Cʌntesʌntel 34
Jumpʼejl tsijiʼ bʌ bʌlñʌcʼʌl
¿AWUJIL ba chuqui woli i lotob ti lum jini winicob xʼixicob? Cheʼ yilal bajcheʼ yeʼeb. Sʌsʌc, mach pimic, yicʼot cheʼ bajcheʼ alʌ yopoteʼ. Pero mach yeʼebic; jiñʌch muʼ bʌ i mejlel ti cʼuxtʌl.
Tsaʼ jax to ñumi cheʼ bʌ jumpʼejl uw cʼʌlʌl cheʼ bʌ tsaʼ loqʼuiyob majlel jini israelob yaʼ ti Egipto. Yaʼañob ti i tiquiñal lum. Yaʼi maʼanic miʼ wen colel cʼuxbil tac bʌ, yicʼot tsaʼ cajiyob ti wulwul tʼan: ‹Ñumen wen tsaʼic i tsʌnsayonla Jioba yaʼ ti Egipto. Yaʼi mi laj cʼux cheʼ bajcheʼ cʼamel la com›.
Jini chaʼan, Jioba tsiʼ yʌlʌ: ‹Mi caj c chocbeñetla tilel bʌlñʌcʼʌl ti panchan›. Cheʼʌch tsiʼ mele. Ti yijcʼʌlal cheʼ ti sʌcʼan, cheʼ bʌ tsiʼ qʼueleyob jini israelob jini sʌsʌc bʌ tsaʼ yajli ti lum, tsiʼ cʼajtibeyob i bʌ: ‹¿Chuqui jini?›.
Moisés tsiʼ yʌlʌ: ‹Jiñʌch i bʌl laʼ ñʌcʼ tsaʼ bʌ i yʌqʼueyetla Jioba chaʼan mi laʼ cʼux›. Jini winicob xʼixicob tsiʼ subeyob ti MANÁ. Jini maná cheʼ yubil i sumuclel bajcheʼ jini caxlan waj wen jay bʌ melbil yicʼot i yaʼlel chab.
‹Tempanla cheʼ bajcheʼ cʼamel mi caj laʼ cʼux ti jujuntiquil›, cheʼ tsiʼ sube Moisés jini winicob xʼixicob. Jini chaʼan, ti jujumpʼejl sʌcʼan tsiʼ meleyob bajcheʼ jini. Cheʼ jini, cheʼ miʼ ticwan Qʼuin, jini maná muʼ bʌ i cʌytʌl ti lum miʼ yulmʌl.
Yicʼot jaʼel Moisés tsiʼ yʌlʌ: ‹Mach yomic mi laʼ lot jini maná chaʼan ti yijcʼʌlal›. Pero an lamitalob tsaʼ bʌ i lotoyob. ¿Awujil ba chuqui mi yujtel cheʼ jini? ¡Ti yijcʼʌlal jini maná tsaʼ bʌ i lotoyob miʼ pʼojlel i motsoʼlel yicʼot miʼ caj ti tuwʼan!
Pero Jioba tsiʼ yʌlʌ chaʼan an jumpʼejl bʌ qʼuin ti jumpʼejl semana miʼ tempañob ti chaʼyajl jini maná. Jiñʌch tiʼ wʌcpʼejlel qʼuin. Jioba tsiʼ yʌlʌ chaʼan miʼ tʼox lotob chaʼan ti yijcʼʌlal, come maʼanic mi caj i yʌcʼ ti yajlel cheʼ tiʼ wucpʼejlel qʼuin. ¡Cheʼ bʌ miʼ lotob jini maná cʼʌlʌl tiʼ wucpʼejlel qʼuin, maʼanic mi yochel i motsoʼlel yicʼot maʼanic miʼ tuwʼan! ¡Jiñʌch yambʌ milagro!
Ti pejtelel jini jabil tsaʼ bʌ i ñusayob jini israelob yaʼ ti i tiquiñal lum, tsiʼ cʼuxuyob maná.
Éxodo 16:1-36; Números 11:7-9; Josué 5:10-12.