Халӗ, «Турра пӗлнӗ хыҫҫӑн», сирӗн мӗнле тӗллевсем пулмалла?
«[Эсир] Турра пӗлнӗ» (ГАЛ. 4:9).
1. Мӗншӗн вӗҫев умӗн летчиксем самолета тӗрӗслев списокӗ тӑрӑх тӗрӗслеҫҫӗ?
ХАЛЬХИ самолетсемпе вӗҫекен летчиксен вӗҫев умӗн пӑхса тухмалли 30 ытла пунктран тӑракан тӗрӗслев списокӗ пур. Самолетпа вӗҫес умӗн кашнинче ҫав список тӑрӑх тӗрӗслесе тухмасан, инкек пулас хӑрушлӑх ӳсет. Пуринчен ытла мӗнле летчиксене ҫав список тӑрӑх пӗтӗмпех тӗрӗслесе тухма ӳкӗтленине пӗлетӗр-и эсир? Чи опытлисене! Ӑста летчиксем хӑйсем ҫине ытлашши шанма, вара ҫав списокран мӗн те пулин тӗрӗслемесӗр хӑварма пултараҫҫӗ.
2. Мӗне-мӗне пирӗн тӗрӗслемелле?
2 Нимле инкек те ан пултӑр тесе шутлакан летчик пекех, эсир те йывӑр вӑхӑтра хӑвӑрӑн ӗненӳ ҫирӗп пулнипе пулманнине пӗлме пулӑшакан хӑйне евӗрлӗ тӗрӗслев списокӗпе усӑ курма пултаратӑр. Эсир нумаях пулмасть шыва кӗнӗ-и е Турӑшӑн нумай ҫул хушши ӗҫлетӗр-и, хӑвӑр ӗненӗвӗр ҫирӗп пулнипе пулманнине тата Иеговӑна чунтан парӑнса пурӑннипе пурӑнманнине сирӗн тӗрӗслесе тӑмалла. Ҫавна пӗрмай тата тӗплӗ тумасан, Иеговӑпа хамӑр хушӑри хутшӑнусене пӑсма пулать. Библи пире асӑрхаттарать: «Тӗреклӗ тӑратӑп тесе шухӑшлакан хӑй ӳкесрен сыхлантӑр» (1 Кор. 10:12).
3. Галатири христиансен мӗн тумалла пулнӑ?
3 Иисусӑн тӳлесе илмелли парни христиансене Турра пӗлмелли ҫӗнӗ май уҫса панӑ. Вӗсем Туррӑн ывӑлӗсем пулма пултарнӑ! Анчах та Галатири христиансен хӑйсен ӗненӗвӗ ҫирӗп пулнипе пулманнине тӗрӗслемелле пулнӑ (Гал. 4:9). Унти пухура хӑш-пӗрисем Моисей саккунне тытса тӑрсан ҫеҫ христиансем тӳрӗ ҫынсем пулма пултараҫҫӗ тенӗ. Анчах та Турӑ ҫав Саккунпа усӑ курма пӑрахнӑ пулнӑ тата ытти халӑх ҫыннисем нихӑҫан та Моисей саккунне пӑхӑнса пурӑнман! Еврейсен те, ытти халӑх ҫыннисен те чӑнлӑхра ҫитӗнӳсем тумалла пулнӑ. Ҫавна тӑвас тесе вӗсен Турӑ ҫынсене Саккуна тытса пурӑнма урӑх ыйтманнине ӑнланмалла пулнӑ.
ЭПИР ТУРРА ПӖЛЕС ТЕСЕ ТӐВАКАН ПУҪЛАМӐШ УТӐМСЕМ
4, 5. Павел Галатири христиансене мӗнле канаш панӑ тата ҫавӑ пирӗнпе те мӗнле ҫыхӑннӑ?
4 Павел апостол Галатири христиансене панӑ канаша ҫак тӗллевпе ҫырса хунӑ: чӑн христиансем, кирек хӑш вӑхӑтра пурӑнсан та, Библи чӑнлӑхӗн пуянлӑхне хӑварса хыҫала тӑрса юлнӑ япаласем патне ан таврӑнччӑр тенӗ. Иегова пӗлтернипе апостол Галати пухӑвӗсенчи христиансене кӑна мар, Турра пуҫҫапса пурӑнакансене пурне те чӑтӑмлӑ тӑрса юлма хавхалантарнӑ.
