The Cile Hnö Kö, Ngo Elë Hune Jë La Itre Jol Ka Eje Thei Nyipunie
1. Pine nemene matre tha hane pë hë itre xane hnyingëne kowe la itre atr, maine aja i angatre jë fe kö troa hane ini Tus?
1 Hapeu, ka jole kö koi nyipunie troa hnyingëne kowe la itre atr, ka hape aja i angatre jë fe kö troa hane ini Tus? Maine jë hnene laka, xou i nyipunieti fe, wanga ngazo jë la aqane eköthe nyipunie la ini Tus. Ka tui Mose fe ekö me Ieremia, ke hnei nyidroti hna xouen, wanga tha eatrëne hnyawa ju nyidroti la hnëqa hna ahnithe koi nyidro. (Eso. 3:10, 11; 4:10; Iere. 1:4-6) Ala nyimu catre la itre atr ka tui nyidro. Ngo nemene la nyine tro sa kuca matre tro sa elë hune la xou?
2. Pine nemene matre tha tro kö sa cainöje hmekuje hi ngöne itre hnalapa trootro, me nue la hnëqa ne troa ini Tusi koi itre xan?
2 The tro pi kö sa thëthëhmine laka, tha Iehova kö a upi së troa kuca la hne së hna thatrein. (Sal. 103:14) Haawe, ame la troa “inine” la itre atr, tre celë hi hnëqa hna athipe koi së hmekune la hne së hna atrein. (Mat. 28:19, 20) Tha hnëqa kö lai hnei Nyidrëti hna ahnithe hmekuje hi kowe lo itre hna hape, itre ka atrein. (1 Kor. 1:26, 27) Qa ngöne lai, tha tro hmekuje kö sa cainöje ngöne itre hnalapa trootro, me nue pë hë la troa ini Tusi me itre atr kowe la itre xan.
3. Iehova a ini së tune kaa troa inine la itre atr?
3 Iehova La Ka Ini Së: Ame la ka ini së troa atreine inine la itre atr, tre Iehova hi. (2 Kor. 3:5) Hnei Iehova hna nyi jëne la organizasio i Nyidrë, matre troa hamëne koi së la itre ini qa hnine la Tusi Hmitrötr, nge itre ini lai hna thatre kö hnene la itre atr ka inamacane ne la fene celë. (1 Kor. 2:7, 8) Ase hë Iehova amë ngöne la wesi ula i Nyidrëti la aqane ini Iesu, Atre Ini Ka Tru, matre nyine tulu koi së; nge Nyidrëti fe a hamëne koi së la itre xa nyine troa xatua së e hnine la ekalesia. Ketre, tha hnei Nyidrëti kö hna nue së troa isa kuci jia ne huliwa thatraqane la huliwa ne ini. Ngo hnei Nyidrëti pe hna hamëne koi së la itre itus, tune lo Ini Tusi Hmitrötr, ka eköthe hnyawane la itre trenge nyipici, matre hmaloi koi së troa trotrohnine la itre ini cili. Hne së hna pune majemine troa xouene troa inine la itre atr, ngo tha huliwa ka jole menu kö la huliwa cili.
4. Pine nemene matre ijije hi tro sa mejiune kowe la ixatua i Iehova?
4 Hnei Mose me Ieremia hna atreine eatrëne la huliwa i nyidro, ke hna xatua nyidroti hnei Iehova. (Eso. 4:11, 12; Iere. 1:7, 8) Ijije hi tro sa hane sipone la ixatua i Iehova. Loi e tro sa lapa mekune hnyawa, ka hape, ame la easa xomiujine la ini Tus, easë hi lai a kuca la aja i Iehova, ene la troa inine la itre atr la itre trenge nyipici göi Nyidrë. (1 Ioane 3:22) Haawe, catre jë së troa hane isa xomiujine la itre ini Tusi Hmitrötr, ke celë hi ketre huliwa ka ithue madrin, nge ketre jëne manathithi koi së ngöne la huliwa ne cainöj.