Cʌntesʌntel 116
Yom bʌ mi lac mel chaʼan mi lac chumtʌl ti pejtelel ora
¿AWUJIL ba chuqui woliʼ pejcan ili alʌ xchʼoc yicʼot i yamigojob? Jiñʌch jini libro woli bʌ a pejcan jaʼel... C libro muʼ bʌ yʌl cʌntesʌntel am bʌ ti Biblia. Jiñʌch bʌ cʌntesʌntel woliʼ pejcañob jaʼel... «Yom bʌ mi lac mel chaʼan mi lac chumtʌl tiʼ pejtelel ora».
¿Awujil ba chuqui woliʼ cʌñob? Ñaxam bʌ, jiñʌch chaʼan yom bʌ mi laj cʌn chaʼan Jioba yicʼot i Yalobil i cʼabaʼ Jesús, chaʼan mi lac chumtʌl tiʼ pejtelel ora. Jini Biblia mi yʌl: ‹Iliyi jiñʌch jini bij muʼ bʌ i pʌyonla majlel ti laj cuxtʌlel mach bʌ anic miʼ jilel. Cʌñʌ jini cojach bʌ i sujmlel Dios yicʼot i Yalobil i cʼabaʼ Jesucristo›.
¿Bajcheʼ miʼ mejlel laj cʌn chaʼan Jioba Dios yicʼot i Yalobil? Junchajp jiñʌch cheʼ mi lac pejcan C libro muʼ bʌ yʌl cʌntesʌntel am bʌ ti Biblia tiʼ tejchibal cʼʌlʌl tiʼ yujtibal. Jini libro mi yʌl cabʌl chaʼan bʌ Jioba yicʼot Jesús, ¿ñomach? Yicʼot mi yʌl chuqui am bʌ i melbalob yicʼot chuqui muʼ to bʌ caj i melob. Pero yom mi lac pejcan yambʌ libro.
¿Muʼ baʼ taj a qʼuel jini yambʌ libro yaʼ bʌ an ti lum? Jiñʌch jini Biblia. Cʼajtin chaʼan miʼ pejcʌbeñetob jini texto tac baqui chucbil jini cʌntesʌntel tac am bʌ ila ti libro. Jini Biblia miʼ cʌntesañonla yom bʌ mi lac mel chaʼan mi lac melben i yeʼtel Jioba ti wen yicʼot chaʼan mi lac taj laj cuxtʌlel mach bʌ anic miʼ jilel. Jin chaʼan, yom mi lac wen ñʌmʼan lac pejcan jini Biblia.
Pero mach jasʌl jach mi laj cʌn chaʼan Jioba Dios yicʼot Jesucristo. Tajol anix cabʌl chuqui la cujil tiʼ tojlelob yicʼot tiʼ cʌntesajob, pero mach jasʌl jach chaʼan mi lac taj laj cuxtʌlel mach bʌ anic miʼ jilel. ¿Awujil ba chuqui yambʌ yom mi lac mel?
Yicʼot jaʼel yom mi lac chumtan cheʼ bajcheʼ cʌmbil lac chaʼan yaʼ ti Biblia. ¿Cʼajal baʼ chaʼan jini Judas Iscariote? Jiñʌch i lajchʌnticlel apóstol tsaʼ bʌ i yajca Jesús. Judas tsiʼ taja cabʌl i ñaʼtʌbal ti Jioba yicʼot ti Jesús. Pero, ¿chuqui tsiʼ chaʼle? Tiʼ wiʼil tsaʼ caji i bajñel cʼojoʼtan chuqui yom yicʼot tsiʼ choño Jesús ti lujumpʼejl i chaʼcʼal plata. Judas maʼanic mi caj i taj i cuxtʌlel mach bʌ anic miʼ jilel.
¿Cʼajal baʼ chaʼan majqui jini Giezi, tsaʼ bʌ laj cʌñʌ yaʼ ti Cʌntesʌntel 69? Tsiʼ mulaj bujcʌl tac yicʼot taqʼuin mach bʌ i chaʼanic. Tsiʼ chaʼle lot chaʼan miʼ chʼʌm jini, Jioba tsiʼ yʌqʼue i toj jini tsaʼ bʌ i mele. Mi caj yʌqʼueñonla lac toj lac mul jaʼel mi maʼanic mi lac jacʼben i mandar.
Pero an cabʌl winicob xʼixicob tsaʼ bʌ i melbeyob i yeʼtel Jioba tiʼ xucʼtʌlel. Cheʼ com lac mel jaʼel, ¿ñomach? Jini chʼiton Samuel jiñʌch yom bʌ mi lac lajin tsaʼ bʌ i mele. Yom cʼajal a chaʼan bajcheʼ tsiʼ laj cʌñʌ yaʼ ti Cʌntesʌntel 55, cheʼ bʌ ora jini, Samuel an jaxto i chaʼan chʌmpʼejl o joʼpʼejl jab cheʼ bʌ tsaʼ caji i melben i yeʼtel Jioba yaʼ ti tabernáculo. Jin chaʼan, anquese woli jaxto a colel majlel, mach yomic maʼ wʌl chaʼan maxto cabʌlic a jabilel chaʼan maʼ melben i yeʼtel Dios.
Laj cujil chaʼan com lac lajin Jesucristo. Cʼʌlʌl cheʼ bʌ alʌ chʼiton jax to, bajcheʼ tsaʼ laj cʌñʌ yaʼ ti Cʌntesʌntel 87, yaʼan ti templo, woli ti cʌntesa chaʼan jini i Tat am bʌ ti panchan. Yom mi lac lajin. Yom mi lac suben jiñʌch jaytiquil winicob xʼixicob chaʼan jini lac Dios am bʌ i ñuclel, Jioba yicʼot i Yalobil i cʼabaʼ Jesucristo. Cheʼ mucʼʌch lac mel tiʼ pejtelel iliyi, mi caj lac mejlel ti chumtʌl ti pejtelel ora ti ili Pañimil, cheʼ baqui ora Dios mi caj i sujten ti tsijiʼ bʌ paraíso.
Juan 17:3; Salmo 145:1-21.