Dios tsiʼ mele jumpʼejl trato yicʼot Abraham

AÑIX ñumen lujumpʼejl i yuxcʼal (350) jab cheʼ tsaʼ ñumi jini Butʼjaʼ. Abraham tsaʼ chumle ti Ur, jini tejclum wen cabʌl bʌ i chubʌʼan yaʼ bʌ an wʌle ti Irak. Tsiʼ wen ñopo Dios, pero chaʼan ñopol i chaʼan Dios tsaʼ ilʌbenti i pusicʼal. Laʼ laj qʼuel chuqui tsaʼ ujti.

Jehová tsiʼ sube chaʼan miʼ cʌy i lumal, chaʼan mi majlel ti chumtʌl ti ñajtʌl ti yambʌ parte i cʼabaʼ: Canaán. Abraham ti ora tsiʼ jacʼʌ. Tsaʼ tejchi majlel yicʼot i yijñam, Sara, yicʼot i chaʼañoʼ bʌ yicʼot yalobil i yeran i cʼabaʼ Lot. Cheʼ yaʼix an ti Canaán, baʼ jach tsaʼ chumle ti pisil bʌ otot. Jehová tsiʼ mele jumpʼejl trato yicʼot Abraham: tsiʼ sube chaʼan tiʼ tojlel mi caj i tajob bendición tac winicob xʼixicob ti pañimil, chaʼan ñuc miʼ cajel i pʼolbal yicʼot chaʼan jini lum ti Canaán i chaʼañʌch mi caj i sujtelob.

Abraham yicʼot Lot tsaʼ wen pʼojliyob i ñaʼ wacax yicʼot i tʌñʌmeʼ. Abraham tsiʼ pʌsʌ i pʼewlel cheʼ tsaʼ yʌqʼue Lot i yajcan jini lum chaʼan i wacax. Tsiʼ yajca jini lum am bʌ tiʼ tiʼ Jordán jaʼ, jini ñumen wem bʌ, i tsaʼ ajni lʌcʼʌl yaʼ ti Sodoma. Pero jini xchumtʌlob yaʼ ti tejclum wen biboʼ jax i melbal tiʼ tsʼiʼlelob yicʼot mach utsʼatic tsiʼ yubi Jehová.

Cheʼ bʌ tsiʼ tʼoxoyob i bʌ Abraham yicʼot Lot, Jehová tsiʼ sube Abraham chaʼan mi caj yʌqʼuen i pʼolbal cheʼ bajcheʼ ecʼ ti panchan. Abraham tsiʼ ñopo Jehová, pero jini cʼuxbibil bʌ i yijñam Sara maʼanic mi mejlel i yʌcʼ ti pañimil i yalobil. Cheʼ anix 99 i jabilel Abraham jini Sara lʌcʼʌl 90 jix i jabilel, Dios tsiʼ sube Abraham yicʼot Sara chaʼan mi caj yilan pañimil juntiquil i yalobilob. Cheʼʌch tsaʼ ujti: tsiʼ yʌcʼʌ ti pañimil juntiquil alʌl tsaʼ bʌ i yotsabeyob i cʼabaʼ ti Isaac. Anquese Abraham tsaʼ tili yambʌ i yalobilob, jini Xcoltaya tsaʼ bʌ ajli yaʼ ti Edén mi caj i tilel tiʼ pʼolbal Isaac.

Lot tsaʼ chʌn chumle yaʼ ti Sodoma yicʼot i chaʼañoʼ bʌ. Pero maʼanic tsiʼ tsajcʌbeyob i melbal jini winicob xʼixicob añoʼ bʌ ti tsʼiʼlel, come jiñʌch wem bʌ winic. Jini chaʼan, cheʼ baʼ ora Jehová tsiʼ ñaʼta i jisan jini Sodoma, ñaxan tsiʼ choco majlel i yángelob chaʼan miʼ suben jini Lot. Tsiʼ subeyob chaʼan miʼ loqʼuelob ti putsʼel yicʼot jini i chaʼañoʼ bʌ yicʼot chaʼan maʼanic miʼ qʼuelob i pat. Cheʼ jini Dios tsiʼ choco tilel cʼajc ti panchan yicʼot azufre, chaʼan miʼ laj jisan jini xjontolilob yaʼ ti Sodoma cheʼ bajcheʼ yaʼ ti Gomorra. Lot yicʼot chaʼtiquil bʌ i yixicʼal maʼanic tsaʼ chʌmiyob. Pero jini i yijñam tsiʼ qʼuele i pat, tajol tsiʼ cʼajtesa i chubʌʼan tsaʼ bʌ i cʌyʌ. Chaʼan tiʼ caj i ñusa tʼan tsiʼ sʌtʌ i cuxtʌlel.

(Loqʼuem ti Génesis 11:10–19:38.)