Jiñi xpejcaya juñob miʼ cʼajtibeñob i bʌ

¿Ñumeñix ba ti pʼis cheʼ bʌ David tiʼ tsʼijbu chaʼan mi caj i yʌqʼuen i ñuclel i cʼabaʼ Dios «tiʼ pejtelel ora», cheʼ bajcheʼ miʼ yʌl Salmo 61:8?

Maʼañic. I sujmʌch tsaʼ bʌ i tsʼijbu David yaʼi.

Ñaʼtancu jiñi tsaʼ bʌ i tsʼijbu ti jiñi versículo yicʼot ti yan tac bʌ lʌcʼʌ lajal bʌ. Tsiʼ yʌlʌ: «Mi caj j cʼʌyin a cʼabaʼ tiʼ pejtelel ora, chaʼan mic bej tsʼʌctesan ti jujumpʼejl qʼuin jini tsaʼ bʌ c ñaʼta c mel», «C Yum Dios, mi caj c subeñet wocolix a wʌlʌ tiʼ pejtelel c pusicʼal. Mi caj c sub i ñuclel a cʼabaʼ tiʼ pejtelel ora» yicʼot «Mi caj c chʼujutesan a cʼabaʼ tiʼ pejtelel ora» (Sal. 61:8; 86:12; 145:1, 2).

Mach ñumeñic ti pʼis tsaʼ bʌ i yʌlʌ David. Yujil chaʼan ti jumpʼejl bʌ qʼuin mi caj i chʌmel (sajtel) come Jehová tsiʼ yʌlʌ chaʼan jiñi mulil miʼ yʌcʼ chʌmel. I David yujil chaʼan xmulilʌch (Gn. 3:3, 17-19; Sal. 51:4, 5). Yujil chaʼan tsaʼ chʌmiyob jaʼel jiñi wem bʌ miʼ qʼuejlelob ti Jehová bajcheʼ Abrahán, Isaac yicʼot Jacob. Cheʼ jaʼel, yujil chaʼan mach tiʼ pejtelelic ora cuxul mi caj i yajñel (Sal. 37:25; 39:4). Pero jiñi tsaʼ bʌ i yʌlʌ ti Salmo 61:8 miʼ pʌs chaʼan yom i yʌqʼuen i ñuclel Jehová tiʼ pejtelel ora cheʼ bʌ cuxulto (2 S. 7:12).

David tiʼ tsʼijbu jaʼel chuqui tac tsiʼ ñusa, cheʼ bajcheʼ mi laj qʼuel ti jiñi tʼan tac am bʌ tiʼ tejchibal jiñi Salmo 18, 51 yicʼot 52. Ti jiñi Salmo 23, tsiʼ taja ti tʼan Jehová bajcheʼ juntiquil xcʌnta tiñʌmeʼ muʼ bʌ i pʌsbeñonla jiñi bij, miʼ coltañonla yicʼot miʼ cʌntañonla. David cheʼʌch tsiʼ cʌnta i tiñʌmeʼ bajcheʼ jiñi, i jin chaʼan yom i melben i yeʼtel (troñel) Jehová tiʼ pejtelel ora (Sal. 23:6).

Cheʼ jaʼel, laʼ laj cʼajtesan chaʼan jiñi tsaʼ bʌ i tsʼijbu David tilemʌch ti Dios. Tiʼ tsʼijbu profecía tac muʼ bʌ caj i tsʼʌctiyel ti wiʼil. Jumpʼejl ejemplo, ti Salmo 110, tsiʼ yʌlʌ chaʼan ti jumpʼejl bʌ qʼuin jiñi i Yum mi caj i buchtʌl tiʼ ñoj Dios yaʼ ti panchan yicʼot mi caj i yʌqʼuentel cabʌl i pʼʌtʌlel. Ili pʼʌtʌlel mi caj i cʼʌn chaʼan miʼ mʌlben (jotben) jiñi i contrajob yicʼot «mi caj i melob winicob xʼixicob tiʼ pejtelel pañimil». David i ñojteʼelʌch jiñi Mesías, muʼ bʌ caj i chaʼlen yumʌntel yaʼ ti panchan yicʼot mi caj i yajñel bajcheʼ sacerdote tiʼ pejtelel ora (Sal. 110:1-6). Jesús tsiʼ yʌlʌ chaʼan jiñʌch woli (choncol) i tajtʌl ti tʼan yaʼ ti Salmo 110 yicʼot chaʼan iliyi mi caj i tsʼʌctiyel ti talto bʌ qʼuin (Mat. 22:41-45).

Cheʼ bajcheʼ tsaʼ laj qʼuele, Jehová tsiʼ colta David chaʼan miʼ tsʼijbun jiñi tsaʼ tac bʌ ujti cheʼ tsaʼ chumle yicʼot muʼ bʌ caj i yujtel ti talto bʌ qʼuin cheʼ bʌ miʼ chaʼ chʼojyel yicʼot miʼ mejlel i yʌqʼuen i ñuclel Jehová tiʼ pejtelel ora. ¿I bajcheʼ miʼ coltañonla iliyi chaʼan mi lac chʼʌmben i sujm Salmo 37:10, 11, 29? Ili versículo tac miʼ tsictesan bajcheʼ yilal tsaʼ chumleyob jiñi israelitajob yicʼot jiñi muʼ tac bʌ caj lac taj ti talto bʌ qʼuin tiʼ pejtelel pañimil (mulawil) cheʼ bʌ Dios miʼ tsʼʌctesan jiñi albil bʌ i chaʼan (qʼuele jiñi párrafo 8 chaʼan jiñi tema «Mi caj a wajñel a wicʼoton ti Paraíso», am bʌ ti ili revista).

Jin chaʼan, Salmo 61:8 yicʼot jiñi yambʌ versículo tac miʼ coltañonla laj qʼuel chaʼan David yom i yʌqʼuen i ñuclel Jehová yaʼ ti tejclum Israel cheʼ bʌ cuxulto. I miʼ pʌsbeñonla jaʼel jiñi muʼ bʌ caj i mel (chaʼlen) ti talto bʌ qʼuin cheʼ bʌ Jehová miʼ chaʼ chʼojyesan.