5 Пирӗн пурин те хамӑра Турӑшӑн ӗҫлеме хӑҫан халалланине асра тытмалла. Ҫавӑнпа та хӑвӑра ҫак ыйтусене парӑр: мана шыва кӗме хатӗрленме пулӑшнӑ утӑмсене эпӗ астӑватӑп-и? Турра эпӗ мӗнле пӗлме пуҫланине тата Турӑ мана пӗлнӗ хыҫҫӑн эпӗ хама мӗнле туйма пуҫланине астӑватӑп-и?
6. Мӗнле списока эпир пӑхса тухӑпӑр?
6 Чӑнлӑхра пулмашкӑн эпир пурте тӑхӑр утӑм турӑмӑр («Шыва кӗме тата малашне те ҫитӗнӳсем тума пулӑшакан утӑмсем» рамкӑна пӑхӑр). Ҫав тӑхӑр утӑма хамӑра аса илтерсех тӑратпӑр пулсан, пире тӗнчери япаласем патне каялла таврӑнас шухӑшпа кӗрешме ҫӑмӑлрах пулӗ. Опытлӑ, ҫав вӑхӑтрах асӑрхануллӑ летчик пӗр инкек-синкексӗр вӗҫес тесе кашнинче хӑйӗн списокӗ тӑрӑх тӗрӗслесе тӑнӑ пекех, эсир те хӑвӑрӑн список тӑрӑх хӑвӑра тӗрӗслесе тӑнипе Турӑшӑн малашне те шанчӑклӑ ӗҫлеме пултаратӑр.
ТУРӐ КАМА ПӖЛЕТ, ҪАВСЕМ ЧӐНЛӐХРА ҪИРӖПЛЕНСЕХ ПЫРАҪҪӖ
7. Мӗнле «тӗслӗхе» пирӗн тытса тӑмалла тата мӗншӗн?
7 Тӗрӗслев списокӗ летчика вӗҫев умӗн кашнинче мӗн-мӗн тумаллине аса илтерсе тӑрать. Эпир те хамӑра тата шыва кӗнӗренпе хамӑр тытса тӑракан йӗркене яланах тӗрӗслесе, е тӗпчесе, тӑма пултаратпӑр. Павел Тимофей патне ҫырнӑ: «Ху манран мӗн илтнине тӗрӗс вӗрентӗвӗн тӗслӗхӗ вырӑнне хурса, Христос Иисуса юрӑхлӑ ӗненсе, Ӑна юрӑхлӑ юратса ҫавӑн пек вӗрент» (2 Тим. 1:13). «Тӗрӗс вӗрентӗве» Турӑ Сӑмахӗнче тупма пулать (1 Тим. 6:3, 4). «Тӗслӗх» тесе куҫарнӑ грек сӑмахӗ художник эскизӗ текен шухӑшпа ҫыхӑннӑ. Художник тунӑ эскиз пӗтӗм ӳкерчӗк мӗнле пулассине курма пулӑшнӑ пекех, «тӗрӗс вӗрентӗвӗн тӗслӗхӗ» пире, тӗпрен илсен, Турӑ мӗн ыйтнине ӑнланма, тума пулӑшать. Ҫавӑнпа та шыва кӗрес умӗн тунӑ утӑмсене пӑхса тухар та чӑнлӑх тӗслӗхне эпир мӗн таран тӗрӗс тытса тӑнине курма тӑрӑшар.
8, 9. а) Мӗншӗн пирӗн ӗненӗве ҫирӗплетсех, пӗлӗве ӳстерсех тӑмалла? ӑ) Мӗншӗн пире, христиансем пулнӑ май, ҫитӗнӳсем туни питӗ кирлӗ тата мӗншӗн ҫавна йывӑҫ ӳснипе танлаштарма пулать?
