“Anyipicine” Jë
1. Nemene la tulu hnei Paulo aposetolo hna amamane ngöne la huliwa ne cainöj?
1 “Kuca asë jë la qâ i ’ö.” (2 Tim. 4:5) Maine jë hnei Paulo aposetolo hi hna thë troa hamëne la ithanata celë koi Timoteo. Qaane lo macatre 47 M.K. uti hë lo macatre 56 M.K., a köni a tro Paulo troa wange la itre ekalesia. Ame ngöne la Tusi Hmitrötr, a nyimu a qaja hnene la tus i Ite Huliwa ka hape, Paulo a “anyipicin.” (Ite hu. 23:11; 28:23) Tro sa nyitipu nyidrëti tune kaa enehila?
2. Nemene la nyine tro sa kuca, matre mama jë ka hape, easa kuca asë la qa së, ene la troa anyipicine ngöne itre hnalapa trootro?
2 Cainöj Ngöne Itre Hnalapa Trootro: Easë enehila a cainöje ngöne la nöjei traeme ne la drai, matre tupath troa öhne la itre atr ka tha hane kö drenge la maca ka loi. Ame itre xa atr, tre traqa hi së a öhnyi angatr e heji lapa, ame pena itre xan, tre tro sa öhnyi angatr e mecixeni me sabath. Catre jë së troa ithanata kowe la itre atrene la nöjei hnalapa asë, me tro lapa hmaca kowe la itre hnalapa ka pë atren. Ngo tune kaa e patre pala hi la itre atr ngöne la easa tro troa wai angatr? Tupathe jë së troa cinyany maine hë pena ngöne telefon, maine jë tro hë së lai a hane ketri angatr.
3. Eue la troa cainöje e kuhu gojeny me ngöne la nöjei ijin?
3 E Cahu Gojeny Me Ngöne La Nöjei Ijin: Kola tro fë “[nyipi] inamacan” hnene la itre hlue i Iehova enehila koi angetre dreng. Angatr a tro fë “e kuhu” hna tro, me “ngöne la ite gojeny.” (Ite edomë 1:20, 21) Ngo hapeu, hne së kö hna hane mekune troa cainöje ngöne la easa kuca la itre jole së ngöne la drai? Hapeu, hna ‘lapane kö la mekuna së hnene la wesi ula’? (Ite hu. 18:5) Maine eje hi, tre easë hi lai a eatrëne la hnëqa së, ene la troa “anyipicin.”—Ite hu. 10:42; 17:17; 20:20, 21, 24.
4. Nemene la eloine la troa thithi me sine thele la itre mekune hna e e hnine la Tusi Hmitrötr, maine easa ajane troa catre tro fë la maca ka loi?
4 Ame itre xa ijin, maine jë tro sa cile hnö troa cainöj, pine laka, thatreine hnyawa kö së, maine xou së pena troa ithanata. Atre hnyawa kö Iehova la pengö së, ene la itre hne së hna atreine me hna thatrein. (Sal. 103:14) Ngo maine traqa mina pi koi së la itre ijine kucakuca, maine xou pena, loi e tro sa thithi koi Nyidrë, me sipone troa hamëne koi së la atreine troa ithanata. (Ite hu. 4:29, 31) Nge ame la easa isa ini Tus me lapa mekune la itre hne së hna e ngöne la Wesi Ula i Akötresie, loi e tro sa thele la itre ini ka troa upi së troa wange atrune la esisitriane la maca ka loi. (Fil. 3:8) Celë hi lai ka troa upi së troa catre tro fë la maca ka loi!
5. Nemene la nyine tro sa kuca matre troa eatrëne la hna qaja ngöne lo hna perofetane hnei Ioela?
5 Ase hë perofetane ekö hnei Ioela ka hape, qëmekene troa traqa la drai Iehova ka tru nge hna xouen, tro la itre hlue i Akötresieti a “isa trongëne la ite jë i nyuden” nge tha tro kö a nue ketre ewekë troa sewe angatre troa tro fë la maca. (Ioela 2:2, 7-9) Haawe, epi tro sa kuca asë la hne së hna atrein, matre troa eatrëne la huliwa ne anyipicin enehila, ke enehila hi la ijin!