junwejl, joñon mi caj c majlel ti yambʌ junwejl». Tiʼ sujm, wen uts i pusicʼal Abraham.

Lot tsiʼ qʼuele jumpʼejl wem bʌ lum am bʌ i chaʼan jaʼ yicʼot wen yʌx bʌ jam. Jin chaʼan tsaʼ majli ti chumtʌl yaʼi yicʼot i familia, ili yaʼʌch tiʼ tʼejl Sodoma.

Wen jontolob (simaroñob) yaʼ ti Sodoma yicʼot Gomorra. Jin chaʼan Jehová tsiʼ jisa ili chaʼpʼejl tejclum. Pero tsiʼ mulaj i coltan Lot yicʼot i familia, jin chaʼan tsiʼ choco majlel chaʼtiquil ángelob chaʼan miʼ subeñob: «¡Orajetla! ¡Loqʼuenla majlel! ¡Jehová mi caj i jisan ili tejclum!».

Pero mach ti orajic tsaʼ loqʼuiyob majlel. Jin chaʼan, jiñi ángelob tsiʼ tujcʼayob loqʼuel ti cʼʌb jiñi Lot, i yijñam yicʼot tiʼ chaʼticlel i yalobilob. Tiʼ subeyob: «¡Chaʼlenla ajñel! ¡Putsʼenla chaʼan maʼañic mi laʼ chʌmel, i mach laʼ qʼuel laʼ pat! Mi tsaʼ qʼuele laʼ pat, mi caj laʼ chʌmel».

Cheʼ bʌ tsaʼ cʼotiyob yaʼ ti tejclum Zóar, Jehová tsiʼ choco jubel cʼajc yicʼot azufre yaʼ ti Sodoma yicʼot Gomorra. Tsaʼ junyajlel jili tiʼ chaʼpʼejlel jiñi tejclum. I yijñam Lot tsiʼ ñusʌbe i tʼan Jehová, tsiʼ qʼuele i pat i tsaʼ sujti ti atsʼam. Pero Lot yicʼot tiʼ chaʼticlel i yalobilob maʼañic tsaʼ chʌmiyob come tsaʼʌch i jacʼʌyob tʼan. Chʼijiyem tsaʼ yubiyob come i yijñam Lot tsiʼ ñusa tʼan, pero tsiʼ tajayob i ñʌchʼtʌlel come tsaʼʌch i jacʼbeyob i tʼan Jehová.