8 Пуринчен малтан пӗлӳ илмелле. Унтан эпир ӗненӳ аталантарма пултаратпӑр. Анчах та пирӗн пӗлӗве те ӳстерсех пымалла, ӗненӗве те ҫирӗплетсех тӑмалла (2 Фес. 1:3). Ӳсӗм вӑл тӗрлӗ йышши улшӑнусем пулассипе ҫыхӑннӑ. «Ӳсет» тени вӑл пысӑкланса, вӑйланса пынине пӗлтерет. Апла пулсан, шыва кӗнӗ хыҫҫӑн Турӑпа пирӗн хушӑри хутшӑнусем ҫирӗпленсех, вӑйлансах пымалла.
9 Ҫакӑ вӑл йывӑҫ ӳснипе пӗрех. Йывӑҫ, уйрӑмах ҫирӗп те тарӑн тымарлӑ пулсан, тӗлӗнмелле ҫӳллӗ ӳсме пултарать. Сӑмахран, Ливанри хӑш-пӗр мӑнаҫлӑ кедрсем 12 хутлӑ ҫурт ҫӳллӗш, ҫирӗп те яваланса ларнӑ тымарлӑ пулма пултараҫҫӗ тата вӗсен вуллин ҫавракӑшӗ 12 метра ҫитме пултарать (Юр. юр. 5:15). Ҫавӑн пек йывӑҫ чи малтанхи пек пысӑк хӑвӑртлӑхпа ӳсме чарӑннӑ хыҫҫӑн та ӳсет, анчах та унчченхи пек куҫа курӑнмалла мар. Ҫулсерен вулли сарлакалансах пырать, тымарӗсем сарӑлса та тарӑнланса пыраҫҫӗ, ҫакӑ вара йывӑҫа тӗреклӗ пулма парать. Христианин тӑвакан ҫитӗнӳсем пирки те ҫавнах калама пулать. Чи малтан, Библи вӗренме пуҫласан, эпир пысӑк улшӑнусем тума пултаратпӑр, унтан вара шыва кӗретпӗр. Пухури тӑвансем пирӗн ҫитӗнӳсене курса савӑнаҫҫӗ. Эпир пионер пулса ӗҫлеме те е пухури хӑш-пӗр тивӗҫсене те илме пултаратпӑр. Вӑхӑт иртнӗҫемӗн эпир чӑнлӑхра тӑвакан ҫитӗнӳсем унчченхи пекех палӑрса тӑмасан та пултараҫҫӗ. Ҫапах та пирӗн «Христос пекех паха, аталанса ҫитнӗ арсем пуличчен» ӗненӗве ҫирӗплетсех, пӗлӗве ӳстерсех тӑмалла (Эф. 4:13, ҪХ). Ҫапла вара эпир пӗчӗк хунавран ҫирӗп те лайӑх ӳссе ҫитнӗ йывӑҫ — аталанса ҫитнӗ христианин — пулса тӑрӑпӑр.
10. Мӗншӗн аталанса ҫитнӗ христиансен те чӑнлӑхра ҫитӗнӳсем тумалла?
10 Ҫакӑнпа пирӗн ҫитӗнӳсем тума чарӑнса тӑмалла мар. Пирӗн малалла та пӗлӗве ӳстермелле, ӗненӗве ҫирӗплетмелле. Ҫапла эпир Турӑ Сӑмахӗн тӑпри ӑшне тарӑнрах та тарӑнрах тымар ярӑпӑр (Ытар. 12:3). Христиансен пухӑвӗнче нумай тӑван шӑп ҫапла тӑвать. Сӑмахран, вӑтӑр ҫул ытла старейшина пулса ӗҫлекен пӗр арҫын тӑван халӗ те ҫитӗнӳсем тӑватӑп тесе палӑртнӑ. Вӑл калать: «Библи маншӑн хаклӑран та хаклӑ кӗнеке пулса пырать. Эпӗ Библири принципсемпе, саккунсемпе тӗрлӗ майпа усӑ курмалли ҫӗнӗ меслетсене тупсах тӑратӑп. Ҫавӑн пекех эпӗ сӑваплӑ ӗҫе ытларах та ытларах хаклатӑп».
