Manathithi Hna Troa Kapa Qa Ngöne La Ini Ne Cainöje Trootro Qa Thei Akötresie Göi Macatre 1996—Götrane 3
1 Hnei Paulo aposetolo hna ajane tro la itre trejine me angeice a thithi sai angeic matre hetrenyi angeice la atreine troa catre qaja la maca ka loi. (Efe. 6:18-20) Easë a ajane troa thele lai atreine cili. E ajane së troa hetrenyi la atreine cili, ke, tro së a madrine la ixatua hna hamëne jëne la Ini Ne Canöje Trootro Qa Thei Akötresie. Nge e cili, hetre madrine ne la itre atrene la icasikeu ngöne la angatr a kapa la ithuecatre ka upi angatre troa hane cile fë hnëqa.
2 Tune la itre ka ini, easë a isa kapa la itre ihaji nyine troa xatua së matre maca la aqane tro së a ithahnata, memine la aqane troa hamëne la ini. (Ite Edo. 9:9) Tro së a hane kepe thangane fe la ihaji hna kapa hnene la itre xaa ka ini, me ketre trongëne la hne së hna inin. Ngöne la easë a hnëkëne la xötre qa së, ke, loi e tro së a inine hnyawa la itre mekune hna amekötine koi së matre xeci koi së laka tha tro kö a tria la aqane qeje pengöne së la taane cili. Loi e tro la itre mekune ka tru, memine la itre xötre hne së hna troa xom, a ihmeku memine la taane mekun. Maine kola troa ce kuca la götrane qa memine la ketre atr, ke, loi e troa canga hnëkëne me amacane lapane matre loi e troa amamane ngöne la hna ini. Ngöne laka easë pala hi a maca trootro, tro hë së a tupathe troa qaja la itre mekune nge thaa kolo pe a e ngöne la sine pepa.
3 Tro asë hi la itre trene götraneqa ngöne la hna ini a canga traqa, me hamëne kowe la atre thupëne la ini lo sine pepa hna cinyihane ngön la ini hna troa huliwan, me lapa qëmekene la ita ne cainöj. Tro la itre sör a canga qaja kowe la atre thupëne la ini la aqane tro angatre cainöj, maine troa cile maine troa lapa pena. Maine hne së hna ce huliwa me xötrethenge hnyawa la itre hna amekötine cili, ke, tro hë së a kapa la ketre porogarame ka lolo e troa dreng, nge tro fe hë a ketre ixatua kowe la itre trene hnëqa ngöne la ita ne cainöj, ngöne laka canga kapa angatre la itre ewekë thatraqane la ini.
4 Hnëkëne Jë La Götraneqa No. 2: Ame la aliene la troa e la Tusi Hmitrötr, ke, ene la troa xatuane la ka ini troa maca hnyawa la aqane e i angeic. Troa eatre tuneka lai? Ame la ka sisitria matre troa traqa kow, ke, ene la troa e catrën, me e lapan. Maine kola ajane hnene la ka ini la aliene la itre hna ithahnata, maine atre pena la aqane troa qaja itre ej, ke, loi e tro angeic a thele hnine la ketre diksioner. Kolo fe a hape koi së troa atre hnyawa la aliene la itre aqane qaja la itre hna nyihatrene e hnine la diksioner.
5 Loi e tro la itre keme me thin a xatuane la itre nekö i angatre ka co petre kö troa hnëkëne la aqane troa e hnyawa la götraneqa i angatr. Kola hape troa drenge la kola e hnene la nekönatr la xötreqa i angeic, nge thupene lai hamëne jë la itre mekune ka ijije matre atreine angeice ngöne la götrane cili. Hna aijijëne ngöne la traeme hna athipe la ketre aqane nyiqane ithahnata ka xoxopatre hi memine la ketre aqane nyipune ka ijije troa hamëne la itre ini jëne la itre mekune ka tru. Ketre, tro la hnainin a kökötre ngöne la atreine i angeice troa ketre ithahnata, ngo tha hna e gufane pe la itre mekune hna cinyihane hë.
6 Hna sipo jëne la thithi hnene la atre cinyihane la tusi salamo ka hape: “Joxu fe, tro cilieti a fe la ukeineqeng nge tro la qeng a amamane la nyine atrunyi cilie.” (Sal. 51:15) Epi tro la götraneqa hne së hna kuca ngöne la Ini Ne Cainöje Trootro Qa Thei Akötresie a xatua së troa eatrëne la aja cili.