Sue gebe Megnoniggid

¿BE WISI ibu insogi imasmala Noé e gwenadgan bogwa arca yaba buggwa nosmargua? Noé, Babdummadga ibmar soggwen ugsa. Sobarnaidgi be daggena we ibmar imagnaid. Noé we ibmar durgan ugsa Babdummadga nuedye sogega, dii dummad wisadgi e gwenadgan bendasadba.

¿Jehová we ibmar nued dagsa be binsae? Eye, nued dagsa. Ar aaga Jehová, Noé gala sogsa bar bibbisaar dii dummad wiedgi dulemar oberguosurye.

Sanar gussuli nabba bela dingusa, Noé na e gwenadgan buraggwa gannar gudigudmarbali arcagi nosmalad sorba. Babdummad emarga ibmar nuegan ugsa geb ega sogsa: ‘Mimmigan buggidar niggumalo. Buggidar gumalo bela we Nabbaneg ugagse dulemar anbagguegar’.

Auggine, sorba dulemar dii dummad wisadgi sunmaggalile, sun dobe iddoarmalale, sun binsaarmalale gannar dii dummad weyob sun wisbalir dagleye. Aaga, Babdummad ibmar soggwen mesisa, dulemar E ibmar sogsad ebinsaega, bar bibbisaar dii dummad wiedgi Negdogosurye. ¿Be wisi dulemar we ibmar ebinsaega, Babdummad ibu mesisa? Sue mesisa.

Dii wisad sorba Dad gaalile, balibalisaar sue megnonidae. Sue megnoniggile yeerdagledae. ¿Be sue dagdimoga? ¿Wegi sobarnadgi be dagsa?

Wegi Babdummad sogsa: ‘Bela dulemar, geb bela ibmar durgan dii dummad wiedgi an bar obelogosuli. Mogir inbaba an sue mesisa. Sue megnonisundibe an daggoe, geb an ebinsaoe ibu an bemarga sogsa’.

Aaga, sue mai be daggarsundibe, ¿ibu be ebinsaoe? Babdummad ibmar sogsad be ebinsaoe, bar bibbisaar dii dummad wiedgi dulemar oberguosurye.