ТУРӐПА ХАМӐР ХУШӐРИ ТУСЛӐХА ҪИРӖПЛЕТӖР
11. Мӗнле майпа эпир Иеговӑна лайӑхрах пӗлсе пыма пултаратпӑр?
11 Ҫитӗнӳсем тӑвас тесен Иеговӑпа та — пирӗн Туспа тата Аттепе — ҫывӑхланмалла. Вӑл пире ырланине, хӳтӗленине тата юратнине пӗлччӗр тет. Хӑйӗн юратнӑ ашшӗн е амӑшӗн ытамӗнче ача хӑйне шӑп ҫапла туять те, эпир хамӑр та ҫывӑх та шанчӑклӑ тус ҫумӗнче ҫапла туятпӑр. Иеговӑпа хамӑр хушӑра ҫавӑн пек ҫывӑх хутшӑнусем пӗр кунта пуҫланса кайма пултарайманнине эсир ӑнланатӑр паллах. Турра пӗлсе ҫитес тата юратма пуҫлас тесен вӑхӑт кирлӗ. Ҫавӑнпа та унӑн Сӑмахне вулама кашни кун вӑхӑт уйӑрӑр. Ҫакӑ сире Иегова мӗнле Турӑ пулнине лайӑхрах пӗлсе ҫитме пулӑшӗ. Ҫавӑн пекех Иегова парса тӑракан кашни ҫӗнӗ журнала, брошюрӑна тата кӗнекене вуласа тухсах тӑрӑр.
12. Иегова пире пӗлтӗр тесен пирӗн мӗн тумалла?
12 Чӗререн кӗлтуни тата лайӑх ҫынсемпе хутшӑнни Турӑпа хамӑр хушӑри туслӑха ҫирӗплетме пулӑшать. (Малахия 3:16 вуласа пар.) Иегова хӑйӗн тусӗсем кӗлтунӑ чухне «вӗсен кӗллине итлет» (1 Петр 3:12, ҪХ). Хӑйсен ачисене юратакан ашшӗ-амӑшӗ пекех, Иегова эпир ӑна пулӑшу ыйтса йӑлӑннине тимлӗн итлет. Ҫавӑнпа та пирӗн ялан кӗлтумалла (Рим 12:12). Малалла та Туррӑн тусӗсем пулас тесен пире Вӑл пулӑшса тӑни кирлӗ. Эпир кӗлтума пӑрахсан, хамӑра кирлӗ вӑя илме пултараймӑпӑр. Ҫапла вара ҫак йӗркесӗр тӗнче хӗснине пула хуйха ӳкме пулать е пирӗн тӗрӗс маррине тума илӗртекен шухӑш ҫуралма пултарать. Анчах та эпир хамӑра кирлӗ пулӑшу ыйтса кӗлтӑватпӑр пулсан, Турӑ пире ҫавна пама хатӗр. Иеговӑна кӗлтӑвас тӗлӗшрен сирӗн пурте лайӑхах-и е эсир ҫав тӗлӗшрен лайӑхланма кирлине куратӑр-и? (Иер. 16:19.)
13. Турӑпа хамӑр хушӑри хутшӑнусем ҫирӗп пулччӑр тетпӗр пулсан, мӗншӗн тӗлпулусене пирӗн пӗр сиктермесӗр ҫӳремелле?
13 Иегова хӑйӗнче «хӳтлӗх шыракансене» пурне те кӑмӑллать, ҫавӑнпа та Турра пӗлнӗ хыҫҫӑн эпир малашне те ӑна пӗлекенсен пухӑвӗпе пӗрмай хутшӑнасшӑн (Наум 1:7, ҪТ). Тӗнчере йывӑрлӑхсем нумай пулнӑран пирӗн хамӑра тӗреклӗ пулма пулӑшакан пухури тӑвансемпе пӗрле пулас тесе вӑхӑт уйӑрмалла. Ҫакӑ хӑш енчен усӑ парать? Пухура эсир «юратма, ырӑ ӗҫсем тума» хавхалантаракан ҫынсене тупатӑр (Евр. 10:24, 25). Павел еврейсем патне ҫырнӑ пек пӗр-пӗрне юратас тесен тӑванлӑх, Турра пӗр шухӑшлӑ пулса пуҫҫапакан ҫынсем, урӑхла каласан, пуху кирлӗ. Ҫавӑн пек юратӑва ытти христиансемпе хутшӑнмасӑр кӑтартма май ҫук. Сирӗн тӗрӗслев списокӗнчи ҫав графа пушӑ ан пултӑр тесе пухӑвӑн тӗлпулӑвӗсене сиктермесӗр ҫӳрӗр те унта комментарисем парса хутшӑнӑр.
