Cʌntesʌntel 64
Salomón tsiʼ waʼchoco jini templo
CHEʼ cuxul to David tsiʼ sube Salomón i ñaʼtʌbal Dios chaʼan bajcheʼ yom miʼ melben i templo Jioba. Cheʼ anix chʌmpʼejl jab i cajel ti yumʌntel Salomón, tsaʼ caji i tech i waʼchocon jini templo, tsaʼ ujti i mel ti wucpʼejl jab yicʼot ojlil. Bajcʼʌl winicob tsaʼ caji i melob jini letsem bʌ i tojol otot, come tsaʼ cʼʌjñi cabʌl oro yicʼot plata.
An chaʼpʼejl colem tsalʌl tiʼ malil jini templo, bajcheʼ am bʌ yaʼ ti tabernáculo. Pero ñumen colem to jini tsalʌl bajcheʼ am bʌ yaʼ ti tabernáculo. Jini arca chaʼan bʌ trato yaʼ tsiʼ yʌcʼʌ Salomón tiʼ malil jini tsalʌl mach bʌ ñoj colemic, jini yambʌ tac yaʼ bʌ an ti tabernáculo, tsaʼ ajqʼui yaʼ ti colem bʌ tsalʌl.
Cheʼ tsaʼix ujti i melob jini templo, tsiʼ meleyob ñuc bʌ qʼuiñijel. Salomón tsiʼ ñocchoco i bʌ tiʼ tojel jini templo, tsaʼ caji ti oración, cheʼ bajcheʼ maʼ qʼuel yaʼ ti dibujo. ‹Come mach ñuquic panchan ti a tojlel›, cheʼ tsiʼ sube Salomón Jioba, ‹cheʼ jini, ¿bajcheʼ mi mejlel a wochel ti ili templo? Pero c Yum Dios, a wocolic ñichʼtʌbeñob i yoración a tejclum cheʼ miʼ pejcañetob tiʼ tojlel a wotot›.
Cheʼ bʌ tsaʼ ujti ti oración Salomón, tsaʼ jubi tilel cʼajc ti panchan. Tsiʼ laj pulu jini majtañʌl yaʼ ti pulʌntib. Tsaʼ bujtʼi jini templo tiʼ ñuclel Jioba i tsaʼ lejmi bajcheʼ cʼajc. Iliyi miʼ pʌs chaʼan Jioba woliyʌch i ñichʼtʌben i yoración Salomón, yicʼot chaʼan jaʼel tijicñayʌch chaʼan jini templo. Wʌle yaʼ ti templo jiñʌch baqui mi chʼujutesañob Jioba jini winicob xʼixicob, i mach yaʼix ti tabernáculo.
Salomón tsiʼ chaʼle yumʌntel ti cabʌl jabil yicʼot i ñaʼtʌbal, i wen tijicña tsiʼ yubiyob jini winicob xʼixicob. Pero Salomón tsaʼ ñujpuñi yicʼot cabʌl xʼixicob chʼoyoloʼ bʌ ti yambʌ tejclum mach bʌ anic miʼ chʼujutesañob Jioba. ¿Muʼ baʼ qʼuel jini juntiquil yaʼ bʌ an ti dibujo woli bʌ i chʼujutesan diosteʼ? Ti wiʼil, jini xʼixicob tsiʼ yʌqʼueyob i chʼujutesan yambʌ dios tac jini Salomón. ¿Awujil ba chuqui tsaʼ caji ti ujtel? Wʌle jini tejclum mach chʌn tijicñayobix come Salomón tsaʼ tsʌtsʼa i pusicʼal.
Jin chaʼan Jioba tsiʼ wen michʼle Salomón, tsiʼ sube: ‹Mi caj c chilbeñet a yumʌntel i mi caj cʌqʼuen yambʌ. Iliyi maʼanic mi caj c mel cheʼ cuxulet to, jinto tiʼ yumʌntel a walobil. Pero maʼanic mi caj c laj chilben winicob xʼixicob tiʼ yumʌntel a walobil›. Laʼ laj cʌn bajcheʼ tsaʼ ujti iliyi.
1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.