Itre Nyine Amekunëne Thatraqane La Itre Ijine Hedredrei
1 Ame ngöne lo itre ijine vakas, ke, alanyimu la angetre paatre ngöne la ekalesia lo itre treu cili. E maine traqa ha e pune treu, nge tha bëeke palakö së, loi e tha tro kö a thëthëhmine troa upe la rapore së kowe la seketere ne la ekalesia. Loi e tro palahi a canga iupifë matre ijije troa ce hane e memine lo itre rapore ne la ekalesia asë, nyine troa iupifë koi Sasaiatri e nöjei treu drai sikis.
2 Loi e troa thupëne la nöjei ijine ka ijije göi troa cainöj. Ame la itre ijine cili, ke, ene lo easë a tro agö, maine easë a wange la itre sine së, maine kola porotrike memine la itre atr hne së hna ixelë memin. Hapeu, hne së kö hna thupëne la itre ijine ka ijije cili matre tro së a xötrethenge la tulu hna amë hnei Iesu? Tha hnei nyidrëti kö hna xome hnöthe la troa cainöje ngöne la nöjei ijin. (Ioane 4:5-30) Eje mina fe laka, hnei Paulo aposetolo hna ‘nyipi ewekëne la nöjei ijin,’ nge nyidrëti fe a madrine la itre thangane ka loi hnei nyidrëti hna kapa. (Efe. 5:16; Ite Huliwa 17:17; 28:30, 31; Kol. 4:5) Loi e troa hnëkëne hnyawa la aqane troa nyiqaane ithanata ngöne la huliwa ne cainöje e nöjei ijin. Troa hnëkëne hnyawaane la itre mekune nyine ithahnataan, nge tro palahi a hetrenyi ngöne iwanakoime la ca zonal, maine ca tarake nyine troa amejëne la aja i angeic.
3 Loi e tro së a xötrethengene hnyawaane la itre nyine amekunëne celë, qa ngöne lai, tha tro kö a luzi la itre traeme së e ijine vakas, pine laka hne së hna huliwa cememine la inamacan, hawe, easë lai a troa hamëne koi Iehova “la pane wene” së.—Ite Edom. 3:9.