14. Мӗншӗн пирӗн ӳкӗнме тата хамӑр пурнӑҫра улшӑнусем тума яланах хатӗр пулмалла?
14 Христианин пулас тесе пирӗн ӳкӗнмелле тата ҫылӑх туса пурӑнма пӑрахмалла пулнӑ. Анчах та ҫакӑ пирӗн урӑх нихӑҫан та, нимшӗн те ӳкӗнме кирлӗ маррине пӗлтермест. Пирӗн ҫитменлӗхсем пур пирки пире ҫылӑх тума ҫӑмӑл пулма пултарать. Ҫылӑх вӑл пире кирек хӑҫан та сӑхма хатӗр выртакан ҫӗленпе пӗрех (Рим 3:9, 10; 6:12—14). Хамӑра яланах тӗрӗслесе тӑрар та хамӑр ҫитменлӗхсем ҫине куҫ хупар мар. Телее, эпир чунтан-вартан хамӑр ҫитменлӗхсемпе кӗрешнӗ тата кирлӗ улшӑнусем тунӑ чухне Иегова хӑйне пирӗнпе тӳсӗмлӗ тытать (Флп. 2:12; 2 Петр 3:9). Эпир хамӑр вӑхӑтпа, вӑйпа мӗнле усӑ курнине тӗрӗслесех тӑратпӑр пулсан, ҫавӑн пекех эгоистла тӗллевсене сирсе яратпӑр пулсан, ҫитменлӗхсемпе кӗрешме ҫӑмӑлрах пулӗ. Пӗр хӗрарӑм тӑван ҫырать: «Мана чӑнлӑхра пӑхса ӳстернӗ, анчах та эпӗ Иегова ҫине нумайӑшӗ пӑхнӑ пек пӑхман. Эпӗ унран шутсӑр хытӑ хӑрамалла тата ӑна нихӑҫан та юрӑхлӑ пулма пултараймастӑп тесе шутланӑ». Вӑхӑт иртнӗҫемӗн вӑл Турӑпа ҫывӑх пулманнине туйнӑ та ҫавна пула пӗрре анчах мар йӑнӑш тунӑ. Вӑл калать: «Ҫакӑ эпӗ Иеговӑна юратманран мар, ӑна чӑннипе пӗлменрен пулса тухнӑ. Анчах та хӗрӳллӗн нумай кӗлтунӑ хыҫҫӑн эпӗ улшӑнма пуҫларӑм». Вӑл малалла калать: «Иегова мана пӗр чӑрмав хыҫҫӑн теприне ҫӗнтерсе пыма пулӑшса, хӑйне манпа ҫав тери ҫепӗҫ тытса тата мана мӗн тумаллине кӑтартса пырса пӗчӗк ачана ертсе пынӑ пек ертсе пынине эпӗ ӑнланса илтӗм».
15. Иисуспа унӑн Ашшӗ мӗн ҫине тимлӗ пӑхаҫҫӗ?
15 Ырӑ хыпара «халӑха каласа парӑр». Туррӑн ангелӗ ҫак сӑмахсене Петрпа ытти апостолсене, вӗсене тӗлӗнмелле майпа тӗрмерен хӑтарнӑ хыҫҫӑн каланӑ (Ап. ӗҫ. 5:19—21). Эпир кашни эрнере ырӑ хыпар каласа ҫӳрес ӗҫе хутшӑнни — пирӗн тӗрӗслев списокӗнчи тепӗр пункт. Иисуспа унӑн Ашшӗ пирӗн ӗненӳ ҫине те, пирӗн сӑваплӑ ӗҫ ҫине те тимлӗ пӑхаҫҫӗ (Ӳлӗм. 2:19). Пӗр старейшина калашле (унӑн сӑмахӗсене ҫӳлерех илсе панӑччӗ): «Ырӑ хыпар сарасси — пирӗн чи кирлӗ ӗҫ».
16. Мӗншӗн пирӗн хамӑра Иеговӑна халаллани ҫинчен час-часах шухӑшламалла?
16 Хӑвӑра Иеговӑна халаллани ҫинчен час-часах шухӑшлӑр. Пирӗн мӗн пуррисенчен чи хакли вӑл — Иеговӑпа хамӑр хушӑри хутшӑнусем. Вӑл хӑйӗннисене пӗлет. (Исаия 44:5 вуласа пар.) Унпа хӑвӑр хушӑри хутшӑнусем ҫирӗп пулнипе пулманнине кӗлтуса тӗрӗслӗр. Ҫавӑн пекех шыва кӗнӗ кунӑн датине манса ан кайӑр. Ҫакӑ сире шыва кӗни эсир кирек хӑҫан тунӑ йышӑнусенчен чи кирли пулнине асра тытма пулӑшӗ.
ИЕГОВӐПА ҪЫВӐХ ПУЛАС ТЕСЕН ПИРӖН ЧӐТӐМЛӐ ПУЛМАЛЛА
17. Иеговӑпа хамӑр хушӑри хутшӑнусем ҫирӗп пулччӑр тесен мӗншӗн чӑтӑмлӑх кирлӗ?
17 Галатсем патне янӑ ҫырура Павел чӑтӑмлӑ пулмалла тесе палӑртнӑ (Гал. 6:9). Хальхи христиансене те ҫакӑ кирлӗ. Сирӗн йывӑрлӑхсем пулаҫҫех, анчах Иегова сире пулӑшӗ. Святой сывлӑш пирки кӗлтусах тӑрӑр. Иегова сире хуйхӑ вырӑнне савӑнӑҫ, чун ыратӑвӗ вырӑнне канӑҫлӑх парсан, сире ҫӑмӑлрах пулӗ (Матф. 7:7—11). Шухӑшласа пӑхӑр-ха, Иегова кайӑксемшӗн тӑрӑшать пулсан, вӑл хӑйне юратакансемшӗн, хӑйсене ӑна халалланисемшӗн тата ытларах тӑрӑшмӗ-ши? (Матф. 10:29—31.) Сире кирек мӗнле хӗссен те, нихӑҫан та каялла ан чакӑр, нихӑҫан та ан парӑнӑр. Иегова пире пӗлнине пула пирӗн мӗн тери чаплӑ пуянлӑх пур!
18. Халӗ, «Турра пӗлнӗ хыҫҫӑн», сирӗн мӗнле тӗллевсем пулмалла?
18 Эсир нумаях пулмасть Турра пӗлме пуҫланӑ тата шыва кӗнӗ пулсан, халӗ вара сирӗн мӗн тумалла? Иеговӑна тата лайӑхрах пӗлме тӑрӑшӑр та чӑнлӑхра ҫитӗнӳсем тӑвӑр. Эсир нумай ҫул каялла шыва кӗнӗ пулсан, сирӗн халӗ мӗнле тӗллевсем пулмалла? Сирӗн те Иегова ҫинчен калакан пӗлӗве малалла ӳстерсе, тарӑнлатса пымалла. Турра эпӗ ҫителӗклӗ пӗлетӗп, ҫавӑнпа та унпа хам хушӑри хутшӑнусене урӑх ҫирӗплетме кирлӗ мар тесе шутлассинчен асӑрханӑр. Иеговӑпа — юратакан Аттепе, Туспа тата Турӑпа — хамӑр хушӑри хутшӑнусем ҫирӗпленсе пынипе пыманнине пӗлес тесе пирӗн хамӑра ҫак статьяра сӳтсе явнӑ список тӑрӑх вӑхӑтран вӑхӑта тӗрӗслесе тӑмалла. (2 Коринф 13:5, 6 вуласа пар.)